venerdì 15 febbraio 2019

ZURIGO – NAPOLI (E.L.14.02.19) 1 A 3 ‘A VEDETTE ACCUSSÍ


ZURIGO – NAPOLI (E.L.14.02.19) 1 A 3
‘A VEDETTE ACCUSSÍ
Che peccato, guagliú...mannaggia ô demmonio, ma pe fforza, pe fforza! Ajeressera, quanno ‘o Napule scennette ‘ncampa a ll’ Arena sguizzera contr’ ô Zzurigo  p’’o sibbacco (match) d’addabba (andata) d’ ‘e sedicesime d’’a cuppetta airupea, ‘ntribbuna divano ce spiajemo ll’unu cu ll’ato cumme fósse juto a ffení e i’ dicette ca feneva tre a zzero pe nnuje. E accussí, accussí steva jenno nsi’ a ll’82’ quanno mannaggia ô demmonio scartellato chillu piecuro ‘e ll’arbitro serbo Mazic(cio)[3] ce siscaje ‘nu ricore contro, ca nun ce steva pe bbia ca sí è overo ca ‘nu pallone  tuzzaje ‘ncopp’â mana d’’o Ntontero,però succedette  senza  ca cagnasse direzziona e soprattutto senza ca ‘o cuano (azzurro) êsse juto cu ‘a mana a ccercà ‘a palla ca ‘mmece doppo d’avé sbattuto ‘ncopp’ô stommaco d’’o nuosto  triteddaje (rimbalzò) ‘ncopp’â mana soja i a ttiermene ‘e reculamento, quanno succede tutto chesto, nunn’è ricore! Però ‘o fecato overo m’’o magnaje quanno  Kololli  ‘o tiraje   chillu rialo avuto e ppigliaje p’’o prozo ô Lungagnone ca,  si ‘mmece ‘e se menà a mmancina, cumme facette, fósse rummaso allerta a ccentro ‘e porta,  êsse miso cu ddoje dete ‘ncopp’ a ll’afachia (traversa) chillu cucchiaro ‘e tre ssorde trasuto centralmente! Nun succedette e gghiette a ffení ca arrivate ô 95’ ‘o sibbacco (match) se nchiudette ‘ncopp’ô tre a uno pe nnuje e putimmo dicere ca  ll’olmerro  ( debutto) d’ E.L. d’’o  Napule tutto summato fove o0vero  pusitivo soprattutto p’’o najo   (successo) recuoveto  â casa d’’o Zzurigo addó ‘e cuane (azzurri) affruntanno cu fermezza  ll’antraffa (partita) reculajeno a mmestiere ‘e padrune ‘e case lassannole cumplessivamente cinche o seje minute ‘e juoco  mentre p’uttantotto minute ‘a cumannajene lloro e ppure sprecanno ancóra sotto porta, lle rialajeno tre sfugliatelle ricce [‘a primma cu Llorenzigno a ll’unnicesimo, ‘a siconna ô 21’ cu Ppeppe ‘a ‘nguenta i ‘a terza ô 76’ cu ZIELINSKI ]; cumplessivamente l’atalossa (prova) d’’e cuane ‘nzomma piacette ‘ntribbuna divano e ggiustrajeno bbuono e a ll’armidanno (centrocampo) pure senza Marekiaro e arreto  ssenza  ‘o Masto.
  Dicimmo pirciò ca ‘o Napule furmato AIuropa se chiammaje ll’aplavuse  e mo penzo proprio ca ‘a cualificazziona ‘a veco vicina!
Passammo ê ppaggelle:
MERET[‘O L ungagnone ] 6,5  Fove overo ca nun tenette niente a fà pe n’ora e ca se spurcaje ‘e guante sulo ô 60’ pe recogliere ‘nu jabbro (cross) senza periculo, fove overo ch’êsse pututo fà coccosa ‘e cchiú ‘ncopp’ô cucchiaro d’’o ricore, ma è overo pure ca s’abbuscaje ‘a pagnotta cu ‘na granna parata doppo d’’o nuvantesimo pe ffermà cu ‘o cuorpo ‘na palla ‘e  Khelifi ch’êva tentato da scarzo ‘nu metro!
 MALCUIT[‘O Tignuto] 7 ‘Na spina ‘int’ô scianco d’’a trasera d’’o Zzurigo cu ttanti  jabbre (cross) spisso pricise doppo d’esserse magnata ‘a curzia ‘e dritta. Assaje capace a ccrijà ll’artafucca  (superiorità) d’’e nummere.Uno d’’e meglie. MAKSIMOVIC[’O ‘Ntontero] 5,5 Miezu zifo (voto) mancante pecché è ffesso e sfurtunato: ‘e nassie (attaccanti)sguizzere nun lle detteno penziere, ma fove saciccio ‘e fà ‘a frittata facennose siscà contro ‘nu ricore [ca  overamente  nun ce steva ma ca ll’arbitro siscaje e nnun ll’êsse pututo fà   si isso fósse stato cchiú llesto a levà ‘a mana!  
 KOULIBALY[‘O Ggialante] 7  Atalossa (prestazione) sostanziosa e antraffa (partita) troppo senza prubvblema p’uno cumme a isso ca fove sempe  attiento e ssicuro e ‘nu paro ‘e vote se facette vedé dint’â muntaca (area di rigore) sguizzera addó sfresaje  ll’addaffa (rete) ‘e capa.  
 GHOULAM 6  Durante ô primmo ajone (tempo) fove ferdachiello  (intraprendente), adduanío (aggressivo) e ccu ‘o pere caudo... po se ne s ennette ‘e posa e ‘o Jancone lle spagnaje ll’uredmu quarto d’ora. [ô 76' LUPERTO 6.  Trasette pe ppoco, ma facette ‘o duvere suojo senza farese nutà.]
 CALLEJON[Peppe ‘a ‘nguenta ] 7 Atalossa mumazza (prestazione ottima ) d’’o spagnuolo ca nun sulo mettette ‘a firma sott’â siconna addaffa (rete) cu ‘nu tiro ‘e dritta ‘e primma ‘ntenziona, ma currette pure pe nnuvanta minute e cchiú e stataffaje (proppiziò) ‘o tre a zzero ‘e Zielinski cu una ‘e ll’arnabbasse (discese) soje.
ALLAN 6-  Strignette ‘e diente e ffacette ‘o ssuĵo pure si nun fove ancòra ‘ncundizziona e sse vedette.Tutto summato facette unu sfregazzo (sbavatura) senza cunsequenzie.
[dô 59'  DIAWARA 6  Se  piazzaje ‘mmiez’ô campo dànno sustanza â sezziona (reparto) senza esaggerà.]
RUIZ[Anema Longa] 6,5  Presenzia custante ‘mmie4z’ô campo jucanno  quase sempe cu ttanziffa (pulizia)e ffacette cose semprice, ma fatte bbone. Po’ saglí ancòra! in maniera pulita. Fa le cose semplici e le fa bene.
Piotr ZIELINSKI 7,5  Fove ‘o meglio d’’o mazzo, nun sulo  cu n’atalossa (prestazione) quase matàla (perfetta) fatta d’istiglie a mmestiere e ‘nzertamiente (inserimenti) uffenzive periculuse, ma se levaje pure ‘o sfizzio ‘e signà cu ‘nu nummero d’auta scola..
 MILIK[Sant’Arcadio] 6,5  Nun signaje, ma facette signà avventannose cumme a ‘nu falcone ‘ncopp’a ‘nu pallone cuntrullato malamente dô purtiere  Brecher e rialannolo a Llorenzigno ca a pporta vacante ll’êtt’’a mettere sulo ‘nufunn’ô sacco; p’’o riesto se muvette e ccurrete assaje cupulianno (dialogando) cu ‘e cumpagne.
 INSIGNE[Lorenzigno] 6,5  Primma atalossa (prestazione) cu ‘a fascia ‘e capitano doppo ll’addio ‘e Marekiaro e ffove pusitiva nun sulo pecché sbluccaje a ll’11’ ‘o nattija  (risultato) cu ll’affaffa (rete) ca v’aggiu ditto, ma pure pecché jucaje assaje bbuono ‘nfra ê linie, senza ca chille d’’o Zzurigo ‘o riuscesseno a ffermà.  [dô 68' OUNAS 6   Trasette bbuono ‘int’ô sibbacco (match) e ppoco mancaje ca nun signasse ‘o quatto a uno.Peccato! ]
All.: ANCELOTTI[‘O Jancone ] 7  Festiggiaje cumme vuleva ll’estreja (l'esordio) dint’â Cuppetta airupea vincenno doppo n’atalossa (prestazione) murriffa (sontuosa) spurcata sulo da ll’arastarca (rilassamento) ‘e ll’urdemi minute. Cumplessivamente ‘a scuatra soja cumfermaje ca overo po’arrivà â cunquista d’’o trufeo.
E mmo fermammoce cca; dicimmo ca  ajeressera se fósse purtuto vencere meglio, ma cuntentammoce senza cercà ‘o pilo ‘int’a ll’uovo. Turnammo a pparlà d’’o campiunato: dummeneca ca vène ce vene a ttruvà Mazzarri cu ‘o Turino  e vvoglio sperà ca ce facimmo rispettà vincenno. Po, si ‘o Cielo ‘o vvo’ ve ne parlo llunnerí ca vène. Staveti bbe’! R.Bracale Brak

Nessun commento: