NAPOLI .BOLOGNA [28.10.21] 3 A 0 ‘A VEDETTE ACCUSSÍ

NAPOLI .BOLOGNA [28.10.21] 3 A 0

‘A VEDETTE ACCUSSÍ

Tutto a pposto guagliú! Pure vestuto a llutto cu cchella maglia nera  abbremecuta ‘e felinie, ‘o Ciuccio ajeressera ô Maradona se mettette tre ppunte sustanziuse dint’â sacca facennoce vedé ‘na scuatra ca sapette chello ca vuleva e ll’avette mantenennose sempe accurciata, adduania (aggressiva) i a ll’attacco cusicché jette a fferní cumm’êv’’a ferní cu ‘a scuatra nosta ca se magnaje pe ttre a zzero  ‘nu  Bulogna appaurato e ssenza forza e gghiette a repiglià cu vintotto punte  ê diavule russe e nnire ‘ncimma â crassifica, anze – a ccunte fatte – si nun me sbaglie simmo nuje ‘e primme pecché è overo ca avimmo fatto vintidoje addaffe (reti) mentre ‘o Milan(ne) ne à fatto vintitrè, ma nuje nn’àmmu pigliato sulo tre e lloro nove e ssi tanto me dà tanto stammo ‘nnante nuje ‘e cinche stuche (gol). Turnammo a nnuje e ddicimmo ca ajeressera dicidetteno ô 17’   ‘nu tiro a ggiro d’Anemalonga ca sbluccaje ‘a facenna  e dduje ricure [41’ e 62’] sacrusante ca se prucuraje Caromecosta,   ancòra  tirate  dô capitano ma finalmente! signate tutt’’e dduje!

Passammo ê ppaggelle:

 OSPINA[Ecchesepastacisciuta] 6,5: Che spettaculo quanno cu ggranna pricisione tajllaje (rinviò) luongo a vvuolo! Rrobba ‘e s’alliccà ‘e mustacce, pecché p’’o riesto s’êtte ‘a spurcà ‘e guante sulo ‘nu paro ‘e vote: ‘na vota ‘ncopp’a ‘nu tiro ‘e squina (corner) quanno se facette luongo e ‘mmiezo a ‘nu zzerri-zzerro ‘e jucature cu ‘e pponte d’’e ddete levaje ‘a miezo ‘o pallone e n’ata vota  cu ‘na bbona   parata pe ffermà  ‘na cunchiusiona periculosa d’Orsolini ô niajo (nel finale) nel finale.

 DI LORENZO 6,5:Atalossa (prestazione) pusitiva dint’ê dduje ajune currenno ‘e cchiú a ll’arrancua (nella ripresa) quanno mettette ‘int’â muntaca (area di rigore) d’e mmurtadelle ‘nu paro d’jabbre (cross) periculuse.

 RRAHMANI 6,5: ‘o Bbulogna nun ‘nfratuaje (minacciò) maje ‘e sfunnà, ma isso nzerraje ‘e pporte cu catenaccio e ppalillo mettennose ‘int’â sacca a Bbarrow(ve) ggià dê primme minute e ppo se spassaje a ggestiunà (gestire) ll’urdinario.

 KOULIBALY[‘O Ggialante] 7:Solita atalossa (prestazione) sustanziosa; dê pparte soje nun se passaje; scuraggiaje ll’avverzarie e ggià dâ mmità d’’o primmo ajone (tempo) nisciuno avette ‘o cuorio d’affruntarlo.  

Mario RUI 7:  Tutte ‘o cercajeno e isso se facette ‘nu mazzo tanto nun sulo ‘ncopp’â ferza mancina, ma addó capitaje  tuccanno ‘na cifra ‘e pallune, ancercanno (anticipando) nchiudenno e ccupulianno (dialogando) cu ‘o capitano e riuscette pure ‘nu paro ‘e vota ‘e truvà ‘o murra (lo specchio) d’’a porta d’’e murtadelle. [Da ll' 87' GHOULAM s.z.]

 Zambo ANGUISSA[‘O ‘Ntussecuso] 7:Se dette da fà ‘nchietta cu Anemalonga cercanno e sfruttanno ll’affàrache (gli spazi) nicessarie pe mmimmaddà (verticalizzare) ‘o juoco. Cercaje ‘a porta da luntano, ma ppoco mancaje ca nun spezzasse ll’afachia (la traversa). Che peccato!  [dô 75' DEMME 6:Cu ccegna (grinta), armizzanna (equilibrio) e azzaja(caparbietà) accumpagnaje ‘a munava (manovra).]

Fabian RUIZ[Anemalonga] 7,5: ‘A scuatra ajere dipennette da isso e ddô cumpagno ‘e sezziona e isso jette subbeto a ccercà e a ttruvà furtuna ‘nfra ê llinie d’’a trasera (retroguardia) d’’e murtadelleca ‘o lassajeno fà e sse n’ arrepentajeno (se ne pentirono) ggià ô 17’ quann’isso piazzaje cu ‘na pennellata d’artista ‘o pallone sotto a ll’afachia (traversa dint’ô sette cchiú luntano addó Skorupski, manco si êsse tenuto ‘e scelle êsse pututo arrivà! Applavuse.

 ELMAS[‘O Turco] 6:  A ffà male nce penzajeno ll’ate, isso alicante e dellicato (raffinato),urdinaje e pulezzaje tanti pallune facennose apprezzà.[Dô 75' MERTENS[Ciruzzo] 6,5Se chiammaje ll’applavuse d’’o Maradon speretato (indemoniato) ‘mpressiona(in pressing) ] 6,5.

 LOZANO 5,5: Fove ll’unico nunn’a ll’ardezza; ‘e pusitivo sulo ‘nu  catio (un taglio) a ll’uso d’’a bbonanema ‘e Peppe ‘a ‘nguenta, ma p’’o  riesto fove troppo casinista e sbafante (fanfarone) senza zuco e ccunnimma.  [dô 65' POLITANO 6- Sulo quacche ccusarella pe rrennere cchiú leggia ‘a munavara (manovra) d’’e cuane  (partenopei), ma senz’essere maje periculuso.]

 OSIMHEN[Caromecosta] 7: S’appustiaje ô lemmeto d’’a muntaca (dell'area di rigore), pronto a ffà male si fósse trasuto e ccumminfatte trasette e sse jette a pprucurà dduje ruicure sacrusante.  

 INSIGNE 8:Serata da ‘ncurnicià p’’o capitano ca nun sulo ggiustranno ‘ncopp’â ferza mancina tagliaje e ccusette cchiú ‘e ‘nu pallone a mmesura pe Llozano e ccumpagne, ma po (‘o miraculo!)  s’appresentaje a ttirà dduje ricure e ffinalmente ‘e mmettette dinto tutt’’e dduje e ‘o  Maradona lle facette tanti cicerennammuolle (coccole). [dô 65' ZIELINSKI 6: Se piazzaje ‘ncopp’â trecquarte rennennose mufiddo  (utile) cu ‘nu paro ‘e cunchiusione e ccagne ‘e strata].

vice all. DOMENICHINI 6,5: Fove meno cummediante ‘e Spalletti, nun se sbracciaje, né aizaje ‘a voce, ma ce facette vedé ‘nu Napoli patrone d’’o juco e d’’a sciorta soja, catra (locomotiva) cignosa (grintosa) ca arrivaje addó vulette.

arb. SERRA 5,5 Facette quase tutto ‘o duvere suĵo ma ‘a Varra pe ddoje vote ll’êtte chiammarselo a dduvere. E mmenu male! Pe nnun dicere ca spisso se mettette ‘mmiez’ê piere mo d’’e nuoste, mo d’’e lloro ‘mpicciannoe e ‘mpicciannole.

E ffermammoce cca cuntente ‘e comme vanno ‘e ccose e ddamoce appuntamento, si ‘o Cielo ‘o ppermette pe llunnerì ca vene p’’e pparlà d’’a mubbara (partita) ca ‘o Ciuccio va a ffà dummeneca mmerz’ê sseje a Ssalierno contr’ê lucale.

‘E CCHIÚ, ‘E CCHIÚ, ‘E CCHIÚ CIUCCIO FA’ TU!

Staveti bbe’.

Raffaele Bracale Brak