VERMICIELLE A VVONGOLE ‘MBIANCO

VERMICIELLE A VVONGOLE  ‘MBIANCO

 

 

chello ca serve pe sseje perzone

600 gramme  ‘e vermicielle,

‘nu kilò e mmiezo  ‘e  vongole verace (chelle cu ddoje corne e ‘a scoza nera a strisce janche),

tre  gruosse puparule  (dduje russe e uno jalizzo) a cquatto pizze lavate asciuttate e arrustute a sciamma allera allera o dint’ô tiesto  (240°), po  spellate,scartate ‘e turzo, semmente e lummetelle (costoline) janche  e tagliate a sabbane (falde) piccerelle quanto ‘nu pollice,

quatte  spicule   d’aglio:  tre  ammunnate e ntretate finu fino e  uno ammunnato e scamazzato,

dduje bicchiere  d’uoglio ’auliva dunciglio (e.v.p.s. a f.), miezu bicchiere ‘e vino janco asciutto,

‘nu túppeto ‘e prutusino lavato, asciuttato e ntretato finu fine,

‘na fraschetella ‘e peperna spullecata,

 sale fino e ppepe niro macenato a ffrisco  q.n.s.

sale duppio ‘na vrancata

procedimento

Dinto a ‘na grossa tiella a sponne aute ricà(versare) ‘nu bicchiere e mmiezo d’ uoglio, agnadí(aggiungere) ‘nu spicolo d’aglio ammunnato e ntretato finu fino  e farlo addivintà junno junno a ffuoco allero; auní ‘e sabbane ‘e puparuole arrustute e spellate e lassà cocere  pe quase diece minute  avascianno ‘o ffuoco e accuncianno ‘e sale fino sulo all’urdemo. A chistu punto trasferí’e puparuole cu ll’uoglio ‘e cuttura dinto a ‘nu mmiscaturo (frullatore)  e sifflà(frullare) nfi’ a uttené ‘nu dellicato passato ‘a mettere ancòra dint’â tiella e tené ‘ncaudo a ffuoco miccio.

 

Fraditanto dinto a  n’ata grossa tiella, pruvvista ‘e cupierchio mettere ‘e vvongole lavate e spurgate,agnadirve n’aglio ammunnato e scamazzato,miezu  bicchiere d’uoglio e ‘o  vino; ‘ncupirchià e auzà ‘o ffuoco pe ffà arapí ‘e vvongole; quanno so’ tutte aperte piglià ‘e frutte ‘a dint’ ê scorze e mettere ‘sti frutte dinto a ‘na ciotola cummigliannole cu ‘o zuco d’apertura passato a ‘nu culaturo (filtro) ‘e tela a trama stretta. Mettere ancòra a ffuoco doce ‘a tiella cu ‘o passato ‘e puparuole e agnadirvi e vvongole cu tutto ‘o zuco lloro passato a cculaturo e lassà fèrvere pe n’ati ccinche minute; stutà ‘o ffuoco e auní ‘o ttrigliato ‘e prutusino e ‘a peperna spullecata; fraditanto arvere teniente teniente ‘e vermicielle dinto a ‘na caurara d’acqua vullente salata(vrancata ‘e sale duppio); appena pronte aizarle cu ‘nu frucchettone e metterle dint’â tiella cu ‘o zuco; ammiscà chianu chiano a mmestiere,derrammà abbunnantemente cu ‘o ppepe niro mmacenato a ffrisco e mmannà ‘ntavula caude ‘e fuculare chisti sabbruse vermicielle ca se ponno ausà ô posto d’ ‘e classiche vermicielle a vvongole cu ‘o zuco ‘e pummarole! Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute! Scialàteve e cunzulàteve ‘o vernecale!!

raffaele bracale

 

p.s.

quaccuno ausa, pe chesta ricetta,accussí comme p’ ‘e vermicielle a vvongole cu ‘o zuco ‘e pummarole, ausa agnadí ê vvongole pure tre cquarte ‘e kilò ‘e lupine trattate comme ê vvongole e ‘e vanno a auní a ccheste dint’ô zuco ‘e puparuole, tentanno ‘e migliurà ‘o sapore d’ ‘e vongole caso maje nun fossero verace. I’ nun cundivido ‘stu prucedimento   e penzo ca si nun se riesce a prucurarse ll’  autentiche, sapurite vongole verace ((chelle cu ddoje corne e ‘a scoza nera a strisce janche), meglio cagnà idea e accuntentarse d’ata ricetta  ( linguine cu ‘e jammare â vesuviana o vermicielle ‘e scammaro etc.).

Brak