'A MORTE

’A morte


I

E ghiusto stammatina s’ è… appaciato
n’ atu cumpagno mio, turzuto e ’nzisto,
’nu curazziere, ’nu madonna ’e cristo
chino ’e salute!… Embè s’ è arricettato

’int’ a pochi minute. Ll’ à pigliato
’na bbotta ô core…, ll’ è ammancata ’a vista,
e ce à levato ’o ’mpiccio, vista ’a svista!
Capisce?!… Steva bbuono e ce à lassato

senza ’e avé ’o tiempo ’e dí: Madonna, aiuto!…
senza avé ’o tiempo pe cercà perdono
comme a ’nu fesso, oj ne’, c’ è rummanuto

’e subbeto, antrasatta, bbello e bbuono!
E quanno âmme saputo ’e averlo perzo
ce simme fatte ’e ccroce a mmano a smerza…

II

Se more, bbella mia! E tu qua’ cunte?
Statte cu ’stu penziero ca staje a pposto…
Aje voglia ’e dí ca’ uno sta frisco e ttuosto,
quanno è arrivata ll’ ora a cchi ’o raccunte?


Nun ne tène crianza, chist’ è ’o punto…
’a morte è scustumata… ’o bbi’?… nce costa…
ne fa chello che vo’ d’ ’a vita nosta,
e, si le pare, te pô ffà… defunto

quanno staje dint’ ô mmeglio d’ ’a… varchiata,
quanno nun te l’ aspiette e staje facenno
pruggette nuove tutt’ entusiasmato…

quanno vaje almanaccanno e vaje dicenno:
Dimane faccio… Addó? Tu qua’ dimane?
Staje dint’ ’a lista soja?… E leva mane!

III

’O ssaccio, ’o ssaccio… ’o fatto era ggià chiaro
Nun è ’na nuvità, è ccosa antica…,
ma fino a quanno nun vide n’ amico…
ca s’ arricetta e te lassa cu ’amaro

cu ’o ffèle ’mmocca, uno fa ’o paro e sparo
e penza: Sí, va bbe’, justo cu mmico
s’ êsse ’a piglià ’o ppusilleco?… Nun dico
ca nun ce attocca a ttutte ’e jí p’ ’o… mare

ma sa’ fra quantu tiempo… Po’ succede
chello ca nun suspiette e rieste ’e stucco…
piglie cuscienza ’e chello ca se vede

e abbíe a tremmà comme a ’nu mammalucco:
t’ accuorge, ahimmé, ca sî ’na jacuvella
’mmano â Signora nera… ’mmano a cchella!


IV

Pirciò, tiranno ’e ssomme, stamme lese!
Che voglio dí?… Tu m’ hê bbello e capito…
Vedimmo ’e nun ce fà truvà… pentite,
’ncaso ca fosse e avesseme ’a surpresa…

’Ncaso ca tuzzuliasse chella ’mpesa
e nce dicesse: S’è ’nchiusa ’a partita!…
vedimmo ’e nun ll’ avè sciupata ’a… gita
cu ’a cattiveria, ’a mmiria, ’assuocce e offese…

Nette e ppulite, è troppo, sissignore,
ma ammeno senza macchie essaggerate…
e, soprattutto, ’mpace!, ca ’o Signore

vedennoce ’e arrivà sule e spaisate
nun è custretto a ffà ’a faccia feroce,
pô aizarce ’a mano e farce assaggià ’o ddoce…

V

Ca chesto conta e ’o riesto è tarantella
ca nun leva e nun mette, è ’na pazzia…
Nun voglio farte, oj ne’, ’a filosofia,
ma comme vide ’a vita è ’na pazziella!…

È tale e cquale comme a ’na rutella
ca gira e ggira sempe comme sia,
ma po’ se stoppa e a ppede, ’mmiez’ â via
te lassa all’intrasatte ’int’ ô cchiú bbello!

E avimmo appresentarce addó tu saje,
e senza arme e bagaglie: nude e crure,
vestute cu ’a cuscienza ca, ’un sia maje!,

nun è pulita,… ’o fatto sarrà scuro!
E nno pe duje o tre ghiurne sulamente,
ma pe ’nu poco ’e cchiú…: eternamente!
Raffaele Bracale
(dal vol. 'E CCOSE D''O PPASSATO ed. Graus Napoli 2006)