RICATUNE SAFRUNATE D''O SALUMIERE

 

 

RICATUNE SAFRUNATE D’ ‘O SALUMIERE

 

Chello ca ce vo’ pe sseje perzone

600 gramme ‘e ricatune,

 ‘na cepolla ndurata ‘e Muntoro, ammunnata e ntretata fina fina,

‘na fella doppia ‘e murtadella ‘e ciento gramme tagliata a ffarinule ‘e ‘nu cm. ‘e squina,

ciento gramme ‘e pancetta affummecata  tagliata a ffarinule ‘e ‘nu cm. ‘e squina,

ciento gramme ‘e salame napulitano  tagliato a ffarinule ‘e ‘nu cm. ‘e squina,

tre  bustine ‘e safrone,

‘nu cerasiello percante(piccante)lavato, asciuttato e grabbato (inciso) p’ ‘o lluongo,

 ‘nu bicchiere d’ uoglio ‘auliva dunciglio,

‘nu bicchiere bicchiere ‘e vino janco asciutto,

100 gramme ‘e caso pecurino rattato finu fino,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata,

sale fino e ppepe janco macenato a ffrisco q.n.s.

 

Comme se fa

 

.Ricà ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolle e ô cerasiello percante; a ‘stu punto agnadí dint’â tiella ‘e ffarinule ‘e murtadella,pancetta e ssalame; ‘nfonnerle cu ‘o bicchiere ‘e vino,farlo svapurà e fà suassà per cinche minute sempe a ffuoco allero.    Fraditanto arevere teniente teniente ‘e ricatune dinto a ‘na caurara cu otto litre d’acqua vullente salata (vrancata ‘e sale duppio)e safrunata cu ‘e ttre bustine ‘e safrone. Scularle e revacarle dint’ â tiella cu ‘e ffarinule suassate; agnadí tutt’ ‘o ccaso pecurino, ammiscà e misturà pe cinche minute; â fine a ffuoco stutato  derrammà cu ‘o ‘o tuppeto ‘e prutusino lavato, asciuttato e ntretato finu fino;  ammiscà ancòra e ‘mpiattà. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale