FRITTATA ‘E MACCARUNE SAFRUNATA

FRITTATA ‘E MACCARUNE SAFRUNATA

Chello ca ce vo’ pe ddoje perzone:
400 gramme  ‘e vermecielle o ‘e bucatine arvate (lessati) teniente teniente dinto a otto litre d’acqua salata vullente, sculate a mmestiere e ppassate pe mmez’ora dint’â jacciaja,  

4 ova,

2 cucuzzielle vierde   napulitane, lavate, asciuttate, spuntate e ttagliate a rundelle doppie  ½ cm.,

4 gruosse sciure jalizze(gialli) ‘e cucuzzielle, lavate, asciuttate, senza màstilo e pestílo  (gambo e pistillo) e spezzettate â zanfasòn,

2 spicule  d’aglio ammunnate e ntretate finu fino,

‘na farinula pe bbroro veggetale,

2 bustine ‘e safrone,

200 gramme ‘e   provola affummecata tagliata  a ffarinule ‘e ½ cm. ‘e ‘squina,

  ‘na presa ‘e sale duppio,
sale fino e ppepe janco mmacenato a ffrisco  q.c.n. v..
pecurino grattato  dduje cucchiare
 ‘Nu bicchiere e miezo d’ uoglio ‘auliva dunciglio.  

Comme se fa

Dinto a ‘na prupurziunata tiella ca nun azzecca ricà (versare) miezu bicchiere d’uoglio e a ffuoco allero fà piglià culore a  ‘o ttrigliato d’aglio; appena è ppronto agnadí (aggiungere) ‘e cucuzzielle i ‘e piezze ‘e sciure ‘e cucuzzielle jalizze, lavate, asciuttate, senza màstilo e pestílo  (gambo e pistillo) e spezzettate â zanfasòn; ‘nfonnere cu ‘nu cuppino d’acqua vullente addó so’ state accumpliate(sciolte)‘a farinula pe bbroro veggetale,

i‘e ddoje bustine ‘e safrone e llassà cocere a ffuoco allero pe diece minute; a 'o prazzo (alla fine)  regulà ‘e sale fino e ppepe janco mmacenato a ffrisco e mantenere ‘ncaudo.  

 A ‘stu punto sbattere  ll’ova dinto a ‘na zupperella cu ‘na presa ‘e sale fino, ddoje prese ‘e pepe e ‘nu pare ‘e cucchiare ‘e caso pecurino. Arvere ‘a pasta dinto a otto litre d’acqua vullente salata (vrancata ‘e sale duppio), scularla pronta pronta,metterla dinto a ‘na zuppiera, cummirla cu ‘nu filo d’uoglio e mannarla ‘nghiacciaja pe mez’ora;

súbbeto doppo ammiscarla cu  ll’ ova  sbattute, agnadí’e cucuzzielle e ‘e sciure fritte e ‘e ffarinule ‘e provola; cummiglià  e lassà  ‘nzapurí  allimmeno ‘nu quarto d’ora  ammiscanno ògne ttanto; ‘stu fatto s’ à dda fà assulutamente si no ‘o piatto nun riesce. Ricà tre ddete d’uoglio dinto a ‘na tiella ‘e fierro niro e a ffuoco allero fallo bbuono callentà; comme è pronto, revacà dinto a ‘sta tiella ‘a pasta cunnita furmanno aiutannose cu ‘na frucchetta ‘nu cuscio apprettato;suassà a mmestiere pe cquatto minute ‘na faccia e pe cquatto minute chell’ata; (p’avutà ‘a frittata ajutarse cu ‘nu gruosso cupierchio o cu ‘nu piatto ‘e purtata).  Serví  cauda o pure fredda comme cchiú ppiace.

raffaele bracale