NAPOLI – SAMPDORIA [13.12.20] 2 A 1 ‘A VEDETTE ACCUSSÍ

NAPOLI – SAMPDORIA [13.12.20] 2 A 1

‘A VEDETTE ACCUSSÍ

Sbattimmo ‘e mmane guagliú! Ajere a ll’ora d’’a tiella ô Maradona ‘o Ciuccio [sciso ‘ncampo cu ‘a muntazzimma   (divisa) furtunata, ca petecca (scimmiotta) chella ‘e ll’Argentina ‘e Diego Armando però cu ‘e vrachesse janche e nno nere…] cunquistaje  n’arnassa  (vittoria) funnamentale [assaffa(purtroppo) angappata sulo dint’ê siconne quarantacinche minute   doppo ‘nu primmo ajone (tempo)  bbatiejo (lento), scarzo ‘e  sustanza e dde ficre (idee) lassato ê duriani. Ora mo cu ll’arnassa d’ajere ‘o Ciuccio sagliette a vvintitrè ppunte ‘ncrassifica [cu vvintiseje addaffe (reti) fatte e ssulo otto rialmente pigliate…]   restanno ancurato ‘ncapa ô treno. Certo si Gattuso êsse ‘ncarrato subbeto ‘a furmazzione [senza sparagnarese a  Bbakayoko i a Llozano i asasa (soprattutto) a Pastacrisciuta!...] ‘e ccose fosseno jute meglio e s’êsse pututo affuzzà (vincere) assaje primma e mantenenno ‘a porta acrata (inviolata), ma simmo nate pe ssufferí e ppacienza; tenimmoce ‘a posta e gghiammo ‘nnante strignenno ‘e diente. Passammo ê ppaggelle:

 MERET[]’O Lungagnone] 5  E ppacienza si quaccheduno dice ca i’ ‘o tratto malamente a ‘stu guaglione…Nun ce pozzo fa niente: è isso ca  nn’êsse ‘a smarrunà cumme ‘mmece lle capita spisso e ppure ajere quanno difettaje d’ammanna (sicurezza) e asasa (soprattutto) ‘nnaccasione ‘e ll’addaffa (rete)duriana ‘e Jankto, quanno nun sapette  deciderse a dd’ascí o rummané ‘mporta.Tenimmo ‘o purtiere bbuono: Pastacrisciuta, pecché Gattuso se nfessiscea ffò jucà ‘stu guaglione senza sperienzia?Sulo p’accuntentà ô presidente?Ma ve ne jate o no?!

 

DI LORENZO 5,5  Durante ô primmo ajone (tempo) jucaje assaje malamente facennose cchiú ‘e ‘na vota cartià da Jankto, cumme ‘nnaccasione ‘e ll’addaffa (rete)duriana. È stracquo i êsse ‘a tirà ‘o sciato; pe ffurtuna jette meglio a ll’arrancua  (nella ripresa).

 

MANOLAS[Chitelassa] 6- Sempe zéruso ( dinamico),asasa (soprattutto) all’arrancua (nella ripresa)  criscette scurciannose ‘e mmaneche e truvanno tacatamme (anticipi) e ttrasute esatte.

 

KOULIBALY[‘O Ggialante] 6-  Durante ô primmo ajone(tempo) nun truvava ‘e mmesure ‘e ll’avverzario ‘e turno, ma a ll’arrancua (nella ripresa) truvaje  ‘a cegna (grinta) nicessaria e mmigliraje cumme ô cumpagno ‘e sezziona (reparto).

 

GHOULAM 5,5 Nun fove ancòra ‘o Ghoulam(me) ca sapimmo,e sse vedette asasa (soprattutto) da ll’ antiescie (recuperi) quanno ce mettette overamente troppo a ricuperà ‘a pusizziona.  [dô 59’  MARIO RUI 6:  Trasette i ‘o Napule migliaraje  putenno sfruttà ‘o passo suĵo ‘ncopp’â ferza  mancina addó ‘o purtuchese cupuliaje (dialogò) a mmestire cu Insigne.]

 

DEMME 6  Doppo  n’abbio bbatejo (lento)criscette a ll’arrancua (nella ripresa) [Dô 59’BAKAYOKO[‘O Mammone] 6 Cchiú sustanza e cchiú presenza ‘mmiez’ô campo. E cce vuleva!]

 

RUIZ[Anemalonga] 4,5  Jurnata no: bbatejo e ‘mpacciato dimustraje ‘e nunn’essere ‘nu matustejo (mediano) e dde mun puté jucà ‘nchietta cu  Ddemme; ajere ‘a  Sampedoria avette vita troppo facile! [D46’ PETAGNA 7:  ‘A munavara (manovra) uffenziva difettava ‘e  pisemo e isso nce ‘o dette avvantaggianno ‘o Napule e truvanno ll’addaffa (la rete) dicesiva, chella d’’o surpasso.]

POLITANO 4,5  Jurnata no. Ghirfajllo (inefficace) e cquase inutile, nun levaje né mmettette, sempe stuppato dâ trasera  (dalla difesa)  [Dô 46’ LOZANO 7,5  Ll’ommo  d’’a Pruvverenza . Trasette isso i ‘e ccose cagnajeno da accussí a accussí; fove mammarrejo  (devastante) ggià da ‘nfromme trasette: nun sulo signaje, ma cusette e ffurnette ‘o missiddo (assist) dicisivo. P’’o mumento è ll’anno suĵo].

 

ZIELINSKI 6   Peccato ca ‘a bbenzina fenette primma d’’o nicessario, ma da ll’abbio fove ‘o cchiú agruppino (vispo).[Dô 77' LOBOTKA 6 ‘E stima]

 

INSIGNE 5,5  Partette cu ‘o freno tirato e s’abbiaje a vvedé  sulo a ll’arrancua (ripresa) quanno cu ‘e cagne avette cchiú libbertà e cquase ttutte  ll’azzione passajeno p’’e piere suĵe.

 

MERTENS[Ciruzzo] 6+  Se faccette apprezzà pe cchiú ‘e ‘nu missiddo (assist), cumme chillo a Llozano.

 

all. GATTUSO 6 Sbagliaje  ‘a furmazziona iniziale però menu male ca adderezzaje ‘a varca cu ‘e  cagne juste piscanne ‘e ccarte ‘nduvinate doppo ca Ranieri ll’êva ‘ncartato dint’ô primmo ajone (tempo).

arb. LA PENNA 5 Grossi fetenzie nun ce ne facette, ma fove troppo acatuso (fiscale) cu ‘e nuoste.

E bbasta accussí. Sbattimmo ‘e mmane e gghiammo annanze; mo miercurí se torna a gghiucà p’’o campiunato e nce attocca ‘nu sibbacco (match) scamuso: avimm’’a jí a Mmilano contr’â Bbisciona ch’è siconna ‘ncrassifica e vvulesse migliurà. Sperammo ca ‘o Ciuccio nun ce ‘o fa fà… Si ‘o Cielo ‘o vvo’ v’’o cconto gioverí. Staveti bbe’. R.Bracale Brak