RICCHIETELLE CU ‘E VRUOCCOLE

RICCHIETELLE CU ‘E VRUOCCOLE

chello ca serve pe sseje perzone ‘nu père ‘e vruoccolo ‘e fronne (‘e ‘nu kilò scarzo) ammunnato, tagliato a ccemmetelle e lavato, 6 gramme ‘e ricchietelle ‘e semmola, ‘nu bicchiere d’uoglio  ‘auliva dunciglio, dduje spicule d’aglio ammunnate e ntretate finu fino, ‘nu cucchiaro ‘e pignuole, ‘nu cucchiaro abbunnante d’uva passa ammullata, ,100 gramme ‘e sulumiglie d’alicesalate sott’uoglio,  ‘nu puparunciello  percante (piccante)lavato, asciuttato e grabbato (inciso) p’ ‘o lluongo, sale duppio ‘na vrancata, sale fino e ppepe janco macenato a ffrisco q.n.s., 100 gramme ‘e pecurino rattato finu fino.   Comme se fa Mettere a vollere ‘na caurara cu otto litre d’acqua salata e appena ll’acqua jesce a vollere, àrvere pronte pronte ‘e cemmetelle d’ ‘o père ‘e vruoccolo, scularle e tenerle a pparte astipanno ll’acqua ‘e cuttura; dinto a ‘na prupurziunata tiella a sponna auta ricà ll’uoglio, agnadirve ll’aglie ntretate, ‘nu puparunciello  pirciante (piccante)lavato, asciuttato e grabbato (inciso) p’ ‘o lluongo, ‘e sulumiglie d’alicesalate sott’uoglio, e farle sciogliere a ffuoco allero; a chistu punto agnadí ‘e cemmetelle arvate e farle ‘nzapurí pe diece minute accuncianno ‘e sale fino e ppepe macenato a ffrisco.Fraditanto fà vollere n’ata vota ll’acqua ‘e cuttura d’ ‘e cemmetelle e appena ll’acqua jesce a vollere, àrvere pronte pronte ‘e ricchietelle; scularle e revacarle dint’â tiella cu ‘e ccemmetelle e ‘a cunnimma. Tuiglià pe tre minute a fuoco miccio; agnadirve ‘o pecurino rattato, ‘mpiattà e serví caude ‘e fuculare chesti ricchitelle sabrose! Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale