PACCHERE D’ ‘O MASSARO

PACCHERE D’ ‘O MASSARO

 

chello ca serve pe 6 perzone

600 gramme ‘e pacchere,

250 gramme ‘e cucuzzielle piccerille lavate asciuttatte e tagliate a rundelle ‘e miezu centimetro,

300 gramme ‘e provola tagliata a ffarinule ‘e centimetre 2 pe 2 pe 2,

300 gramme ‘e saciccia spellata e spullecata,

‘nu bicchiere d’uoglio dunciglio,

‘na cepolla ndurata ‘e Muntoro ammunnata e ntretata fina fina,

‘nu spiculo d’aglio vestuto e scamazzato,

miezu bicchiere ‘e latte retunno,

‘nu cucchiarino ‘e semmente ‘e fenucchio,

sale duppio ‘na vrancata

sale fino e ppepe janco mmacenato a ffrisco q.n.s.

‘nu tuppeto ‘e prutusino lavato, asciuttato e ntretato finu fino.

 

comme se fa

Ammunnà e ntretà ‘a cepolla e lavà, asciuttà e taglià a rundelle ‘e cucuzzielle. Dint’a ‘na prupurziunata tiella, auta ‘e sponna,ricà ll’uoglio  e agnadirve ‘a cepolla ntretata e abburrirla doce doce a ffuoco miccio.Sempe a fuoco miccio agnadirve ‘e semmente ‘e fenucchio, ‘o spiculo d’aglio vestuto e scamazzato, ‘e rundelle ‘e cucuzzielle e lassà cocere. Fraditanto spellà e spullecà ‘a saciccia e agnadirla dint’â tiella. Lassà cocere a ffuoco miccio pe diece  minute, po agnadí ‘o llatte, accuncià ‘e sale e ppepe   e ffà cocere pe n’ati diece minute. Àrvere ‘e pacchere dinto a ‘na caurara cu abbunnante acqua vullente salata (vrancata ‘e sale duppio) e, ‘na vota sculate, revacarle dint’â tiella ammiscannole a mmestiere pe farle ‘nzapurí a ffuoco miccio; a chistu punto auní ‘e ffarinule ‘e provola; tuiglià pe ‘nu paro ‘e minute, ‘mpiattà e serví caude ‘e fuculare cumpletanno ‘e piatte cu ‘o ttrigliato ‘e prutusino. Vine: Sustanziuse vine russe d’ ‘a Campania (Solopaca, Aglianico, Piedirosso,Campi Flegrei d.o.c., Taurasi), spilate n’ora primma d’ausarle,passate dinto a ‘na carrafa p’ ‘e ffà piglià aria  e  servute a ttiempo  (temperatura) ‘e stanza pe magnà. Mangia Napoli, bbona salute! Scialàteve e cunzulàteve ‘o vernecale! Raffaele Bracale