NAPOLI – MILAN (22.02.16) 1 a 1 ‘A VEDETTE ACCUSSÍ

NAPOLI – MILAN (22.02.16) 1 a 1 ‘A VEDETTE ACCUSSÍ Che delusione guagliú e cche ccollera p’’a granna accasiona perza ajeressera ô san Paolo addȯ ‘o Napule s’’a vedette cu ‘a scuatra ‘e ll’unnice zappielle d’’o zincaro e êsse avuto assulutamente vencere apprufttanno d’’o miezu passo favezo d’’a vecchia zoccola a bBulogna e ‘mmece s’êtt’ ‘a cuntentà ‘e ‘nu pareggio scartellato [pe uno a uno] ca è acqua ca nun leva sete e sserve poco p’’o pruggetto finale… Che ggranna accasione perza! Soprattutto pecché ‘a scuatra d’’o zincaro scesa ô san Paolo a ffà ‘nu granne catenaccio,[purtannose â casa ‘nu punticiello] pe tutt’’o primmo ajone (tempo) nun passaje maje ‘a linia d’’a mità ccampo e nnun tiraje maje ‘mporta e cce riuscette sulo ‘na vota ô 44’ quanno Bonaventura, lassato sulo libbero e ffranco a ‘nu metro ‘a Reina, ‘o futtette signanno ‘o stuco (gol) d’’o pareggio ca pe ttutta ll’arrancua (ripresa) ‘o Napule nun fove crestiano ‘e schiuvà cchiú p’’a collera nosta i ‘a cunzulazziona d’’e tanti cestarielle [capiggiate ‘a ggiggino uocchie-stuorte, pure ajeressera steva appustiato ‘ncopp’ê bbemate (spalti) a mmenarece ‘a favetta] ca ‘nturnejeano attuorno ô Ciuccio! E mmo? Nun m’’o spiate ca nun ‘o ssaccio! Saccio sulo ca mo mancano appena ddudice jurnate ô prazzo (fine) d’’o campiunato e nnun saccio si ‘o Napule ‘e rriesce a vvencere tutte ‘e mmubbare (partite) e ssoprattutto si ’a vecchia zoccola ‘o fa n’atu passo favezo, tenenno pure presente ca oramaje tutte ll’arbitre so’ state ‘mmezziate ca ‘o Napule nunn’ à dda vencere cchiú, comme succedette pure ajeressera ca bBanti (3) siscaje. pe ppartito pigliato, a ssenzo unico contr’ô Napule dànno ‘na mano â scuatra d’’o zincaro a ppurtarese â casa ‘o punticiello. I’ però nun voglio perdere ‘a speranza; ce voglio ancòra crerere, strignenno ‘e diente e ddànnoce cchiú ‘e ‘nu pizzeco ‘ncopp’â panza! Passammo ê ppaggelle: REINA s.v. Nun êtt’ ‘a fa ‘o riesto ‘e niente pe ttutta ‘a mubbara (partita)e ddurante ô primmo ajone (tempo) se spurcaje ‘e guante justo quanno êtt’’a lanzà ‘o pallone a ccinquanta metre; p’’o riesto niente ‘e niente. Êsse avuto ‘a fà ‘nu miraculo pe ‘mpedí ‘o pareggio, ma nun ce riuscette. Peccato! HYSAJ 5,5 Miezu zifo (voto) mancante p’’avé lassato sulo libbero e ffranco a ‘nu metro ‘a Reina a bBonaventura’nnaccasione d’’o pareggio e ppe nun avé chiammato a cCagliècònno a ddarele ‘na mana; ‘ncumpenso appressuraje (spinse) bbuono e spisso e sse facette apprezzà pe ‘na chiusura ô pprincipio d’arrancua (ripresa) ‘ncopp’ a bBacca. KOULIBALY 6 - Doppo pochi minuti asfaldaje a bBacca, mettenno ‘nchiaro ‘e ccose e ricuperaje ‘ncuollo a cchillu delinquente ‘e Niango ‘ntenziunato a ffà a mmazzate; straputere d’armaddia (fisico) e ‘na jella nera quanno ô 44’tuuccaje ‘e capa ‘o pallone servenno ‘nvuluntariamente a bBoventura appustiato ‘nnante a rReina! Bbona ll’arrancua (ripresa). ALBIOL 6 Appurtaje sustanza vedennosela spisso cu cchillu delinquente ‘e Niango ca quacche vvote ‘o superaje cu ‘e ttriste, ma senza cunsequenzie. GHOULAM 6 - Doppo dduje minute scarze ggià se prupunette ‘ncopp’â fascia ‘e mancina e ccu ‘na sustentazziona (appoggio) soja Insigne cercaje ‘a porta e mmettette dinto;p’’o rieste currette assaje cruzzanno (crossando) spisso pure si nun sempe ‘e cruzze (cross) arrivajeno a ddestinazziona! ALLAN 6 Dette ‘na sustanziosa mana ô pussesso ‘e palla, facenno a spurtellate ‘mmiez’ô campo cu cchiú dd’uno Uffenzivamente s’ allargaje cchiú ‘e ‘na vota cercanno ‘e dà spazzio a cCagliecònno a accentrarese comme siconna nassía (punta). (Da ll'80' GABBIADINI s.v.) JORGINHO 6 - S’ ‘a vedette ‘e bbella perzo ‘mmiez’ô quatrilatero Bacca-Niango-Montolivo-Kucka,riuscenno a llibberarese a mmestiere e ccercanno d’epitachinejà (velocizzare) e urtizzà (verticalizzare) senza però ca ‘e cumpagne lle jesseno appriesso! HAMSIK 5 Accuminciaje bbunariello e mme dètte ‘a ‘mpressione ca ‘o vvulesse fà, ma po s’ammusciaje quase súbbeto, sgunfiannose e nnunn’apprufittaje d’’o ppoco ‘e spazzio ca ‘o Milanno lle dètte. Dispiace d’’o ddicere, ma purtroppo, nun è cchiú ‘o Marechiaro ‘e ‘na vota e ‘o ddimustraje sparacchianno sulo ‘nu tiro ‘e mancina ‘ncurva. E cchesto fove tutto! CALLEJON 5,5 - Zapata mettette ‘a ponta d’’o pede ‘ncopp’a ‘nu bbellu pallone destinato ô Pipita, ca ô 30’ ivadaje (ricambiò) ‘a curtesia servennole ‘na palla ‘nteressante ma ‘o tiro ‘e mancina ‘e Peppe ‘a ‘nguenta fove troppo debbule. ‘Ncumpenso risultaje pulitelico (prezioso) quanno, cu ‘nu taglio suojo, ‘ncopp’ô stuco(gol) cuano (azzurro), tuattiraje (influí) ‘ncopp’â mancata parata ‘e Donnarumma; êsse avuto piglià ‘a mana adderitta a ddà ‘na mana a Hysaj pe gguardà a bBonaventura e nnunn’ ‘o ffacette! (Dô 65' MERTENS 5,5 Trasette e ffove jellato a ccogliere ‘o palo cu dDonnarumma spiazzato; p’’o riesto parette ca vulesse spaccà ‘o munno, ma puntualmente sbattette ‘ncopp’ a zZapata) HIGUAIN 5,5 Ancòra cu ‘e ppovere ‘nfose se dannaje sinamparco (comunque) ll’anema nsi’ a ll’urdemo asfissiato da zZapata e Alecso cosa ca nun lle permettette ‘e cercà cu ccunviziona ‘a porta, ma nun lle ‘mpedette ‘e furní tanti bbassurere (suggerimenti) p’’e cumpagne. INSIGNE 6 ‘Nu tiro ‘e dritta a ggiro, sparacchiato auto, ma pure ‘na bbona sintunia cu cCagliecònno i ‘o Pipita; truvaje però pochi spunte visto ‘e cuntinui dubblate (raddoppi) ‘e marcatura d’’e milaniste; po, finalmente e ‘mpruvvisamente cercaje e ttruvaje ‘a porta ‘e Donnarumma e, ccu ‘a deviazzione ‘e Abbate, signaje ‘o stuco (gol) nuosto ca ce facette sperà. Purtroppo però fove ll’unica cosa pusitiva ‘e Lorenzigno ca pirciò nun s’ammereta cchiú ‘e seje. (Dô 90' EL KADDOURI 4 Nun ‘o pozzo perdunà, pecché lle capitaje ‘ncopp’ô pere ‘o pallone d’’a nichemata (vittoria) ma isso ‘o rijalaje a dDonnarumma tirannole ‘a palla ‘mbraccio. Cose ‘e pazze! ) SARRI 5 Nun me piacette comme ‘mpustaje ‘o fullè (match)senza tené presente ‘o quase certo catenaccio d’’a scuatra d’’o zincaro, tanto è overo ca nfi’ â mez'ora ‘a scuatra cuana (azzurra) nun riuscette a vvení a ccapo d’’a facenna e isso nun tentaje ‘e metterce remmerio aumentanno súbbeto ‘o pisemo ‘e ll’attacco e cquanno se decidette mettenno dinto pure a gGabbiadini fove troppo tarde! P’’o riesto me parette ca quacche vvota mancaje ll’urdemu pasiglio (passaggio); po ce se mettette pure ‘o ppoco ‘e jella cu ‘o palo ‘e Mertenso e nnun ne venettemo a ccapo. Se facette jettà fora pe pruteste i ‘a scuatra a ll’arrancua (ripresa) se nne scennette assaje forze pe ‘nu calo atletico. Gioverì cu ‘o Villarrealle ‘a veco cumplicata e ttosta,ma – ‘e ‘na manera o ‘e n’ata - assolutamente ce âmm’’a levà ‘e pacchere ‘a faccia! A ll’arbitro BANTI e â chenca soja (3) aggiu ggià accennato! E ffermammoce cca dànnoce appuntamento, si piace a dDio, a vviernarì ca vene doppo d’’a mubbara ‘e ricresso (ritorno) cu ‘o Villarrealle [E.L.] ‘e ggioverí a ssera ô san Paolo, speranno ‘e putereve cuntà cose bbone! Staveti bbe’! Raffaele Bracale Brak