RICCE ‘E FURETANA PERCANTE

RICCE ‘E FURETANA PERCANTE Chello ca ce vo’ pe sseje perzone: 600 fgramme ‘e ricce ‘e furetana, ½ bicchiere d’ uoglio ‘auliva dunciglio, ‘nu cucchiaro ‘e ‘nzogna, 300 gramme ‘e patane vecchie ammunnate, tagliate a ffarinule ‘e ‘nu centimetro ‘e ‘squina e lavate, ddoje bustine ‘e safrone, 100 gramme ‘e sulumiglie d’alicesalate sott’uoglio, 150 gramme d’aulive nere desciussate, ‘nu spiculo d’aglio ammunnato e ntretato finu fino, ‘na cepolla ndurata ‘e Muntoro ammunnata e ntretata fina fina, ‘nu cerasiello  percante (piccante)lavato, asciuttato e grabbato (inciso) p’ ‘o lluongo, sale duppio ‘na vrancata, sale fino e ppepe janco macenato a ffrisco q.n.s.,   Comme se fa: Ricà dinto a ‘na tiella a sponna auta e pruvvista ‘e cupierchio ll’uoglio e ‘a ‘nzogna, agnadirve ‘o ttrigliato d’aglio e de cepolla  e ‘o  cerasiello  percante (piccante)lavato, asciuttato e grabbato (inciso) p’ ‘o lluongo e a ffuoco allero fà piglià culore ô zzuffritto; agnadirve‘e patane vecchie ammunnate, tagliate a ffarinule ‘e ‘nu centimetro ‘e ‘squina e lavate e ‘e ddoje bbustine ‘e safrone accumpliate cu ‘nu bicchiere d’acqua vullente; ammiscà e lassà cocere pe vinte minute a ffuoco miccio.Ntretà ‘e sulumiglie d’alicesalate cu ll’aulive dusciussate e agnadií ‘stu trigliato dint’â tiella; accuncià ‘e sale e ppepe e tené sempe a ffuoco miccio pe cinche minute ammiscanno spisso. Fraditanto fà àrvere pronte pronte ‘e ricce ‘e furetana dinto a otto litre d’acqua vullente salata (vrancata ‘e sale duppio); scularle e revacarle dint’â tiella e  tuïglià pe tre minute a fuoco miccio; ‘mpiattà e serví caude ‘e fuculare ‘sti ricce ‘e furetane   sabruse! Vino:  asciutte e profumate janche  nustrane ( Solopaca, Capri, Ischia, Falanghina, Fiano, Greco ‘e Tufo) fridde ‘e jacciaja o ‘e ‘rotta. Magna Napule,  bbona salute! Scialàteve e cunzulàteve ‘o vernecale!! Raffaele Bracale

.