NAPOLI - INTER (6/01/20) 1 A 3 ‘A VEDETTE ACCUSSÍ

NAPOLI -  INTER (6/01/20) 1 A 3

‘A VEDETTE ACCUSSÍ

Quantu ccravone ca ce purtaje ajeressera ô san Paolo ‘a bbifana, guagliú e cche scutuliata ch’avettemo! E mmo ce vulimmo piglià collera? No nun ne vale ‘a pena: tanto è ‘na sciaccata, tant’è ‘nu cauce dint’ê rine. I’ so’ muiddo (tifoso) sí, ma nun me fruscio, nun me  faccio vajumme (illusioni) e ggià da paricchio êvo capito ca ‘sta caracuddamma (stagiona) jeva a ffení a vvrenna e ca cchiú d’’o sesto posto ‘ncrassifica nunn’êssemo recugliute; p’’o mumento stammo fremme a ll’uttavo e se sapeva ca nun se puteva accummincià a ssaglí jucanno contr’ô Bbiscione, ca cumm’infatte ajeressera ce scummaje ‘e sanco pe ttre a uno apprufittanno [e cchesto sí ca me fa piglià collera…] ‘e tre fessarie d’’e nuoste: ‘a primma ô 14’ quanno Di Lorenzo pigliaje ‘nu sciuliamazzo a mmità campo, perdette ‘a palla e mmaccarone ‘e casa, ‘mmece ‘e pigliarla cu ‘e mmane ‘a lassaje a Lukaku  ca s’’a pigliaje e gghiette a ssignà. Piezzo e ppejo facette ‘o Lungagnone diciannove minute doppo quanno pe ffermà ‘na straccarellata ‘e Lukaku, ‘mmece ‘e menarse ‘nterra pe ffermarla cu ‘o pietto, cu ‘o stommaco, cu ‘a panza o cu ‘o sospenzorio, tentaje  ‘e farlo cu ‘e mmane, ma nun trattenette ‘o pallone ca lle passaje ‘mmiez’ê ccosce e trasette ‘mporta; ‘a terza smaccaría fove chella ‘e Chitelassa ca ô 62’ tentaje ‘e levà ‘a palla a Lautaro, ma ‘o ffacette trasenno scuonceco e ‘mmece ‘e ce ‘a levà, ce ll’accunciaje. Putite capí pirciò cu ttanti fessarie d’’a trasera (difesa) nun se putette accummincià da ajere ll’arrialla (rimonta) d’’o Ciuccio e ppenzo ca se ne parla a ffevraro pecché pure ‘e mmubbare (partite) ca ce aspettano [Lazio, Fiorentina e vvecchia zoccola] ‘e vveco toste; che ce vulite fà: ‘o Palazzo ce urganizzaje ‘nu calannario cu ssette parme ‘e saciccio. Pacienza.

Passammo ê ppaggelle: 

MERET[‘O Lungagnone] 4 Serata no d’’o guardaporta nuosto. Nun le pozzo perdunà chella granna puttanata ca v’aggiu cuntato ca scumbinaje ògne pruggetto cuano (azzurro), pe nnun parlà ‘e tanti catte (errori) fatte cu ‘e piere.

 HYSAJ[Meza Cucchiara] 6  è overo ca ‘o  Napule  daffaje (spinse) poco e nniente a ddritta, ma a ll’epata  (in fase) difenziva, tutto summato fove ‘o meglio d’’a linia... E nnun ssaccio si mme spieco! [Da ll’81’  LOZANO – sv]

 MANOLAS[Chitelassa] 4,5  Se purtaje ‘ncopp’â cuscienza ‘a terza addaffa (rete) d’’a scuatra ‘e Conte, trasenno  a vvienetenne ‘ncopp’a ‘na palla pe Llautaro, cosa ca ce cundannaje definitivame quanno pareva ca ‘o Napule putesse russimà(pareggiare).Che peccato!

 DI LORENZO 4  Tanto se mmereta asasa (soprattutto) p’’a mancanza ‘e cazzimma doppo d’’o sciuliamazzo pigliato!Gattuso, ‘o mannaje a ffà ‘o marcazzio  (centrale), ma cu Llukaku,sufferette assaje pe ttutto ‘o sibbacco (match) e nce refunnette ‘e ppenne.

Mario RUI 4,5  Crediteme nun ne  mettette ‘mmiezo una, manco pe ccatto (sbaglio) E cche saciccio!

ALLAN[‘O ‘Ncrifato] 6,5  Se facette apprezzà asasa (soprattutto) ‘mmiz’ô campo ‘nchiudenno tanti pertuse e ccercanno ‘e daffà (spingere).

 RUIZ[Anema Longa] 4,5  Serata no. Nun truvaje maje ‘a mimmadda (imbucata) justa e sbagliaje troppi pasiglie (passaggi) Che peccato! Nervuso, nun me piacette chella pallunata ca lanzaje verz’â panca d’’a Bbisciona.[Da ll’84’  LLORENTE [‘O Spetaccuso] sv.]

ZIELINSKI 7 Tutto summato fove ‘o meglio d’’e nuoste, prutacunista ‘e ‘na bbella mubbara (partita) cu ttanti gghiucate ‘mmiez’ô campo e ddô pere suĵo partette ‘a palla ca addivintaje ll’addaffa (rete) luvarda (azzurra).

 CALLEJON[Peppe ‘a ‘nguenta] 6,5  Jucatore ‘nteliggente e ppriciso, se chiammaje ll’applavuso cu cchillu muvimento straurdinario ca lle cunzentette ‘e mettere palla ‘mmiezo pe sant’Arcadio ca ‘a sfruttaje a mmestiere.

 MILIK[Sant’Arcadio] 6 Nun le pozzo mettere ‘e cchiú pecché si è overo ca se facette truvà ô posto justo, ô mumento justo pe signà e ccumplessivamente se dette da fà pe ttutt’’o sibbacco (match), nun riuscette a sfruttà ‘nu paro ‘e cabbesere (colpi di testa) durante ô primmo ajone.  Peccato.

INSIGNE[Lorenzigno] 4,5  E ll’aggiu trattato. Aizaje troppa porvera, nun cunchiudenno ‘nu saciccio pure si ‘e cumpagne ‘o cercajeno assaje;’ncopp’ô zzero a zzero sprecaje ‘na granna accasione: avesse signato forze ‘e ccose se mettevano ‘e n’ata manera.

all. GATTUSO 6  Facette chello ca puteva fà e nnun fove itimma (colpa) soja si tre gghiucature facetteno tre pputtanate grosse assaje.

arb. DOVERI 6 Facette ‘o duvere suĵo.O allimmeno chesto me parette.

A ‘stu punto abbelute ma no scunfurtate pecché abbuscanno cu ‘a Bbisciona nun âmmu fatto ‘nu rialo â vecchia zoccola, facimmo punto cca.

Mo, si ‘o Cielo ‘o vvo’ ce sentimmo pe ddummeneca ca vene doppo d’’o sibbacco (match) ca ‘o Napule ‘mmerz’ê sseje ‘e sapato unnece va a gghiucà a Rroma contr’â scuatra d’’o pappavallo ‘e Lotito, speranno ‘e nun turnà cu ‘na vranca ‘e mosche ‘mmano. Staveti bbe’. R.Bracale Brak