SASSUOLO – NAPOLI (10.3.19) 1 a 1 ‘A VEDETTE ACCUSSÍ

SASSUOLO – NAPOLI (10.3.19) 1 a 1

‘A VEDETTE ACCUSSÍ

No guagliú accussí nun po’ gghí!N’ata delusiona ajere all’ora d’’e ppastarelle quanno ‘o Ciuccio jette ô Mapei ‘e Reggio Emiglia p’’a tarra (sfida) cu ‘o Sassuolo  e ‘ntribbuna-divano ce penzajemo tutte ca se fósse jute a dd’affurzà (vincere) [nun tanto pe ttené ‘o passo d’’a vecchia zoccola,dàtose ca ‘ncopp’ô primmo posto da paricchio nce avimmo miso ‘nu crucione e oramaje chi se ne fótte..., quanto pe ddifennere ‘o siconno posto tenennoce luntano dê mmilanese ca a mmazzo, ‘e riffe o ‘e raffe cuntinuano a mmetterse tre ppunte ‘int’â sacca...] addó ca ‘mmece a stiente riuscettemo a recogliere ‘nu punticiello, chillo ‘e ‘nu russimmo (pareggio) scartellato e scamuso pe gghionta ‘e ruotolo cuoveto p’’e capille a ll’86’ quanno, finalmente!, Lorenzigno facette ‘nu píreto viuletto e ddoppo paricchiu tiempo turnaje a vvedé ‘a porta signanno ll’addaffa (rete)  ‘e ll’ uno a uno. E menu male! Dicimmo chiaramente e súbbeto ca cchiú ‘e chello ‘o Napule nun se mmeretaje e ppe cchello ca ce facette vedé pe tutt’ ‘a mubbara (partita) overamente brutta cu ‘nu Napule ca nsi’ ô   51’ nun fove crestiano ‘e fà manco ‘o cellechio a Ppegolo e ppirciò nun ce facettemo maraviglia si ô 52’ succedette ‘o llutto e Bberardi apprufittanno ‘e chello ca meno t’aspiette: ‘na fessaria d’’o ‘Ncrifato [ca sotto porta nosta] ‘mmece ‘e mannà ‘a palla ‘ncurva cu ‘nu caucio fremmo, ‘accarezzaje quase e l’artidaddo (rimpallo) ce custaje caro visto ca Berardi lassato sulo s’avventaje e ffuttette da duje passe a Ppastacriscuta... E che vve credite ca cagnasse ‘a solfa i ‘o Napule abbiasse a ffà ‘o Napule? Addó?! Chi v’’o ddà?! ‘O Ciuccio cuntinuaje a dd’ aizà porvera pe tutta ll’arrancua (ripresa) cchiú brutta d’’o primmo ajone (primo tempo)... ca ggià era stato brutt e e menu male ca po a ll’86’ Lorenzigno riuscette a rrussimà (pareggiare) cu ‘nu bbellu tiro a ggiro apprufittanno ‘e ‘nu jabbro (cross) ‘e  Ghoulam(me) cuntrullato malamente da Manganelli. Po nun ce fove cchiú storia e rriuscettemo a ppurtarece â casa allimmeno ‘nu gramo punticiello. Acqua ca nun leva aràlica (sete). Passammo ê ppaggelle:

OSPINA[Pastacrisciuta] 6  Una vota êtt’’a spurcarese ‘e guante ascenno ‘e punio; p’’o riesto ‘e nassie (attaccanti) d’’o Sassuolo nun ‘o détteno che ffà, ma   nun ce putette fà niente ‘ncopp’a ll’addaffa (rete) ‘e Berardi ca tiraje troppo da vicino. 

MALCUIT[‘O Tignuto] 6   Pure si arreto Rogerio fove n’accunto scommeto, isso tentaje ‘e sfunnà ‘ncopp’â ferza ‘e dritta, ma lle mancaje ‘o ‘ncaddo (soccorso) d’Ounas(se) ca nun le libberaje spazzio. Peccato.

CHIRICHES[‘O Vampiro] 6  Ce mettette ‘nu poco ‘e tiempo pe ppiglià ‘e mmesure  ‘e Boga, ma po lle mettette ‘a musarola. Nun saccio pecché ‘o Jancone ‘o facette ascí ô 45’. [Dô 46′ LUPERTO 5,5  Miezu zifo (voto) mancante pecché êsse avuto cuntrullà a  Bberardi e nnun ‘o facette permettenolo ‘e  signà cu n’aristidaffa (tap-in) da duje passe !]

KOULIBALY[‘O Ggialante] 6,5 ‘O solitu muraglione sempe cu ll’uocchie apierte i ‘a coscia pronta. Nun ce vuleva proprio  ca ggioverí n’âmm’’a fà a mmeno a Ssalisburgo!

GHOULAM 6  ‘Ncopp’â ferza ‘e mancina  fove poco periculuso datose ca nunn’ è ancòra a ll’arriba (al top) e sse vedette.... però dô pere sujo partette ‘o jabbro (cross) miso a ffrutto da Lorenzigno. 

DIAWARA 5,5 Miezu zifo (voto) mancante pecché nun tenette ficre (idee) pe tajennà (impostare) a mmestiere e  ‘nchietta cu ‘o ‘Ncrifato nun riuscette a ffà vedé chelloca sape fà jennose ‘ncopp’ê piere ll’uno cu ll’ato. ‘E bbuono ca sfresaje (sfiorò) ll’addaffa (rete) cu ‘na cunchiusiona periculosa ca ‘mpignaje a Pegolo. Troppo poco!

ALLAN [‘O ‘Ncrifato] 5,5 Me dispiace, ma ll’aggi’’a mettere miezu zifo (voto) mancante pecché sí luttaje secutanno cchiú ‘e ‘nu jucatore avverzario, ma nun fove troppo mascullo (lucido) cu ‘o juoco suojo e ppo facette chella fessaria ca ce custaje cara: vuó vedé ca lle mancaje ‘a cumpagnia ‘e Anema longa?  

VERDI 5 ‘Nu zifo (voto) mancante e nnun le levo stima. Ce iachibbaje (deluse) zampettanno a vvacante e cquanno lle capitaje ‘na granna accasiona ‘a sprecaje tiranno auto. [dô 66′ MILIK[Sant’Arcadio] 6  Trasuto troppo tarde pruvaje a ffà coccosa p’adderezzà ‘a varca, ma ll’addibbarro (ariete) nuosto nun fove maje cercato e sservuto dê suoje!]

OUNAS 5,5  Me dispiace, ma pure a isso miezu zifo (voto) mancante pecché sí currette, scattaje, zumpanno ll’avverzarie, ma sempe senza zuco e ccunnimma sbaglianno sempe  a dd’ ittarrà (scegliere) chello ‘a fà!  [dô 66′ YOUNES[‘O Mmerecato] 5,5 Pure a isso miezu zifo (voto) mancante pecché turnato doppo tanti mise ‘ncampo pe ccercà quacche bbona, sustanziosa, jucata... se vedette ca lle manca ancòra ‘a cundizziona e nnun ne cacciaje ‘o riesto ‘e  niente!]

INSIGNE[Lorenzigno] 6,5  Me fósse piaciuto metterle ‘e cchiú, ma fora d’’o stuco (gol) cac a ll’86’ ce dètte ‘o russimmo (pareggio) ‘o capitano nun facette ato. Troppo poco pe cchello ca po’ ffà!

 MERTENS[Ciruzzo] 5  Me dispiace assaje ma tanto se mmereta pecché ce iachibbaje (deluse) e ce dette ‘a ‘mpressione ca nun sape cchiú ssignà visto ca durante ô primm’ajone (primo tempo), arrivato annate a Ppegolo se facette levà ‘a palla dô pere  da Demiral(le) ca ‘o secutava. P’’o riesto nun facette niente ‘e che pe ffarese nutà! E cche saciccio!

ANCELOTTI[‘O Jancone ] 5  No, no, nun ne ncarraje nisciuna ajere tenenno fora dô primmo minuto a Ssant’Arcadio e ffacennolo trasí troppo tarde e mmannanno ‘ncampo a Ounas(se) e Vverdica nun cunchiudetteno ‘nu saciccio sprecanno bboni accasione.Sbagliaje pure a ffà trasí ‘o Mmerecato ca ca lle manca ancòra ‘a cundizziona Forze ‘o Jancone steva cu ‘a capa ggià  a Ssalisburgo.

Arb. MANGANIELLO5 Grossi ffetenzie nun ce ne facette, ma spisso, arbitraje cu ll’uocchie nchiuse, caputajanno carí (falli) ‘ndanno d’’o Napule.

Cunchiudimmola cca e ddicimmo ca ajere  ‘o Napule êv’’a fà ‘a prova ggenerale d’’a tarra (sfida)cu ‘o Salisburgo â casa lloro e ppruvà ‘a chietta Vampiro e Luperto i a ll’rdemu riuscettemo a ppurtarce â casa ‘nu punticiello; poca rrobba, ma meglio ‘e ‘nu caucio ‘int’ê rine!   E bbasta accussí  cuntentammoce   ‘e cumme jette ajere scanzanno ‘o fuosso ‘e n’azzimma (sconfitta)    e mmettimmoce cu ‘a capa ggià  a ggioverí ca véne quanno   se va a Salisbburgo  pe ppassà ‘o turno d’’a cuppetta airupea forte d’’o tre a zzero ‘e ggioverí passato; i’ ce crero e ssi Ddi’ vo’ ve ne parlo viernarí ca vène.

Staveti bbe’! R.Bracale Brak