MURZELLE ‘E PREVETE

MURZELLE ‘E PREVETE

Chello ca serve pe 6 perzone:
12 uova
200 gramme  ‘e prusutto cruro tagliato a vvarriglie  (listarelle)  ‘e centimetre 5x3x2,

200 gramme ‘e casocavallo pudolico  tagliato a vvarriglie  (listarelle)  ‘e centimetre 5x3x2,

sauza ‘e  pummarola   

(priparata cu ‘nu bicchiere d'uoglio ‘aulive dunciglio,

‘na  cepolla ndurata ‘e Muntoro ammunnata e ntretata fina fina, miezu kilò ‘e pummarole  fresche Roma o San Marzano, lavate, àrvate,  spellate  e ffatte a ffarinule grosse, oppure ‘na bbuatta ‘e miezu kilò ‘e pummarole spellate),
‘Nu spiculo d’aglio ammunnato e ntretato,

‘na fraschetella  ‘e peperna lavata, asciuttata e ntretata fina fina,

50 gramme ‘e caso pecurino  rattato,

sale fino e ppepe niro macenato a ffrisco q.n.s. ,

‘nu bicchiere  d’uoglio pe ffrijere

comme se fa:
Arapí ll’ova dinto a ‘na zupperella,agnadí sale,pepe niro macenato a ffrisco e ttutto ‘o ccaso e sbattere pe paricchiu tiempo. Ricà poco pe vvota ll’uoglio pe ffrijere dint’ a ‘na tielloccia, farlo callentà e servennose ‘e ll’va sbattute fà tanti suttile filosce gruosse comm’ ô plinto d’ ‘a tielloccia.
Mettere ‘ncopp’ a ògne filusciello tre o quatto varriglie ‘e presutto e tre o quatto varriglie ‘e pruvulone; cummiglià ògni filusciello cu n’atu filusciello e fermarle cu dduje steccadente.  Sistimà chesti murzelle una vicina a ll’ata  dinto a ‘na cummedità, bbona p’ ‘o tiesto,auntata cu ‘nu poco ‘e sarza ‘e pummarola,agnadí pe coppa ata sarza e
mannà pe diece minute dint’ô tiesto caudo(180°). Fà raffreddà e serví ‘ntavula comme trasetura ‘nzieme a ppiezze ‘e latticine frisce.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e aggarbbatéve ‘o vernecale!!

Raffaele Bracale