PASTOTTO CU ZZAMPUGLIATA ‘E FFUNGE PURCINE.

PASTOTTO CU  ZZAMPUGLIATA ‘E FFUNGE PURCINE.

 Chello ca ce vo’ pe sseje   perzone
600 gramme ‘e  tubbettielle (avemmarie)  ricate,
100 gramme ‘e pancetta tesa tagliata a ffarinule piccerenelle,
‘nu  bicchiere e miezo d’uoglio ‘auliva dunciglio,

5  gruosse funge purcine  pulezzate, asciuttate e trifulate,

‘na cepolla ndurata ‘e Muntoro ammunnata e ntretata suttile,

‘nu spiculo d’aglio ammunnato e scamazzato,

 ‘ddoje farinule pe bbroro veggetale,

 

sale duppio ‘na vrancata,

sale fino  e pepe janco mmacenato a ffrisco  q.n.s.,

‘nu tuppeto ‘e prutusino, lavato asciuttato e  ntretato finu fino,

100 gramme ‘e pecurino rattato finu fino.

Comme se fa
Pulezzà cu ‘cu curtellucce affilato ‘e funge, annettarle cu ‘na mappina ummeta e asciuttarle,tagliarle a ffarinule e farle suffrijere pe cinche minute  a ffuoco doce dinto a ‘na tiella cu miezu bicchiere d’uoglio e ‘nu spiculo d’aglio ammunnato  e scamazzato; accuncià ‘e sale e pepe e passà tutto a ‘nu mmiscraturo nfi’ a uttené ‘na zumpagliata criceta e malacosa. e tenerla ‘e parte ‘ncaudo. A ‘stu punto appruntà  ‘o  broro veggetale cu tre litri d’acqua fredda e ‘e ddoje farinule pe bbroro; fraditanto àrvere a mmeza cuttura dint’ô bbroro veggetale vullente ‘e tubbettielle.
 Ricà ‘o riesto ‘e ll’uoglio dint’â tiella, farlo callentà e agnadí ‘o ttrigliato ‘e cepolla facennola appassulià a ffuoco allero, po avascià ‘o ffuoco e agnadí ‘a pancetta e farla suassà pe cinche minute; a chistu punto ricà dint’â tiella ‘e tubbettielle arvate a mmeza cuttura agnadenno uno o dduje  cuppine ‘e bbroro vullente e cumpletà ‘a cuttura d’ ‘a pasta; ammiscà e súbbeto doppo agnadí ‘a zumpagliata ‘e funge; aumentà ‘o ffuoco e dderrammà cu ‘o ccaso pecurino, cumpletanno ‘o pastotto cu n’atu filo d’uoglio a ccruro e derrammanno apprimma cu ‘o tuppeto ‘e prutusino ntretato finu fino e ppo  abbunnantemente ‘e pepe janco mmacenato a ffrisco. ‘Mpiattà, e serví caudo ‘e fuculare ‘stu pastotto gurmante.
Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

Raffaele Bracale