NIZZA – NAPOLI (previo ciampionsa 22.08.17) 0 A 2 ‘A VEDETTE ACCUSSÍ

NIZZA – NAPOLI  (previo ciampionsa 22.08.17) 0 A 2

‘A VEDETTE ACCUSSÍ

Sí, sí e ssí guagliú m’avite ‘a credere! Sto’ ancòra spilanno sciampagna pe festeggià ‘a nichemata (vittoria) d’’a scuatra cuana (azzurra) ca ajeressera jette a nNizza a ppaccherià p e ddoje a zzero ‘a scuatra d’’a chietta balotelli  e     Sneijder [ca ajere s’êtten’’a fà cchiú ddinto ‘e dinto ô prozo], nchiudenno ‘a prattica d’’o previo (preliminare) ‘e ciampiomsa e gghienno a ffà cumpagnia – comme se mmeretava ca fósse -  â roma i â vecchia zoccola.E ffove naturale ca succedesse pecché doppo d’’e ddoje purpette ca ‘o Nizza s’era alluggiate otto juorne fa ô san Paolo cu ttutto ch’era scisco ‘ncampo parchiggianno ‘o pulmanne ‘mnnante â porta soja, ajeressera ‘ncasa s’êtte ‘a sentere ‘ncuorpo ddoje brasciole ‘mbuttunate una ô 48’ a ffirma ‘e Peppe ‘a ‘nguenta e ll’ata a ll’89’ firmata Lorenzigno. E cchesta fove ‘a nota poco pusitiva: chella ciovè d’avé aspettato ll’arrancua (ripresa) pe ‘nchiudere ‘a pratteca dàtose ca pe ttutto ô primmo ajone (tempo) ‘o Napule nun fove crestiano ‘e cuncretizzà ‘a subberanía (dominio) dimustrata chiaramente, mettenno a ffrutto ‘e ttanti accasione avute. Peccato! Se fósse pututo nun sulo vencere, ma pure sbrasà facennoce arrecrià cchiú ‘e quanto nun facetteno.Cuntentammoce accussí soprattutto pecché riuscettemo a mmantené ‘a porta acrata (inviolata) comme êva addimannato Sarri.

Passammo ê ppaggelle:      

 REINA 7  Urdinaria amministrazione nsi’ a ll’uurdemi munute,ma s’ammereta miezu zifo (voto) ‘e cchiú pecché fove proprio tanno ca, mettenno ‘na granna  pezza a ‘na fessaria ‘e Zielinski, dicette ‘e no a gGanago ca lle s’era appresentato a ttu ppe ttu. P’’o riesto fove sempe, pronto e  attiento pure quanno ascette ‘mpresa!   

HYSAJ[Meza Cucchiara] 6 - Pure si sufferette ll’accellerazzione ‘e Saint-Maximin(ne), tutto sommato jette assaje meglio ‘e chello fatto a vVerona, sustentanno ll’azziona uffenziva e guardannose ‘a castagna ‘ncupertura.

ALBIOL[‘O Masto] 7  Sicuro e ccu ll’uocchie apierte fove prutacuniste ‘e nchiusure valiose (preziose) e ffacette partí ll’azzione ‘a reto cu ll’udú (tranquillità) ‘e sempe; ‘nu sulo prano (errore), ma senza cunsequenzie!

KOULIBALY 7 Facette vedé ‘e surice verde a cchi capitaje capitaje’ntervenenno a mmestiere cu ccegna (grinta) e ppricisione ausanno ‘a saluta soja pe spaventà ê nassíe (attaccanti) e soprattutto a   bBalotelli, ca sotto a isso facette acqua â pippa tanto da custringere ô mutarribbo (allenatore) a llevarlo dô campo.Peccato ca chella fetenzia ‘e ll’arbitro, piglianno asso pe ffijura, ‘o nutizziaje (ammoní.)   

GHOULAM 6.5 Mettette ‘a musarola a  wWalter(re) e se prupenette ‘nnante,mettenno ‘mmiezo cchiú ‘e ‘nu jabbro (cross) sempe ‘mpurtante comme a cchillo ca servette a lLorenzuigno pe ffirmà ‘o doje a zzero.

ALLAN 7[‘O ‘Ncrifato]  Soprattutto durante ô primmo ajone (tempo) se dette da fà cuntrullanno a mmestiere ‘a camma (zona) soja e prupunennose ‘nnante cu ttutta ‘a cegna (grinta) soja ca nunn’è ppoca! [Dô 71'  ROG 6 ‘e stima]

JORGINHO 7  Funnamentale facette ‘a culaturo (filtro), dette palla cu ppricisione e pparticipaje â munavara  (manovra) suranno poco, ma facenno surà ‘o pallone. [Da ll'85' DIAWARA 6 ‘e stima]

Marek HAMSIK 6,5[Marekiaro] ‘Mpalla sí, ma nunn’ è ancòra isso!Jucaje tanti pallune ggestiunannone paricchie a mmestiere, ma ancòra nun vede ‘a porta! ‘E bbuono comme cupuliaje (dialogò) cu lLorenzigno e cchella pulitelica (preziosa) suvrappusizziona ca furnette a pPeppe ‘a ‘nguenta ‘a palla ‘e ll’ uno a zzero[Dô 63'  ZIELINSKI 6,5 Miezu zifo (voto) mancante pecché si trasette súbbeto ‘nsibbacco (nel match) cu ‘nu paro d’jusaida (assist) overo bbelle, mettenno ddoje vote Lorenzigno ‘nnante â porta,  me facette ggelà ‘o sanco cu ‘nu sfregazzo (sbavatura), pe ffurtuna  senza cunsequenzie, quanno arresecaje ‘e cumbinà ‘a frittata mettenno a gGanago a ttu ppe ttu cu Reina; menu male ca ‘o purtiere cuano (azzurro) nce mettette ‘na granna pezza!]

CALLEJON[Peppe ‘a ‘ngenta] 6,5  Nun lle mecco ‘e cchiú pecché pure essenno dimustrato attiento e ppriciso quanno mettette dinto ‘on bbassurero (suggerimento) d’’o capitano, p’’o riesto cu ttutto ca fove ‘o solito jucatore faticatore e tenazzo (tenace), faticaje a ccuncretizzà ‘e ttanti accasione criate! Peccato.

MERTENS[Ciruzzo] 6, 5 Scennette ‘ncampo cu ‘nu rito d’’o pere ammaccato, ma ô stesso mannaje ô manicomio ‘a rtrasera (difesa) ‘e casa, dànnannese ll’anema ‘ncerca ‘e ll’addaffa (rete) ca nun truvaje ‘nu poco pe ‘mpricisione, ma n’a’ ppoco pe scarogna futtutta comme a cquanno ô pprincipio d’arrancua (ripresa) centraje ‘o palo vascio cu ‘nu bbellu tiroAggio paura ca chillu cainno  (traditore) ‘e ciro ferrara  ll’êsse miso ll’uocchie ‘ncuollo e ll’êsse cuoveto! 

INSIGNE[Lorenzigno] 7,5  Aspettaje ca ‘o sibbacco (match) stesse fernenno pe mettere ‘a firma soja sott’â brasciola cunzignata ô Nizza e ppe mmettere ‘a nocca ‘ncopp’a ‘na granna atalossa (prestazione) cumplessiva, ma ggià durateô primmo ajone tempo êsse pututo mettere dinto ddoje o tre ppalle. Sperammo ca se ll’è astipate pe ll’Atalanta!

All. SARRI 7,5  Bravo! Avette chello ca vulette urgugliuso ‘e ‘na scuatra ch’è ‘nu piacere vederla jucà e p’’o siconno anno cunzecutivo ce purtaje  a gghiucà ll’epata a javalle (fase a gironi) d’’a Ciampionsa facenno cuntente a  nnuje e a  dDela ca ggià  se vede ‘int’ô cogliapiecuro (portafogli) ‘e cinquanta meliune d’evere ca spettano ô Napule!

Arb.: SKOMINA 4,5 (Slovenia)Scadente, scemo e ccasalinco nun ne ncarraje nisciuna permettenno ê francise ‘nu juoco viulento e pruvucatorio.

E ffermammoce cca dannoce appuntamento si dDi’ vo’ a llunnerí ca vene doppo ‘e ll’antraffa (partita) casalinca  contro ll’Atalanta, speranno ca ggià da dummeneca ‘e guagliune turnasseno súbbeto cuncentrate pe ppaccherià ‘e bbergamasche e vvencere largo  levannose chelli prete dê scarpe ca ô campiunato passato ‘a scuatra travante (satellite) d’’a vecchia zoccola ce aveva miso. Accussí sperammo! Staveti bbe’.

Raffaele Bracale Brak