PATANE E CCARCIOFFOLE

PATANE E CCARCIOFFOLE

chello ca serve pe sseje perzone

10 carciofffole cu ‘a spina, verde-viulette napulitane,

‘nu kilò  ‘e  patane a ppasta jalizza  (gialla) ,

 ‘nu spiculo  d’aglio ammunnato e ntretato finu fino,

 ‘nu puparunciello percante  (piccante) senza streppone e ‘ntaccato p ‘ ‘o lluongo senza spàrterlo,

‘o zuco ‘e ‘nu limone,

 ‘nu  farinulo (dado) pe  broro veggetale squagliato  (disciolto) dint’ a ‘nu tazzone  d’acqua vullente,

miezu bicchiere ‘e  vino janco asciutto,

menta ntritata q.n.s.,
‘nu bicchiere d’ uoglio ‘auliva dunciglio  (e.v.p.s.a f.)

     Sale fino  q.n.s. 

comme se fa

Pulezzà ‘e carcioffole scartanno ‘e ffronne cchiú ttoste, arrefilanno ‘o culo e  ‘o mastillo  (gambo) truncato a n’ardezza ‘e  seje centimetre cm.; scumpàrtere a ddoje ògne carcioffola tagliannola p’ ‘o lluongo, scartà  ‘a "varva" ‘e dinto e scumpàrtere (dividere) ancóra a ddoje  ‘e mmeze carcioffole uttenenno p’ognuna quatto spicule; sciacquarle dinto a  acqua fredda ammiscata cu ‘o zuco ‘e ‘nu limone e ndrenarle (sgrondarli).
Ricà (versare) ll'uoglio  dint’ a ‘na prupurziunata cummedità pruvvista ‘e cupierchio  e farve piglià culore, a ffuoco  miccio ô trigliato d’aglio; agnadí ‘e spicule ‘e carcioffole, ‘a menta e ‘o puparunciello e stumpà  (sfumare) cu ‘o vino janco.’Ncuperchià e tené a ffuoco miccio pe ‘nu quarto d’ora; fraditanto ammunnà ‘e carcioffole, tagliarle a ffarinule, sciacquarle, ndrenarle e aunirle ê carcoffole ‘nfunnennole cu ‘nu tazzone  d’acqua vullente addó è stato squagliato ‘na farinula pe bbroro veggetale;aumentà ‘nu poco ‘o ffuoco e sempe a cummedità ‘ncuperchiata fà cocere pe scarza mez’ora ammiscanno spisso. â fine accuncià ‘e sale e ppepe;’na vota stutato ‘o ffuoco ammiscà dellicatamente  e serví súbbeto o comme trasetura cauda   o comme cuntorno ‘e carna mmugliata  (in umido)  o ‘e latticine frische.

Chesta sabrosa ricetta po’  essere ausata pure comme primmu piatto aumentanno ‘nu poco ‘e cquantità.

Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e aggarbbatéve ‘o vernecale!!

Raffaele Bracale