ZITE SAPURITE
Chello ca serva pe seje perzone;
600 gramme ‘e zite murcellate a ppiezze ‘e quatto centimetre;
500 gramme (piso lisso) ‘e cemmetelle ‘e cavulisciore napulitano,
350 gramme ‘e saciccia senza pelle e spullecata,
‘nu bicchiere d’uoglio ‘auliva dunciglio,
‘nu spiculo d’aglio ammunnato e ntretato finu fino,
miezu bicchiere ‘e vino janco asciutto,
100 gramme ‘e caso pecurino grattato finu fino,
sale fino e pepe niro mmacenato a ffrisco q.c.n.v.
‘nu tuppeto ‘e prutusino, lavato, asciuttato e ntretato finu fino.
comme se fa
|
Ammunnà, lavà, e asciuttà ‘e cemmetelle e cavulisciore e metterle a àrvere pe cinche minute dinto a abbunnante acqua salata;sculate ‘e cemmetelle pronte pronte senza jttà ll’acqua addò mettere a àrvere ‘e zite murcellate a ppiezze ‘e quatto centimetre;mentre ‘a pasta coce mettere a zuffrijere a ffuoco allero dinto a ‘na prupurziunata cummedità bbona p’ ‘o tiesto ll'aglio dinto a ll’uoglio dunciglio; appena è junno junno agnadí ‘a saciccia senza pella e spullecata; doppo 5 minuti, ricà cu ‘o vino, farlo svapurà e agnadí ‘e cemmetelle ‘e cavulsciore arvate, avascià ‘o ffuoco, accuncià ‘e sale e ppepe e lassà ‘nzapurí pe quacche minuto; sculà ‘e zite pronte pronte, agnadirle ô zuffritto,derrammà cu ttutto ‘o ccaso, ammiscà e mannà dint’ô tiesto ggià caudo a 180 °C pe ‘na dicina ‘e minute.’Mpiattà derramanno ogne purzione cu ‘o prutusino e serví caude ‘e tiesto chisti zite sapurite. Vino: asciutte e profumate janche nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule, bbona salute! Scialàteve e cunzulàteve ‘o vernecale!! raffaele bracale
|
|
|
|
|
|
. |
|
|
|
|
|
|
|
|
|
|
|
|
|
|
|
|
|
|
|
Nessun commento:
Posta un commento