NAPOLI - REAL SOCIEDAD [E.L.10.12.20] 1 A 1 ‘A VEDETTE ACCUSSÍ

NAPOLI - REAL SOCIEDAD [E.L.10.12.20] 1 A 1

‘A VEDETTE ACCUSSÍ

 

Che peccato guagliú ‘e nunn’essere riuscite add’ affuzzà (vincere)

ajeressera ô san Paolo addivintato Maradona,  ll’urdema tarra (sfida) ‘e ll’epata  a jaualle (fase a gironi) a  contro ô Rial(le) Sociedad(de) ca p’’a verità era venuto cca p’affuzzà (vincere).E ‘mmece doppo ‘na mubbara scamosa sott’ô patapate ‘e ll’acqua contro ‘na scuatra tosta ‘o Napule nsi’ ô nuvantesimo steva affuzzanno (vincendo) cu ‘n’addaffa (rete) assaje bbella ‘e  Zielinski, e ssulo ô 92’ ll’avverzarie riuscetteno a rrussimà (pareggiare)  cu Willian-Josè; però pure russimanno (pareggiando) ‘o Napule  cunquistaje ‘a cualificazziona ê sidicesime d’’a cuppetta aiurupea rummanenno ‘ncimma a ll’jauallo (girone)! E cchesto jevemo ascianno! Passammo ê ppaggelle:

OSPINA[Pastacrisciuta] 7: Nun tenette itimme (colpe) ‘ncopp’ô stuco (gol) pigliato e pp’’o riesto fove sempe attiento ‘int’a cchiú ‘e n’accasione.

 

DI LORENZO 6: Pure quanno affruntaje ll’avverzarie senza essere ajutato se facette rispettà guardannose a mmestiere ‘a castagna.

 

MAKSIMOVIC[‘O ‘Ntontero] 5: Sturduto e stutecato (distratto) jette spisso ‘int’ê chiavette asasa (soprattutto) ascenno.

 

KOULIBALY[‘O Ggialante] 6,5: Pulito e sistimato  ‘int’ê stibbacche  (nei duelli) e ascenno.

 

MARIO RUI 6,5: Se vedette poco e nniente annante e gghiette meglio arreto  pure si ce mettete ‘nu poco ‘e tiempo pe ppiglià ‘e mmesure  ‘e Januzaj. Però passanno ‘e minute s’attestaje ‘mpusizziona, mantenette ‘a carma e nnun sbagliaje niente cchiú più nulla [Da ll’82’ GHOULAM 4,5: Me dispiace ma fove troppo stutecato  (distratto) ‘nnaccasione d’’o stuco (gol) spagnuolo e nnun ce ‘o ppozzo perdunà].

 

FABIÁN RUIZ[Anemalonga] 5,5: Nunn’ è ‘nu matustejo (mediano) e sse vedette: jucaje tanti pallune, ma nun fove maje cuncreto e nnun fove capace ‘e spaccà ‘a mubbara  (la partita).

 

BAKAYOKO 6,5:  Mumazza atalossa ( ottimaprova) ‘e sustanza ‘nnante â trasera  (difesa). Cumminfatte ‘mmiezo ‘o  Rial(le) nun riuscette a sfunnà. [Dô 70’ DEMME 6: Trasette pe ffà risciatà ‘o francese cunfermanno ‘a fatica fatta da Bakayoko.]

 

ZIELINSKI 7,5: Fove ‘o meglio d’’e suoje e sse dette da fà pe ttutt’’o sibbacco (match). Ll’addaffa (rete) soja ô 35’ fove ‘na vera perna ca Remiro manco vedette! [Dô 74’ ELMAS s.v.].

 

LOZANO 6,5: Currette assaje magnannose ‘a ferza ‘e dritta e ccercaje d’essere periculuso mettenno ‘ndifficultà ‘a trasera (difesa) spagnuola, peccato ca lle mancaje ‘a pricisione! [Dô 70’ POLITANO 5,5:  Trasuto quanno ‘o Napule era cchiú ccuncentrato a mmantené ‘o natiggio (risultato) nun se vedetteno ‘e ssolite jucate soĵe e ssulo ‘na vota criaje n’accasione   sfruttanno ‘nu ‘nzertamiento (inserimento) ‘e Di Lorenzo].

 

MERTENS[Ciruzzo] 5,5: mubbara (partita) difficultosa pe Cciruzzo ca pruvaje sulamente a staccarese dâ difaja   (difesa) spagnuola ca addecattaje  (pressò) assaje auta, e ccercaje ‘e favurí ‘o nzertamiento (inserimento) d’’e  cumpagne visto ca ‘o Napule bbaniava (costruiva) poco. [Dô 70’ PETAGNA 5,5: diffajaje (difese ) ‘a palla luttanno ‘mmiez’ô campo, cercanno ‘e cullecà ‘e ddoje sezzione: armidannon  (centrocampo) e attacco, ma nun fove capace d’essere periculuso sotto porta.]

 

INSIGNE 5,5:  Jucaje senza ggenio senza maje farese apprezzà lla ‘nnante; però dètte ‘na mano â scuatra quanno nce fove da  da sufferí. Êsse avuto fa ‘e cchiú!

 

 

 all. GATTUSO 6- : ‘E riffe o ‘e raffe ‘a scuatra soja centraje ll'ubbiettivo ca s’era pruposto. Sbagliaje però a  mettere  a ffà ‘o matustejo (mediano) a Anemalonga lassanno ‘mpanca a Ddemme e sbagliaje a llevà a Mario Ruio facenno trasí  a Gghoulam(me) proprio quanno ‘e spagnuole cercajeno ‘o russimmo.

arb. GRINFELD 4,5 E ll’aggiu trattato. Ucummaje (arbitrò) cu ‘e ffelle ‘e presutto ‘ncopp’a ll’uocchie sempe ‘ndanno d’’o Napule. Addirittura ‘nu paro ‘e vote cunzideraje peccate sciué-sciué ddoje trasute carogne ‘ncuollo a Llozano ô lemmeto d’’a muntaca (area di rigore) d’’o Rial(le) sparagnanno ê spagnuole ‘nu paro ‘e cartelline russe; ‘a tiraje p’’e llonghe ma s’êtte ‘a fottere pecché pure russimanno (pareggiando) ‘o Napule passaje ‘o turno ‘ncimma a ll’ajuallo (girone).

E bbasta accussí. Vulévemo passà ‘o turno e affuzzà (vincere) ll’ajuallo (girone) e cce riuscettemo. P’’o mumento accuntentammoce. Mo turnammo a ppenzà ô campiunato e ssi ‘o Cielo ‘o vvo’ ce sentimmo llunnerí ca vene pe ccuntareve che facimmo ô Maradona dummeneca ca trase a ll’ora d’’a tiella contr’â Sampedoria.

Tengo bboni speranze. Staveti bbe’ Raffaele Bracale Brak