domenica 21 maggio 2017

NAPOLI – FIORENTINA ( 20.05.2017) 4 -1 ‘A VEDETTE ACCUSSĺ




NAPOLI – FIORENTINA ( 20.05.2017) 4 -1
‘A VEDETTE ACCUSSĺ
Canta Napule, guagliú, Napule a mmitraglia eh, eh! Tutto a pposto; pure ajeressera ô san Paolo ‘o Napule facette ‘o Napule e cquanno chella mmunnezza ‘e Rizzoli [4 e ppo ve dico] siscaje ‘o prazzo (la fine) Paulo Sousa i ‘e profuche viulette, ajeressera vestute russe,se carriajeno a fFirenze ‘na guantiera cu ddoje sfugliatelle ricce e ddoje frolle senza puté deciderse a ssapé qua’ fósseno meglio viso ca tutte quante risultajeno sapurite, soprattutto pe nnuje, accumincianno ‘a chella frolla ‘e Koulibalý  ca a ll’8' fove ‘o cchiú ppronto sotto â porta viuletta a recogliere ‘na rispinta ‘e Tatarusano e a mmetterla dinto sbluccanno ‘a mubbara (partita), pe ccuntinuà cu lLorenzigno Insigne ca ô 36'  lle ‘ncartaje ‘a riccia  soja dicenno: “Assaggiate chesta e ddiciteme si ve piace!” E accussí, ‘ncopp’ô doje a zzero se nchiudette ‘o primmo ajone (tempo), ma ggià se capette ca ê nuoste i a sSarri àncora nun ll’ êsse  pututo abbastà e ca a ll’arranqua (ripresa) ‘a primiata pasticciaria cuana(azzurra)êsse ‘ncartate ati sfugliatelle… E ccumminfatte ne foveno ddoje una meglio ‘e n’ata e ttutt’’e ddoje ‘e Ciruzzo, ‘a primma, riccia ô 58’ fatta cu ttutta ‘a cazzimma i ‘a sveldezza ‘e ‘nu scugnizzo i ‘a siconna, frolla ô 65’ doppo d’avé cupuliato (dialogato) a mmemmoria cu lLorenzigno. I ‘a frolla soja servette a ffà capí   a pPaulo Sousa i ê profuche suoje  ca ll’addaffa (rete)
ca Iliciccio êva signato pe scagno ô 60’ [apprufittanno ‘e ‘nu sciuliamazzo ‘e Giorgigno] era tutto chello êsseno pututo pretennere dâ serata e ca fósse stato meglio ‘e lassà perdere o lle ‘ntraveneva peggio. ‘E profuche viulette capetteno antifuna i ‘e cuane s’accuntentajeno ‘e chello ch’êveno fatto i aspettajeno sulo ca Rizzoli siscasse ‘o prazzo (la fine) pe ffà ‘o ggiro ‘e campo e ssalutà ‘e tifuse. Passammo ê ppaggelle:
   REINA 6,5 – Granna  parata ‘ncopp’a ‘nu tiro  d’Iliciccio durante ô primmo ajone (tempo),e ppure a ll’arrancua  (ripresa) dicette sempe no a cquacche  tentativo ‘a fora d’’e viulette, ajeressera russe.Pe ffotterlo Iliciccio ô 60’, a gghiuche fatte’int’a ‘na  ‘mbuglia (mischia) d’’a muntaca (area di rigore)nosta,  êtte apprufittà ‘e ‘nu sciuliamazzo ‘e Giorgigno ca facette passà ‘na palla sporca ‘e Teglio senza fermarla e Pepe, senza nisciuna sfarma soja, manco vedette ‘e partí ‘o tiro d’’o profuco viuletto. Peccato!
HYSAJ (Meza Cucchiara) 6  Vincette ‘a brica  (duello) cu Olivera, e ffaticaje ‘nu poco ‘e cchiú cu tTello cuncedenolle però sulo ‘nu jabbro (cross) ca però ce custaje caro.

ALBIOL[‘o Masto] 6,5 Pe sittanta minute fove matalo  (perfetto) nun sbaglianno niente, cumannanno ‘a sezziona  (il reparto) cu  ggranna ammanna   (sicurezza) e ssulo ô finale se dette ‘na calmata.
KOULIBALY 7  êvemo accumminciato ‘a poco ca ggià ‘o Napule êva ‘nchiuso ‘e viulette ‘int’â mità ccampo llora i â primma accasione ‘o ggialante nuosto ‘e culore se facette truvà pronto sott’â porta viuletta pe sfruttà a mmestiere ll’accasione nata da ‘na cabbesera ‘e Marekiaro e dâ  rispinta corta ‘e Tatarusano ch’isso casticaje sbluccanno ‘o sibbacco (match). P’’o riesto pe ttutt’’a mubbara (partita) mettette ‘a musarola e cancellaje dô campo a Kaliniccio e addirittura ll’urdema ventina ‘e minute se prupunette a ll’armidanno (centrocampo) gialantanno pure lla.
 GHOULAM 6  Preferette restà ‘e guardia ô bbidone arreto senza  farese vedé annante.Però chello ca facette ‘o ffacette bbuono e pperdunammolo si nun se facette mancà ‘e jabbre (cross) suoje.
ZIELINSKI 6  Facette ‘o ssuojo pure si cu ppoca cuntinuità però quanno se mettette ‘mmoto fove  ‘nu  spettaculo; dicisivo ‘nnaccasione d’’a mudajafa   (raddoppio).
JORGINHO 6,5 ‘E pusitivo tutto chello ca facette pe n’ora, padrone e ddirettore  ‘e ll’armidanno (centrocampo)tuccanno tante ‘e chilli pallune ch’ i’ ne perdette ‘o cunto;valiuso ( prezioso) pure quanno nun tenettemo palla; peccato sulo pe cchillu sciuliamazzo ca nun lle permettette ‘e fermà chillu jabbro  (cross) ‘e   Tello ca ce custaje salato e ca  lle fa perdere miezu zifo (voto) [dô 69' DIAWARA 6,5 Frisco, sistimato e ccuncreto mettette ‘a supponta soja ô castiello custruito da ll’armidanno (centrocampo) cuano. Cumprimente!]
HAMSIK 6,5  Durante ô primmo ajone (tempo)  truttaje forte a mmancina cupulianno (dialogando) cu lLorenzigno; ‘e cchiú fove soja ‘a cabbesera (colpo di testa) ca Tatarusano tuccaje appena mettennola ‘nnante a cKoulibalý ca ‘o casticaje; se ne scennette ‘e pressione a ll’arrancua (nella ripresa) e sSarri s’’o chiammaje ‘mpanca, forze ‘nu poco tarde.[dô 66'  ROG [‘a Bbelva] 6  Dimustraje súbbeto ‘e tenerlo e vvulerlo spennere, prupunennose e ddannose da fà, peccato ca nun sfruttaje ‘na bbella palla ‘e Peppe ‘a ‘nguenta. ]

CALLEJÓN [Peppe ‘a ‘nguenta] 6,5 Ô ssolito fove padrone d’’a curzia ‘e dritta facennose apprezzà p’’a cuntinuità d’’a fatica soja; a ll’arrancua (nella ripresa) cercaje pure ‘o stuco (gol), ma nun fove furtunato, anze fove fesso quanno nun tiraje ‘mporta pe ccedere palla â Bbelva, ca però ‘nciampecaje sciupanno. Peccato!   
MERTENS[Ciruzzo] 7,5  Durante ô primmo ajone   (tempo) sbagliaje n’addaffa (rete) retissante   (clamorosa) sulo ‘nnante a  tTatarusano, po doppo cu ‘nu tiro ‘a luntano cugliette ‘o palo ‘e mancina d’’o purtiere, però a ll’arrancua (nella ripresa) praticamente nchiudette ‘a mubbara (partita), comme v’aggiu ditto,  cu dduje lampe d’’e suoje. A cchillu punto Ciruzzo   sagliette a zzamma  (quota) vintisette stuche (gol) ‘ncrassifica nassie (goleador) sunnanno ‘e vencerla. I à ggià  firmato cu dDela n’ atu cuntratto luongo!  [dô 79' PAVOLETTI[‘o Pacco] sv  Trasette e ô ssolito, aizaje porvera.]
INSIGNE [Lorenzigno] 7  Cercaje cchiú ‘e ‘na vota ‘a porta,  truvannola ô 36’  oppure tentaje ‘e mettere ‘nu cumpagno ‘nnante ô purtiere e lle riuscette ô 65’ doppo d’avé cupuliato (dialogato) a mmemmoria cu cCiruzzo. Cumplessivamente ‘nu stuco (gol) fatto, n’ato sfresato (sfiorato), ‘nu granne bbassurero (suggerimento)e ttanti gghiucate ca facetteno vení ‘e male ‘e cape â trasera (difesa) viuletta.  
All. SARRI 7  A chistu punto se po’ sulo dicere: che ppeccato pe cchillu punte perdute ‘a fesse ‘ncasa durante â tempurata (stagione) pecché ‘o Napule suojo p’’o juoco fatto vedé pure ajeressera, mmeretase ato ca ‘o terzo posto ‘ncrassifica ; sperammo ca da austo a ggí ‘nnante cagnasse ‘a musica, addeventassemo cchiú cazzemmuse e cce putessemo sunnà ‘nu bbellu suonno, â faccia ‘e chi ce vo’ male e d’’e tanti cestarielle ca ce levano ‘a saluta!
Arb. RIZZOLI [i ‘a chenca soja ] 4 Tenette poco ‘a fà; venuto pe spezzarce ‘e passe s’êtt’’a fà dint’ô prozo, ma se vennicaje nutizzianno (ammonendo) ‘e duje centrale nuoste pe ccundizziunarle mentalmente pe ttutta ll’arrancua (ripresa). Ma va’ ârruobbà ‘int’ê cchiese!
E ffermammoce cca. Rassignammoce a ‘stu terzo posto e gghiammo ‘nnante, dànnoce appuntamento, si dDi’ vo’ pe llunnerí vintinove doppo d’’a nacchella (trasferta) ‘e dummeneca ca vene contr’â Sampedoria pe ll’urdema ‘e campiunato. Staveti bbe’.
R.Bracale Brak

Nessun commento: