NAPOLI - INTER (C.I.13.6.20) 1 A 1 ‘A VEDETTE ACCUSSÍ

NAPOLI - INTER (C.I.13.6.20) 1 A 1

‘A VEDETTE ACCUSSÍ

 P’’o mumento guagliú canta Napule ca ajeressera ô san Paolo, a pporte nchiuse, pure si sulamente russimanno (pareggiando) p’uno a uno contr’â Bbisciona cunquistaje ‘a finala ‘e coppa itaglia da jucà miercurí ca vene contr’â vecchia zoccola  Cumme ce aspettavemo   ‘a mubbara (partita) fove cumplicata asasa (soprattutto) sott’ô prufilo d’’o jasaddo (fisico) cu ‘nu Napule ca pe cquase tutt’’o primmo ajone (primo tempo sufferette ‘e ggherre (incursioni) d’’a Bbisciona, repigliannose sulo doppo d’’o russimmo (pareggio). ‘Nzomma cumme jette e ccumme venette  cert’è ca ‘o Napule cavuio (forte) d’avé affuzzato (vinto) a Mmilano p’uno a zzero se jette a ccunquistà ‘a finala contr’â vecchia zoccola.E pp’’o mumento ce avasta. Passammo ê ppaggelle:

OSPINA[Pastacrisciuta] 7,5: ‘Nu poco pe bbia d’’o tturreno ‘nfuso, ‘nu poco, pe ddoje meze fessarie ‘e Di Lorenzo smarrunaje ô terzo minuto, facennose fottere ‘ncopp’ô tiro ‘e squina, ma po se taclissaje (si riscattò) cu ttre pparate dicisive e vv’ ‘o pponno dicere  Lukaku, Candreva i Erkisen(ne). Ma ce facette alliccà ‘e bbaffe a nnujeaute ‘ntribbuna-divano [arricurdannoce a Rreina] quanno ô 40’ facette ‘e pere ‘nu lanzo ‘e quaranta metre dànno ‘a palla justa a Insigne ca ‘a sfruttaje a dduvere mettennola ‘ncopp’ê piere ‘e Ciruzzo ca ‘a depositaje ‘mporta. ‘Nzomma levanno e mmetteno a ccunte fatte Pastacrisciuta fove ‘o prutacunista d’’a serata. Peccato pe cchella ‘nfamità ca lle facette Rocchi  cu cchillu cartellino jalizzo sballato ca lle dette  pe nnun ‘o fa jucà ‘a finale ‘e miercurí ca vene.   L

DI LORENZO 5,5:  Custretto a ffà ‘e straurdinarie lla ddereto jette subbeto ‘int’ê cchiavette cu cchiú ‘e ‘na fessaria. Che peccato!

MAKSIMOVIC [‘O ‘Ntontero] 6,5: Ajeressera ce piacette: ‘e capa nun ne sbagliaje una, mettenno ‘a musarola a cchi capitaje ‘e ll’attacco avverzario.

KOULIBALY[‘O Ggialante] 6,5: Turnato ‘ncampo doppo seje mise se facette rispettà mettennoce forza, anema  e ccuraggio.

HYSAJ[Mezacucchiara] 5,5: Miezu zifo (voto) mancante pecché troppo spisso Candreva lle scappaje e nnun putette farese vedé annante.

Elmas[‘O Turco] 6: Nun se nutaje troppo , ma tutto summato  se sentette asasa (soprattutto cu ‘nu miezu  miracolo ‘ncopp’a  Ccandreva  ‘int’â primma mez’ora.[dô 64′ Fabian[Anemalonga] 6:  Trasette e se facette súbbeto apprezzà pe ccumme  sparigliaje a ccentro ‘e campo.]

DEMME 5: ‘Nu zifo (voto) mancante pecché m’aspettavo ‘e cchiú; infatte durante ô primmo ajone (primo tempo) nun se vedette quase e mmanco a ll’arrancua se facette nutà. Che peccato.

ZIELINSKI 5,5: Miezu  zifo (voto) mancante pecché ce pruvaje sulamente senza maje essere periculuso e ssenza farse  overamente sentere ‘int’â munavara (manovra di gioco).[da ll’ 84′ ALLAN[‘O Ncrifato]: sv]

POLITANO 5: Nu zifo (voto) mancante pure a isso  pecché s’emuzziunaje a gghiucà contr’â Bbisciona e nnun riuscette a ‘nciarmà manco n’accasiona decente p’essere ricurdato. [dô 64′ CALLEJON[Peppe ‘a ‘nguenta] 6: Se ‘ncignaje ‘nu paro ‘e bbaffette ricuperaje quacche ppallone facennose nutà ‘ncopp’â curzia, ma nun facette ato].

MERTENS[Ciruzzo] 7,5: ‘O tiempo ‘e scarfarese e cquanno ‘o Napule se decidette a ffà coccosa se facette nutà cu ‘nu paro d’accasione e asasa soprattutto nun mancaje ô 41’  all’appuntamento cu chillu pallone ca Insigne lle mettette dint’â ‘na guantiera e isso sfruttaje a dduvere signanno e ppunenno ‘o Napule ‘ncarriggiata.Ll’addaffa lle permettette ‘e surpassà Marekiaro, risultanno ‘o meglio ‘int’â lista d’’e nassíe (goleador) cuane (azzurre) Ma. [dô 74′ MILIK[Sant’Arcadio] 6: Trasette quanno ‘o Napule se steva defennenno e pperò cercaje ‘e fà ‘o ssuĵo annante cumbattenno  cu ccuraggio.]

INSIGNE 7:  S’’o mmereta no pecché êsse fatto ‘e straurdinare ‘nnattacco, ma pecché dimustraje ‘e tené ‘na granna ‘ntesa cu Cciruzzo quanno lle dette ‘ncopp’a ‘na guantiera ‘a palla d’’o russimo (pareggio). N’applavuso a pparte pe ccumme recugliette ‘o lanzo ‘e Pastacrisciuta [pruvato allenannose] e ppe ccumme s’’o purtaje annante. [da ll 84′ YOUNES[‘O Mmerecato]: sv]

 All. GATTUSO 7 ‘o  Napule visto ajeressera  nul sulo fove  carimmo (generoso), ma pure cu ’a capa ‘ncapa, cosa arzabba (difficile) asasa (soprattutto) jucanno senza muidde (tifosi) ‘ncopp’ê mitrasse (spalti) e ccu n’addaffa pigliata a ffriddo; n’ata scuatra êsse sbracato e nnunn’êsse quagliato, ma ‘e guagliune ‘e Ringhio no! Lassajeno â bbisciona quase tutto ‘o primmo ajone (primo tempo) sí,  ma po doppo ‘o russimmo (pareggio) cuoveto ô 41’ se scurciajeno ‘e mmaneche e ccu n’arrancua ‘e sustanza purtajeno ‘mpuorto ‘a varca cunquistanno ‘o passaggio â finale ‘e miercurí ca vene e  mmo putimmo dicere ca  doppo tre mmise e miezo ‘e casserra (pausa)  ‘a squatra nosta à cagnato faccia i asasa (soprattutto) à cacciato  ll’arzamme (gli attributi)! E sse n’à dda ringrazzià a Rringhio.

arb. ROCCHI 5  Pigliaje cchiú ‘e ‘nu zzarro, ma grossi fetenzie nun ce ne facette, però  ‘nu paro  sí, ‘mprimmose quanno sparagnaje ‘o siconno cartellino jalizzo e ppirciò chillu russo  a cchella crapa ‘e Young(o) ca, ggià tocallummato (ammonito) facette ‘na trasuta cchiú ddisgrazziata d’isso arrunzanno a Ppolitano, senza ca ll’ucummo (arbitro)  facesse ‘na chieja; ‘a siconna fetenzia  fove chillu cartellino jalizzo sballato dato a Ppastacrisciuta iattico (diffidato)  pe nnun ‘o fa jucà ‘a finale ‘e miercurí ca vene.

E FFERMAMMOCE CCA. Ve saluto e ssi ‘o Cielo ‘o vvo’ ce sentimmo ggioverí ca vene pe ccuntarve cumme è gghiuta a ffení ‘a finala contr’â vecchia zoccola, sempe speranno ca nun ce fanno ‘a soccia ‘nfamità ca ce facetteno a Ppichino.

Staveti bbe’.

R.Bracale Brak