P.S.V. EINDHOVEN – NAPOLI 04/10/12 3 A 0LL’AGGIU VISTA ACCUSSÍ

P.S.V. EINDHOVEN – NAPOLI 04/10/12 3 A 0 LL’AGGIU VISTA ACCUSSÍ Maledizzione, guagliú! Che granna fijura ‘e mmerda ca facettemo ajeressera... E Mazzarri dicette ca ‘na mazziata accussí ce po’ stà. E i’ ‘mmece dico ca No! Nun ce stongo, nun ce stongo e nun ce stongo... nun me va ‘e farme piglià p’ ‘o prozo dô livurnese e da De Chiacchiaroniis cu ‘a storia d’ ‘e ddoje scuatre, una p’ ‘o campiunato e n’ata pe ll’Airopa... Seh, seh aggiu visto! Nun ce vulette ‘a zingara ll’ata vota pe capí ca ll' AIK era veramente ‘na scuadra ‘e serie C e ca ‘o Napule doje êva fatto ‘o vallo ‘ncopp’â mmunnezza! Ajere avastaje ‘na scuatra appena appena cchiú ferrettiata pe scummiglià ll’altarine e metterce annante â rialtà ca ‘o Napule nun tène ‘na rónna (rosa) catàllela (adeguata) e che i vari Donadèl(lo), Mesto, Dossena, El Kaddouri, ecc.... nun ce ponno dà nisciuna caranzia!Chisto so’ tutte jucature ca nun ponno metterse ô posto ‘e Inler, ‘e Marekiaro,’e Campagnaro, ‘e Maggio e de quacche ato cumprese chille ca se ne so’ gghiute: Lavezzi e gGargano; chiste so’ tutte jucature o arrivate ô capolinia o maje partute, tutte scartine ca faticasseno a ttruvà spazzio dinto a ‘na scuatra ca lotta pe nun rechjeià (retrocedere)! E a nnuje ‘o livurnese e De Chiacchiaroniis ce vonno dà a vvevere ‘o ccuntrario...Acquajuó ll’acqua comm’é? Ma ve ne jate o no?! Menu male ca dummeneca torna ‘ncampo ‘o Napule uno e si scanzammo ll’uocchie sicche ‘e chillu cestariello d’ ‘o sinnaco ‘o fatto avess’ ‘a jí bbuono! Turnammo a ajere e vedimmo ‘e ppaggelle: ROSATI 5,5:Senza cazzimma e quase spaisato. Nun se capette cchiú ‘e ‘na vota cu Fernandèz(zo) e tenette ‘ncopp’â cuscienza allimmeno ‘nu paro ‘e rredde:chella d’apertura e ‘a terza: ‘a rredda d’ apertura pecché ascette a scampolo ‘e cape ‘e sacicce, addirittura tentanno ‘na capata addó c’avesse avuto chiammà palla, ausà ‘e punie e aizà ‘a terra pure a Fernandèz(zo) si nun se fósse scanzato e ‘a terza rredda nun ascenno a pigliarse ‘a palla lassata a ll’ulandese ca po ‘o futtette. Po però ‘mparte, cu ati parate ‘mpurtante, (quanno però ‘a frittata fuje fatta), s’affrancaje (si riscattò) ‘e tutte ll’amàrteme (gli errori) fatte e de ll’jerre (svarioni) pigliate. CANNAVARO 4,5: Avette a cche ffà cu accunte assaje scòmmete e pe fermarle nun avastaje ‘o ssale ‘ncopp’â coda; pruvaje a fà valé ‘o fisico, ma facette ‘nu buco dint’ a ll’acqua! Dicimmo ca nun lle giuvaje ‘o fatto ‘e avé jucato ‘ncopp’ â dritta e nno a ccentro... FERNANDEZ 4: Serata no d’ ‘o guaglione argentino; pure jucanno dint’â pusizziona preferita sbagliaje quase tutto.Dicimmo ca forze nun fuje corpa soja ‘o fatto ca spisso nun se capette cu Rosati, ma p ‘o riesto ajeressera nun ne ncarraje meza.. Sempe a ll’attrasso (in ritardo), parette ‘nu fantasema. E pe dummeneca ca vène nun me faccio diebbete cu ‘a vocca: facimmo corna! ARONICA 5: ‘Ndifficurtà comme a ttutta ‘a scuatra,pure ‘o càndato (lucchetto) palermitano sofferette cchiú d’ ‘o ‘sperado (previsto).Cutevelaje (sgomitò) ‘int’ â cama (area) ma servette a assaje poco! MESTO 4: ‘Na zuppa ‘e cachisse ‘nzuvarate... Nun servette nè a ddifennere, nè a appressurà ‘ncopp’â curzia. E cchisto êss’ ‘a sustituí a mMaggio!?! DZEMAILI 4,5: Troppe amàrteme(errori) ‘nfase ‘e plantamiento (d’impostazione); isso e Donadèllo parlajeno lengue diverze, nun se capetteno e nun avetteno nisciuna ’ntesa. Facette poco e nniente culaturo (filtro) ‘mmiez’ô campo e se facette cuntinuamente piglià ê spalle dê centrocampiste ulandese. DONADEL 4:Ancòra troppo ‘nceruttato e ammaccato, (oramaje bbuono [si fanno a ttiempo primma ca ‘o nchiudeno] pe san Gennaro ‘e Poveri, reparto paralitiche)concedette troppu spazzio a ll’avverzarie ca purtavano palla e se facette zumpà troppo, troppo facilmente. EL KADDOURI 4: E che ne parlammo a ffà?! Mazzarri lle dètte ‘a pussibbilità d’affrancarse doppo ‘e ll’estrèia(esordio) poco cunvincente contro a ll’Aik, ma ‘o guaglione risultaje cucasso (ridicolo) facenno peggio d’ ‘a sfita contro ê svedese. Cumpletamente spaisato, se guardaje attuorno cu ‘a faccia ‘e chi penzava:Ma che cacchio ce faccio cca ‘mmiezo?... ( dô 46°CAVANI 5: Trasette ma pur’ isso servette a ppoco e facette poco.S’abburracciaje (si innervosí) paricchio e cchesto nun ajutaje nè a isso, nè â scuatra) DOSSENA 3,5: ‘A scumma d’ ‘e fasule a ucchietielle. È n’ecchese jucatore e se vedette; puteva essere ll’urdema bbona accasione, ma ‘a sprecaje malamente: nun appressuraje maje a dduvere e ‘ndifesa se facette zumpà comme a ‘nu broscio (birillo) da Narsingh. Putídulo (inguardabile) ‘o cuntrollo ‘e palla: rrobba ‘a jucatore ‘e prumuzzione. (dô 72°ZUNIGA 4: pórvera e garabbate (ghirigori) senza custrutto). INSIGNE 5: Pe tutt’ ‘a rencontra ‘o Napule tiraje una vota ‘mporta e ‘o tiro ‘o facette isso; durante ô primmo aione fuje ll’unico a tentà d’essere periculuso; ma pure p’ ‘o scugnizzo ‘e Frattamaggiore nun fuje serata. Troppo isulato,maje cercato da centrocampiste e difenzure nun truvaje ‘a batósa (profondità) nicessaria. Mazzarri ô 62° ‘o sostituette cu ( PANDEV s.v.) VARGAS 4:Esizziale (Disastroso). Maje periculoso nè enercetico (propositivo).Se guardaje ‘a rencontra senza pavà ‘o biglietto risultanno ‘a brutta copia d’ ‘o ritratto sbagliato d’ ‘o jucatore visto contro ê scunzulate svedese. MAZZARRI 4: Se jesse a cunfessà, ma nun penzo ca trova ‘o prevete ca ll’assolve d’ ‘o peccato fatto ajere ssera. Forze pe quacche pennarulo o quacche anema ‘e dDio ca mo sta ascenno ‘a sott’ô mantesino ‘na mazziata comme a cchella d’ajere po’ pure serví pe fà crescere..., ma certamente fa assaje male a cchi tifa Ciuccio ‘a sissant’anne e lle chiagne ‘o core a vvedé ‘a scuatra luvarda a gghí ‘ngiro pe ll’Airopa a ffà fijure ‘e mmerda! D’accordo chillo visto a Eindhoven fuje ‘o Napule nummero doje..., ma ‘o livurnese ce aveva assicurato ca ce avesseno fatto vedé juoco e epiteticità (aggressività). Ma chi t’ ‘o ddà? Nun vedettemo nè ll’uno, nè ll’ata. Rummanetteno dint’ê spogliatoje.E chesto nun sta bene! Arbitro DAN TUDOR (ROU) 4,5: Dduje pise e ddoje mesure; n’ammunette otto d’ ‘o Napule e sulo dduje d’ ‘o P.S.V., ca pure nun pisciajeno acqua santa dô velliculo! E cu chesto ve saluto e si dDi’ vo’ ce sentimmo lunnerí ca vène speranno ca turnammo a pparlà ‘e ‘na vittoria! Staveti bbe’! R.Bracale Brak