VERMICIELLE FRIJENNO MAGNANNO

VERMICIELLE FRIJENNO MAGNANNO

Chello ca serve pe cquatto perzone

400 gramme ‘e vermicielle,

‘nu bicchiere d’uoglio ‘auliva dunciglio,

200 gramme ‘e muzzarella tagliata a ffarinule ‘e ‘nu cm. ‘e squina,

200 gramme ‘e casecavallo percante (piccante) tagliato a ffarinule ‘e ‘nu cm. ‘e squina,

200 gramme ‘e salame Napule  tagliato a ffarinule ‘e ‘nu cm. ‘e squina,

‘na grossa pummarola ramata matura scuttata, spellata e ttagliata a ffarinule ‘e ‘nu cm. ‘e squina,

‘nu tuppeto ‘e vasenicola lavato asciuttato e murcellato (spezzettato) a mano senza curtiello,

sale fino e ppepe niro mmacenato a ffrisco q.n.p.

sale duppio ‘na vrancata.

Comme se fa

Appruntà muzzarella, casecavallo, pummarola, salame  e vasenicola e mettere tutto dinto a ‘na prupurziunata zuppiera; accuncià ‘e sale fino e ppepe, ricarve tutto ll’uoglio e tené ‘e parte. Appruntà ‘a tiana pe cocere ‘a pasta cu abbondante acqua salata (vrancata ‘e sale duppio).Appena jesce a vvollere menà ‘e vermicielle e ô posto d’ ‘o cupierchio  metterce ‘a zuppiera appruntata cu ttutto chello ca serve.Appena so’ vierde vierde,piglià cu ‘nu frucchettone ‘e vermicielle e revacarle dint’â zuppiera cu ‘a cunnimma appruntata. Ammiscà accuratamente per cquatto minute cu ddoje furchette, mpiattà e dderramà ‘e ppurzione cu atu pepe niro mmacenato a ffrisco e serví súbbeto ‘ntavula.  Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta.

Magna Napule,  bbona salute e scialàteve!

Raffaele Bracale