VERMECIELLE RICCHE SAFRUNATE

 

VERMECIELLE RICCHE SAFRUNATE

 

Chello ca ce vo’ pe sseje perzone

600 gramme ‘e vermecielle,

 ‘na cepolla ndurata ‘e Muntoro ammunnata e ntretata,

300 gramme ‘e ricotta ‘e pecura,

2 bustine ‘e safrone,

½ bicchiere ‘e latte caudo retunno,

50 gramme ‘e ‘nzogna,

½ bicchiere d’ uoglio ‘auliva dunciglio,

‘na fella doppia ‘e murtadella ‘e ciento gramme tagliata a ffarinule ‘e ‘nu cm. ‘e squina,

100 gramme ‘e caso pecurino rattato finu fino,

‘nu tuppeto ‘e prutusino lavato, asciuttato e ntretato finu fino,

sale duppio ‘na vrancata,

pepe janco macenato a ffrisco q.n.s.

 

Comme se fa

 

Ricà ‘a ‘nzogna e  ll’uoglio dinto a ‘na prupurziunata tiella e a ffuco allero fà piglià culore ô ttrigliato ‘e cepolla;agnadí ‘e ffarinule ‘e murtadella e farle suassà pe tre minute;  a ‘stu punto agnadí ‘a ricotta dellajata cu ‘o miezu bicchiere‘e latte caudo retunno addó so’ state accumpliate ‘e ddoje   bustine ‘e safrone e lassà pappià pe ttre minute a ffuoco allero;  Fraditanto arevere teniente teniente ‘e vermicielle dinto a ‘na caurara cu otto litre d’acqua vullente salata (vrancata ‘e sale duppio). Scularle e revacarle dint’ â tiella  e tenercele pe quatto mminute sempe a  ffuoco allero, ammiscanno e  derrammanno cu ‘o ccaso pecurino,e cu  ‘o ppepe janco macenato a ffrisco; fora d’ ‘o ffuoco derrammà   cu ‘o tuppeto ‘e prutusino lavato, asciuttato e ntretato finu fino;  ammiscà ancòra e ‘mpiattà. Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale