CROTONE – NAPOLI [6.12.20] 0 A 4 ‘A VEDETTE ACCUSSÍ

 

CROTONE – NAPOLI [6.12.20] 0 A 4

‘A VEDETTE ACCUSSÍ

Applavuse guagliú, applavuse! Ajeressera ‘o Ciuccio jette a Crutone contr’ê lucale  e sse purtaje â casa tre ppunte sustanziuse e ‘mpurtante schijanno ‘nterra tanto n’arbucarro   (poker) rispunnenno accussí  â Bbisciona iâ vecchia zoccola ancappata  ô  terzo posto pure si ‘o Ciuccio è ancòra  mabbejato (penalizzato)’e ‘nu punto cosa ca nun sta né ‘ncielo, né nterra. P’’o mumento ‘o Napule è ‘a scuatra ca à signato cchiú ‘e tutte ll’ate [24 addaffe (reti)] e ttene ‘a meglia trasera (difesa) [7 addaffe (reti) pigliate levanno chelli ffaveze d’’o tre a zzero a ttavulino contr’â vecchia zoccola…] D’accordo è ancòra troppo ampressa tutto chesto vo’ e ppo’  dicere  allimmeno Ciampionsa, ma pure – pecché no? -  brica  (lotta) p’’o scutetto. E nun me sto’ dànno ‘nu cazzotto ‘mpietto! Turnammo âjere: Insigne [31’ addaffa (rete)cu’a spicialità  d’’o tiro a ggiro), Lozano[58’ca signaje cumme êsse fatto Peppe ‘a ‘nguenta], Demme [76’ ca signanno  mettette ‘a cerasella ‘ncopp’â pizza doce ‘e ll’atalossa  (prestazione) soja da mettere ‘ncurnice] e Ppetagna [91’ca finalmente truvaje ‘a porta chijanno ‘e mmane a Ccordaz(ze)] mettertteno ‘a firma sotto ll’arnassa  (il successo) ‘nCalabria, ‘o siconno  ‘ncampiunato dopo chillo ‘ncuoll’â Roma,assaje  sustanziuso . Ora mo da cca a Nnatale à dda capí e cce à dda fa capí qua’ so’ ‘e ‘ntenzione d’’o Napule e sperammo ca da cca a Nnatale trova ‘a cusapevulezza ‘e chello ca po’ ffà i ‘o ffa!

Passammo ê ppaggelle:

OSPINA[Pastacrisciuta]: 7,5.’Ncopp’a ll’uno a zzero mantenette acrata (inviolata) ‘a porta nosta fermanno ‘nu maligno tiro a vvolo, a bbotta quase sicura, ‘e Vulic(cio); cu ‘o pallone ‘nfra ê piere fove a ll’uccurrenza madaffio (difensore) e arvasatto  (centrocampista) addizziunato, senza scurdarce ca quanno ascette auro ‘o ffacette cu perzunalità. N’ ammanna  (sicurezza).

 

DI LORENZO: 6 + Appressuraje (Spinse) e ddifennette raccurdannose (coordinandosi) cu ‘e muvimente ‘e Lozano. Cumplessivamente n’atalossa (prova) ‘e sustanza cu ssulo ‘nu paro ‘e sfregazze  (sbavature) cumme a cchillo d’avé lassato troppu spazzio a Vvulic(cio). Fove isso ca abbiaje ll’azziona d’’o stuco   (gol) ‘e Lorenzigno.

 

MANOLAS[Chitelassa]: 6,5. Diciso e tterco (caparbio)fove ‘o meglio d’’a sezziona (reparto) affuzzanno (vincendo) ògne stibbacco (duello) ‘e capa cu cchi capitasse, sustenette e cumpagne e lle facette curaggio. Bbuono accussí!

 

KOULIBALY[‘O Ggialante]: 6 Nun le metto ‘e cchiú pecché se facette nutizzià (ammonire) quase subbeto doppo d’esserse trasuto  periculosamente ‘ncuollo  a Mmessias(se) ca s’era perzo.Se facette quase cundizziunà dô cartellino jalizzo (giallo) però pe ffurtuna nosta Chitelassa lle dette ‘na granna mano e ‘nzieme aizajeno l’aculla (il muro) centrale e ppe tutto ‘o sibbacco (match) ‘o Ggialante riuscette a ttené bbotta ricuperanno,ancercanno  (anticipando) e mmantenenno ‘a linia. [Da ll'84' MAKSIMOVIC[‘O ‘Ntontero]: sv. Pochi minute justo pe scanzà a Kcalidú n’atu cartellino!]

 

MARIO RUI: 6. Bbona ‘a ’ntesa cu Insigne quanno appressurajemo (spingemmo); à dda migliurà ‘a pricisione quanno jabbra (crossa).

 

DEMME: 7,5  E lle mettesse pure ‘e cchiú!Fove ‘o rre d’’a mità campo, tuccaje ‘na cifra ‘e pallune cu granna pricisione, nun se fermaje maje taglianno e ccusennoa ttiempo e urdinatamente. Cuncreto pure cchiú d’’o nnicessario, ricuperaje tanti pallune facenno timiddà  (ripartire) ‘a  scuatra senza fà mancà ‘o sciascio (lo schermo) ’nnante â trasera (difesa). E nun ce scurdammo ‘o catàra  (il diagonale) ca ce dette ‘o tre a zzero! Ch’ato à dda fa?!  Nun ne facesse maje a mmeno.

 

BAKAYOKO[‘O Mammone]: 6,5. S’abbuscaje ‘a pagnotta: granne ‘a ‘ntesa cu Ddemme fove ‘nu   guarriero ca aizaje aculle  (dighe) addó servettono, sapenno sempe addó pusizziunarese pe ffà ‘o spezziale. Facette vedé ‘e che ppasta è ffatto quanno perzo ‘nu pallone,subbeto ‘o  ricuperaje facenno partí ll’azziona d’’o tre a zzero. [Dô 77' LOBOTKA: 6 ‘e stima. Trasette justo pe ffà piglià sciato ô Mammone e ffà ggirà ‘a palla.]

 

LOZANO: 7 Cumplimente! ‘O messicano facette tutto ‘o duvere suĵo e ppure ‘e cchiú truvanno cu  Di Lorenzo ll’aruasto  (compromesso) ca lle  cunsentette  ‘a jucata senza paura. Currette a ccapa sotto senza farese fermà e ccu cchillu taglio â Peppe ‘a ‘nguenta facette capí a Llorenzigno addó mannarle ‘o pallone ca mettette ‘mporta. Tutto chesto senza scurdarce ca se prucuraje pure cchiú ‘e ‘na timmurria(punizione). [Dô 77' POLITANO: 6 Se dètte da fà scattanno spisso  a ddritta; peccato ca sprecaje ‘na bbona palla ‘e Ciruzzo. Ll’ucummo (arbitro) sbaglianno ‘o nutizziaje (ammoní). 

 

ZIELINSKI: 7,5 Atalossa (prestazione) spettaculare d’’o pulacco Quanno tassariaje (accelerò) nun ‘o putetteno piglià;Fove isso ‘a pedina andivinata pe trasfurmà ‘nu 4-3-3 e farlo addivintà  4-2-3-1; ‘e cchiú se chiammaje ll’applavuso d’’a tribbuna-divano e cce lustrajemo ll’uocchie  pe cchill’ arnaffacco ( tunnel) ‘ndanno ‘e  Cuomo abbianno ll’azziona ca purtaje ô stuco  (gol) ‘e Lorenzigno. [Dô 69' MERTENS[Ciruzzo]: 6,5. Dètte spettaculo; primma sfurnaje ‘nu missiddo  (assist) pe Ddemme, po pittaje ‘a palla  pe Ppetagna e êva ‘mmentato pure pe Politano ca però sprecaje.Cumplessivamente Ciruzzo accuntentaje a Ggattuso ca ll’êva addimannato ‘e disignà juoco e cchello facette!]

INSIGNE: 8. Fove ll’ommo d’’o sibbacco: sbluccaje ‘a facenna cu ‘nu tiro a ggiro da luntano e ppo’ dispenzaje qualità pe tutto ‘o  campo cumme si chella maglia ca peteccava (scimmiottava) chella ‘e ll’Argentina ‘e Diego Armando ll’êsse fatto sentí chill’ato ca nuje sapimmo! [Dô 77' ELMAS: sv. Trasuto a ccose fatte se guardaje ‘e ccosce senza mettere lengua.]

 

PETAGNA: 6,5. È overo ca sprecaje ‘nu paro d’accasione, ma ‘ncumpenso  faticaje  assaje f senza palla p’’a scuatra. Bbona ‘a ‘ntesa cu  Insigne e ccu ati cumpagne ca  libberaje ô tiro arapenno e ffacennole spazzio. Riuscette pure a ttruvà ll’addaffa (rete) ô 91’ quanno ‘nu carimmo (generoso) Ciruzzo le dètte ‘na palla a zzuco ‘e caramella! 

 

all. GATTUSO: 6,5 Finalmente a nnujaute d’’a tribbuna divanonce dètte ‘a ‘mpressiona ch’avesse truvato a ricetta justa: cu Ppastacrisciuta ‘mporta, cu Cchitelassa ‘nchietta cu ‘o Ggialante centrale d’’a trasera (difesa) e, mmiez’ô campo ccu   Ddemme e Bbakayoko, cchiú Zielinski libbero ‘e taglià ‘o campo cumme cierti diece d’ati tiempe, ‘o Napule po’ ffà chello ca vo’ asasa (soprattutto) si annante ‘e tre ‘e turno trovano ‘a strata justa. 

arb. MARINELLI: 5  Ll’ucummà (arbitrare) nunn’è articulo suĵo. Siscaje a vvienetenne, spisso nchiudette ll’uocchie pe nun vedé o vedette ‘na cosa pe n’ata. Nutizziaje (ammoní) pe ssenza niente a Ppolitano e ffove troppo acatuso (fiscale) cu ‘o Ggialante speranno d’’o cundizziunà. Ausanno ‘o stesso centimetro êsse avuto assignà ‘nu ricore a ffavore ‘e Petagna e nnun ‘o ffacette. Però â faccia soja ‘o Napule affuzzaje (vinse) ô stesso e llargo!

E bbasta accussí. Mo, si ‘o Cielo ‘o vvo’ ce sentimmo viernarí pe ccuntareve si ggioverí ô Maradona ‘o Napule s’è mmiso dint’â sacca ‘e punte ca lle servono pe ppassà ‘o turno dint’â cuppetta aiurupea.  I’ penzo ca sí però nun me faccio diebbete cu ‘a vocca. Staveti bbe’ Ciuccio fa’ tu!

Raffaele Bracale Brak