NAPOLI -TORINO [17/10/21]1 A 0 ‘A VEDETTE ACCUSSÍ

 

 

NAPOLI -TORINO [17/10/21]1 A 0

‘A VEDETTE ACCUSSÍ

Canta Napule guagliú! ‘Nu Napule ‘ncopp’ô cerasiello ca nun se ferma cchiú e ajere mmerz’ê sseje ô Maradona affuzzaje (vinse) pure ll’uttava mubbara (partita) cunzecutiva ‘ncampiunato e sse turnaje a ppiglià ‘o primmo posto ‘ncrassifica, mettenno sotto ‘e cranate d’’o Toro ‘e Juric(cio)doppo ‘nu sibbacco tirato, ccumplicato e scamuso, cunnito da ‘nu ricore sbagliato dô capitano nuosto, n’addaffa (una rete) aramarrata (annullata) a Di Lorenzo pe bbia ca nun s’era tagliato ll’ógne d’’e piere i ‘e tteneva [o allimmeno accussí dicette ‘a var(ra…] ‘nnattasallulo (in fuori gioco)..e da ‘nu sfurtunato palo ‘e Lozano e finalmente a ll’uttantunesimo fove Caromecosta a ttirà ‘o capo ‘nterra  saglienno ‘ncielo pe mmannà ‘mporta ‘o pallone cu ‘na tacatarrassa (colpo di testa) addummenata (imperiosa)da ‘ncurnicià, ca ce facette mettere tre ppunte dint’â sacca â faccia ‘e Juric(cio), d’’a vecchia zoccola, d’’e ddoje milanese e dde chi ce vo’ male… ca, crediteme nun so’ ppoche!

Passammo ê ppaggelle:

OSPINA [Ecchesepastacrisciuta] 7.5 Nunn êtt’’a faticà assaje, ma quanno ‘o ffacette se chiammaje ll’applavuse:ô primmo ajone (nel primo tempo),rispunnette cu ‘na bbona parata a ‘nu tentativo da luntano ‘e Brekalo e misemo (addirittura) facette, a ll’arrancua (nella ripresa)’ncopp’ô zzero a zzero ‘nu miraculo cu ‘nu taccullo (intervento) ‘nterra  stuppanno ‘nu tiro ‘e Brekalo e mantenenno ‘a porta acrata (inviolata). Applavuse!!

 

 DI LORENZO 6,5   Atalossa mumazza (prestazione ottima)  mo arreto, mo annante sempe cu ccegna (grinta) e cqualita, signaje pure, ma ‘a var(ra) dicette ‘e no. S’à dda taglià cchiú spisso ll’ógne d’’e piere!

 KOULIBALY 6,5 Arreto jucaje ‘na mubbara (partita) sustanziosa facenno aculla (muraglia) cu cchi capitaje; annante avette ‘na bbona accasione, ma nun truvaje ‘o murra (specchio) d’’a porta. Peccato!

 RRHAMANI 6,5 Liggette bbuono ògne situazziona  cu chiusure precise e senza sfregazze (sbavature).

 RUI 6  Se ll’êtte ‘a vedé cu chillu mammuoccelo ‘e  Singo e sufferette, ma nun s’arrennette. Cumplimente p’’o missiddo (assist) a Di Lorenzo p’’o stuco aramarrato (gol  annullato).

Fabian RUIZ[Anenalonga] 6 – Nun facette granni ghiucate ma riuscette a ccummanà ll’ajune (tempi) ‘e munavara (manovra).

 ANGUISSA[‘O ‘Ntussecuso] 6,5  Nunn’è cchiú ‘na surpresa; Ancòra n’atalossa ‘e mistaua (prestazione di livello): nun è sulo tuosto, ma tène pure perzunalità e sse vedette.

 ZIELINSKI 5,5  Se vedette poco e ffacette meno ‘e chello ch’êsse avut’’a fà. Peccato. [Dô 71’  ELMAS[‘O Turco] 6  Riuscette misemo (addirittura) ‘e prozo a cunfezzionà ’o missiddo (assist) pe Ccaromecosta dint’ô mumento [81’] d’’o ‘ncasinato  tozzi-tozzo  generale ‘int’â muntaca (area di rigore) cranata.Nun ce pigliammo p’’o naso: quanno serve  pure ‘a furtuna ce vo’!]

 

 POLITANO 5,5 Poca rrobba; nun fove capace ‘e farese nutà o apprezzà.[Dô 59’  LOZANO 6 Sfurtunato, cugliette ‘nu palo e s’’a pigliaje quanno Spalletti s’’o chiammaje ‘mpanca pe ffà trasí’nu madaffio (difensore). [Da ll’89’  JESUS s.z.]

 

 OSIMHEN 8   Asasa (soprattutto)pe ll’addaffa (rete ca a ll’81’ ce levaje ‘e ccastagne dô ffuoco, pecché p’’o riesto ll’atalossa (prestazione) soja fove cundiziunata da Bremer(re) ca spisso ‘o mettette ‘a musarola. Però ll’âmm’a dicere: grazzie!

 

 INSIGNE 4,5  Che delusione!Nun me dicite niente,ma nun lle pozzo perdunà d’avé falluto ‘o terzo ricore d’’a caracuddamma…(stagione). [Dô 71’  MERTENS[Ciruzzo] 6,5  A ll’81’ pur’isso se ‘mpezzaje dint’ô stritto p’ajutà ‘a varca primma d’’o stuco (gol) ‘e Caromecosta.]

 

all.  SPALLETTI 6,5 Arnassa (vittoria) mmeretata,  pesante e sufferta ca ce dette  tre ppunte d’oro e ca porta pure ‘a firma soja, capace ‘e darece ‘a nicessaria armassa  (entusiasmo).

Arb. SACCHI 5 Scarzulillo, spisso êtt’’a chiammà ‘a var(ra), Nutizziaje (ammonì) Kalidú ca nunn’êva fatto niente  e ppigliaje cchiú ‘e ‘nu  zarro caputianno ‘e carí (falli.)

E bbasta accussí. Mo si ‘o Cielo ‘o ppermette ce sentimmo viernarí ca vene pe pparlà d’’o sibbacco (match) ‘e Cuppetta iurupea Napoli - Legia Varsavia.

‘E cchiú, ‘e cchiú ‘e cchiú Ciuccio fa’ tu!

Staveti bbe’. Raffaele Bracale Brak