NAPOLI-ESPANYOL (am.le 10.08.17) 2 A 0

 NAPOLI-ESPANYOL (am.le 10.08.17) 2 A 0

Ajeressera guagliú, ô san Paolo ‘nnante a ppoca ggente  se jucaje Napoli-Espanyol, urdemu ‘mpignativo  itibbarro(test) primma d’’a tarra  (sfida)  p’’a Ciampionsa e vve pozzo dicere ca, cumplessivamente, ‘o Napule ce facette spassà pure si ‘o risultato nun fove chillo ca êsse avuto ‘a essere ‘e tre, quatto a zzero, ma sulo ‘e doje a zzero! Certo ‘o cavero i ‘o fatto ca se trattaje ‘e ‘nu guadí (amichevole)nce mettetteno ‘o lloro i ‘o sibbacco (match) nun se jucaje cu ‘o curtiello ‘mmiez’ê diente, ma tutto summato  ‘e cuane (azzurri) spicialmente durante ô primmo ajone (tempo) mustrajeno ‘e ssolite divertente muamarre (trame) ‘e juoco pure si ‘a zurea (ritmo) nun fove esaggerato e sotto porta lloro, mo uno [Ciruzzo], ma cchiú spisso  n’ato [Lorenzigno]nun foveno cacchie ‘e centrà ‘o bberzaglio e, ppe ppassà ‘nvantaggio, s’êtte aspettà ‘o 35’ quanno Ciruzzo cu ‘nu granne tiro ‘e timmurria (punizione) mettette ‘a palla lla addó ‘o purtiere putette sulo vedé comme traseva penzanno:”E cche nce mecco ‘o ssale ‘ncopp’â cora a ‘stu pallone?”; ‘a mudajafa (raddoppio) po arrivaje vinte minute doppo quanno ‘o Masto, ‘ncopp’a ‘nu tiro ‘e squina se jette a ccercà ‘nu pizzo a ccentro ‘e muntaca (area di rigore) i ‘a lla cu ‘na cabbesera (colpo di testa) putente e ppriciso piazzaje ‘o pallone ê spalle d’’o purtiere ca spaisato, manco avette ‘o tiempo ‘e se movere. Da lla a gghí ‘nnante nun ce fove cchiú storia e pputimmo dicere ca  ll’armasimmo     (precampionato) d’’o Napule se nchiudette cu ‘na nichemata (vittoria) ca ce cunzignaje ‘na bbona dosa ‘e  ticca (fiducia) ‘nvista  ‘nfra seje juorne d’’o previo (preliminare) ‘e Ciampionsa contro ô Nizza, quanno se scenne ‘ncampo pe gghiucarse ‘a primma fella ‘mpurtante d’’a tempurata (stagione e nnun ce ll’âmm’ ‘a fà fottere ‘a dint’ô piatto! Passammo ê ppaggelle:

REINA 6  Poche accasioni ‘e se spurcà ‘e guante e dd’aizà ‘a voce cu ‘e cumpagne ‘e sezzione. Meglio accussí!  [Dô 74′ SEPE sv]

MAGGIO 6,5  Facette ‘o ssuojo e ppure coccosa ‘e cchiú dimustranno a ll’aità soja ‘a corza, ‘o ggenio i ‘a saluta ancòra ce stae – tutto summato – Sarri po’ ancòra cuntà ‘ncopp’a ‘stu ggiuvinotto ‘e trentacinche anne! [Dô 58′ HYSAJ – 6 Facette chello ch’ êv’’a fa.]

ALBIOL[‘O Masto] 7,5  Tutto summato, ‘o meglio d’’o mazzo:solita sicurezza e mmuitto (impostazione) pulita e sistimata; currette unu periculo ‘ncopp’a ‘nu tiro ‘e squina (corner), quanno ‘na palla sporca passaje poco luntano dô palo ‘e Reina; ma se levaje ‘e pprete ‘a dint’â scarpa ô 55’ quanno ‘ncopp’a ‘nu tiro ‘e squina (corner) d’’e suoje, cu ‘na franna cabbesera (colo di testa) jette a ccasticà ‘a siconna scuatra ‘e Barcellona, mettenno dinto ‘a palla d’’o doje a zzero ca nchiudette ‘a pratteca. [Dô 73′ MAKSIMOVIC sv]

KOULIBALY 6,5  ô ssolito ce mettette ‘a saluta, ‘o mestiere e ll’armaddia (fisico) e pur’isso, comme ô Masto, nun avette preoccupazzione! [Dô 58′ CHIRICHES [‘o Vampiro] 6 ma se tratta ‘e ‘nu zifo (voto) ‘e stima datose, ca ‘o Vampiro trasette a ccose fatte e ll’avastaje fà ‘a faccia bbrutta pe nun fà movere ‘e catalane ggià cu ‘a coda ‘mmiez’ê ccosce!]

GHOULAM 6  Serata tranquilla pe ll’alcerino  ca ô ssolito appressuraje (spinse) comme sape, ma  nnun avette prubbleme ‘ncupertura.[Dô 74′ MARIO RUI sv]

ALLAN [‘O ‘Ncrifato] 6,5  Corza, cegna (grinta) e ssustanza, chello ca serve a sSarri! [Dô 72′ ROG[‘A Belva] 6  Bbuone vinte minute pure p’’o guaglione ca se facette nutà quase subbeto cuglienno ‘nu palo vascio.

JORGINHO 6,5. Assenziale, cumposto, pulito nun sbagliaje ‘nu pasiglio (passaggio) comme piace a sSarri e nun ce ne fotte, [anze simmo cchiú ccuntente]si Ventura nun ‘a penza accussí; chiammasse a cchille d’’a vecchia zoccola e llassase stà ‘mpace ‘e nuoste! [Dô 74′ DIAWARA 6 ‘e stima]

HAMSIK[Marekiaro] 6,5   ‘o Capitano cupuliaje (dialogò) a mmestiere cu lLorenzigno, ma raramente cercaje ‘a porta; quanno ‘o ffacette ô pprincipio ‘e ll’arrancua (ripresa) scarfaje ‘e mmane ô purtiere Adrià cu ‘na cagliosa ‘a trenta metre, ca se fósse mmeretata ‘e trasí ‘mporta. Peccato! [Dô 58′ ZIELINSKI 6  Pur’isso trasette a ccose ggià fatte i ‘a mez’ora jucata lle servette sulo a mmigliurà ‘a cundizziona ‘nvista d’’a mubbara (partita) cu ‘o Nizza.

CALLEJON [Peppe ‘a ‘nguenta] 6  Se cuntentaje ‘e dà ‘na mana a ddritta  senza esaggerà; jette vicino a ll’addaffa (rete) durante ô primmo ajone (tempo), ma arrivaje n’antecchia tarde ‘ncopp’â palla;sempe durante ô primmo ajone (tempo),anze ô pprincipio ‘e primmo ajone se fósse mmeretato ‘nu ricore a ffavore quanno  fove stiso ‘int’â muntaca (area di rigore) no cu ‘nu cuntrasto spalla a spalla, ma cu ‘nu sbuttulone ‘int’ê rine, ma nè ll’arbitro cu ‘o sisco ‘mmocca, nè cchillo ‘e stavarra a tTuledo vedetteno niente!     [ Dô 74′ GIACCHERINI sv]

MERTENS [Ciruzzo] 7 Facette tutto ‘o ssuojo, mettennoce corza saillo (dribbling) e ccazzimma, ma visto ca truvaje sempe ‘a porta nchiusa decidette ‘e trasí p’’a fenesta i ‘o ffacette ô 35’ quanno piazzaje ‘a vinte metre  ‘nu granne  tiro ‘e timmurria (punizione) ca ‘o purtiere vedette sulo ‘e passà cumm’ô viento. Pricidentemente lle fove necata n’addaffa (rete) pe bbia ca tenette ll’ógne d’’o pere ‘e dritta ‘nnattasallulo (fuorigioco)! [Dô 58′ MILIK 6  ‘O cercajeno poco o niente e s’êtte accuntentà ‘e ‘na cabbesera (colpo di testa) senza furtuna; p’’o riesto tantu muvimento pe ffà e ffarese spazzio; peccato ca quanno ce sta, ‘e cumpagne  ‘o vedeno poco; s’êsseno abbituà a gghiucà pure pe isso!]

INSIGNE[Lorenzigno] 6- Niente ‘e cchiú pecché perdette ll’accasione ‘e fà addentà chella d’ajere ‘a notte ‘e san Lurenzigno; nun ‘o ffacette pecché sotto porta sbagliaje cchiú ‘nu tiro; meglio quanno andivinaje pallune d’oro pe pPeppe ‘a ‘nguenta o pe cCiruzzo.Fenette ‘o sibbacco (match) cu ‘a fascia ‘e capitano.[Dô 74′ OUNAS 6,5 – è  overo, jucaje sulo ‘nu quarto d’ora, ma avette ‘o tiempo ‘e farese nutà cu n’azziona perzunale quanno mannaje ô manicomio ‘a trasera (difesa) catalana) piazzanno ‘na sciabbulata ca centraje ‘o palo; ‘nzomma tutto summato n’armasimmo (precampionato) cu ssette parme p’’o guaglione alcerino!]

all. SARRI 6,5  Bbuono e ‘mpignativo itibbarro(test) contro  a n’ avverzario ca si  nun fove  friccecariello nun permettette tanto. Chello ca conta è ca se riuscette a avé raggiona ‘e ‘na scuatra cuatrata jucanno ecuilibbrate, urdinate e ccu ll’idee chiare. Tutto summato overo ‘nu bbuonu arcarbanno (viatico) p’’a mubbara (partita) ‘e previo (preliminare) ‘nfra seje juorne!   

arbitro GUIDA [i ‘a chenca soja, cumpreso Massa chillo ‘e stavarra a tTuledo]5  Pecché facette quase tutto ‘o duvere suojo, ma    nè isso, nè chillo d’ a VAR(RA) s’addunajeno 

ca Peppe ‘a ‘nguenta fove stiso ‘int’â muntaca (area di rigore) no cu ‘nu cuntrasto spalla a spalla, ma cu ‘nu sbuttulone ‘int’ê rine!  E cche saciccio! (Se l’inizio [della VAR] inizia con quest’inizio... che inizio di inizio è? ) e preddonnateme ‘a citazziona ‘e Peppino De Filippo!

 Fermammoce cca. E, si dDi’ vo’, ve donco   appuntamento pe ggioverí diciassette   doppo d’‘o sibbacco (match)  ‘e miercurí  a ssera ô san Paolo  contro ô Nizza pe ll’addabba (andata) d’’o previo (preliminare) ‘e Ciampionsa  e sso’ cquase certo ca, corna facenno  ve pozzo cuntà bbelli ccose!

Staveti bbe’! R.Bracale Brak