lunedì 3 aprile 2017

NAPOLI – JUVENTUS (02/04/17) 1 A 1 ‘A VEDETTE ACCUSSÍ





NAPOLI – JUVENTUS (02/04/17) 1 A 1
‘A VEDETTE ACCUSSÍ
Mannaggia chello ca nun se po’ ddicere, guagliú! Niente ‘a fà! Ajeressere ô san Paolo, ‘nnante a ‘nu tummulo ‘e masciadde (spettatori) ca ce facetteno ‘na capa tanta a bbott’ ‘e siscà, ‘o Napule  scennette ‘ncampo, p’’a tarra  (sfida) ‘e campiunato, contr’ô vecchia zoccola [ca tenette ‘a faccia tosta ‘e metterese – pe sfreggio – ‘na maglia luvarda (azzurra)] e ccu ttutto ca dimustraje   ‘e puteresela jucà a pparo a pparo cu ‘a scuatra d’Allegri,anze jucanno assaje meglio d’essa...,purtroppo nun riuscette a llevarese ‘e pacchere ‘a faccia piggliate a ll’addabba e s’êtte accuntentà ‘e ‘nu scartellato russimmo (pareggio) p’uno a uno cunquistato dô capitano    ô 60’, doppo n’ora ‘e juoco per risponnere a ll’addaffa (rete) ca ô 7' êva signato  Khedira, presentatose pe ffotterlo cu ‘nu càtaro (diagonale)forte ‘e dritta, a    scarze dduje metre dô Prevetariello, passanno comme a ‘nu lampo ê spalle d’Albiollo e ssenza ca Allanno ll’ustaculasse.Chesto pe dicere ca tuitto summato ‘o natiggio (risultato) d’ajeressera fove busciardo i ‘o Napule, pe cchello ca facette, se fósse mmeretato ‘e vencere i avesse pututo farlo si Marechiaro,Lorenzigno  e cCiruzzo nun êsseno perzo tre o quatto bboni accasione. E si fósse succieso  nnisciuno êsse pututo dicere niente visto ca ‘a vecchia zoccola scennette ô san Paolo addirittura  a ffà catenaccio, jucanno comme a ‘na pruvinciale, tant’è vvero ca doppo ‘e ll’addaffa (rete) d’ ‘o 7’ pe vedé ‘o Prevetariello custretto a ffà  coccosa, êttem’aspettà ‘o 74’; pe tutt’ ‘o riesto d’’o sibbacco (match) vedettemo sulo ‘o Napule attaccà a ccapa sotto mentre ‘a vecchia zoccola se difenneva pure cu ddiece ‘e lloro e mmanco pulito, ma straccarellanno e mmazzulianno ‘e nuoste cu ‘a benedizziona ‘e chella sacchetta d’’a munnezza ‘e ll’ummeto d’Orsato [4 e ppo ve dico]. Passammo ê ppaggelle:



RAFAEL[‘O Prevetariello] 6 Êtt’’a fà poco e nnun tenette  sfarme (colpe) ‘ncopp’a ll’addaffa (rete) janca e nnera,signata  Khedira arrivato troppo vicino libbero e ffranco.
 HYSAJ 6  Mandzukiccio lle facette ‘nu bbaffo a tturtgliune i ‘a meza cucchiara albanese se facette vedé pure annante. ALBIOL 5,5 – miezu zifo (voto) mancante pecché si ‘a trasera  (difesa) cuana (azzurra)riuscette a ttené bbuono contro ll’uggiummo (attacco) jummerdino ,’o spagnuolo êsse avut’’a fà coccosa ‘e cchiú ‘nnaccasiona  ‘e ll’addaffa (rete) ‘e  Khedira.
KOULIBALY 6,5  Cuncentrato e attiento pe tutte ‘e nuvanta  minute, tutto summato fove ‘o meglio d’’a zaca (retroguardia) cuana  (azzurra) e fforze uno d’’e meglie ‘ncampo, risultanno azazo  (essenziale) a ccassà dô campo a cchella lota cainno (traditore) ca nun dico!
STRINIC 6   Miso ‘ncampo a surpresa s’’a vedette a mmestiere primma cu lLeminà e ppo cu  Cuadrado. Ascette pe ‘nu ‘mpiccio musculare. [dô 79’ GHOULAM sv]
JORGINHO 5,5  miezu zifo (voto) mancante pecché ‘o riggista brasiliano ajere me parette poco priciso e ppoco attiento.
Allan 5 Nun s’ammereta ‘e cchiú pecché si luttaje,currette e cce mettette cegna (grinta), se vedette sulo a ll’epata (fase) difenziva e ppe nniente ‘int’a cchella uffenziva  sbaglianno  troppi pallune ‘mpurtante e soprattutto se purtaje ‘ncopp’â cuscienza d’avè lassato libbero e ffranco a cKhedira   ‘nnaccasione d’’o stuco (gol) jummerdino! [dô 69’ ZIELINSKI s.v. Trasuto a gghiuoche fatte e cu ‘a vecchia zoccola asserragliata a ddifennere ‘o russimmo (pareggio)putette fà poco.]
Hamsik[Marekiaro] 6,5 Nun lle pozzo mettere  ‘e cchiú pecché si ‘o Capitano,avette ll’jadara   (merito) ‘e signà ll’addaffa (rete) d’’o russimmo (pareggio) nuosto, sprecaje pure ddoje bboni accasione . [dô 76’ Rog s.v.stessu trascurzo ‘e Zielinski]
CALLEJON [Peppe ‘a ‘nguenta] 5  Nun me dicite niente, ma ajere nun me piacette e mme parette fora cundizziona. I’ ll’êsse fatto arrepusà!
MERTENS [Ciruzzo] 6,5 – Comme a ssempe uno d’’e cchiú ppericuluse d’’o Napule cu  ll’jadara   (merito) ‘e ll’jusaida (assist) ô capitano;’e cchiú cugliette ‘nu palo vascio ca nc’êsse pututo dà ‘a nichemata (vittoria) ca ce fossemo mmeretata. Peccato!  
INSIGNE[Lorenzigno] 6  Cchiú ‘e n’ora jucata a mmestiere  a ttutto campo, pure si sprecaje ‘na bbona accasione; peccato però ca arrivate  a ll’urdema mez’ora, ‘int’ô chiuvo, sparette!
All. SARRI 5  Nun se mmereta ‘ecchiú dàtose ca êsse avut’’a sapé ca ‘a vecchia zoccola fósse scesa ô san Paolo pe gguardarese ‘o prozo, facenno addirittura catenaccio e ppirciò isso  avesse avut’’a mettere ‘ncampo ‘na scuatra cchiú attrezzata pe sfruttà ll’accasione criate. Pe ‘na mubbara accussí nun puó tenerte ‘mpanca ggente comme a
 Zielinski o Rog(go) capace ‘e vedé ‘a porta e addirittura a ssant’Arcadio ca ‘int’â muntaca (area di rigore) nun tene chi ‘o ferma!
Arb. Orsato [4]  ‘Sta sacchetta d’’a munnezza ‘e ll’ummeto siscaje pe ppartito pigliato, o pe ‘mmasciata avuta, sempe contr’ô Napule, caputianno ‘e carí (falli) e nchiudenno ll’uocchie ‘ncopp’ê ffetenzie d’’e chianchiere jummerdine ca ggià dô sicondo minute,pazziajeno a ffà male  cu cchella lota ‘e Chiellini, ch’isso nun nutizziaje (ammoní).
E ffermammoce cca, dànnoce appuntamento, si ‘o Signore ‘o vvo’, a ggioverí ca vene doppo d’’o sibbacco (match) d’eiuda (ritorno)   ‘e coppa itaglia sempe ô san Paolo e ssempe contro ‘a vecchia zoccola, mubbara (partita) ca s’à dda vencere assulutamente e ppe ddoje a zzero,  speranno sempe ca Sarri se decide a ffà jucà Zielinski o Rog(go) e sfrutta finalmente a ssant’Arcadio tenennose ‘mpanca a pPeppe ‘a ‘nguenta! Staveti bbe’.
R.Bracale Brak

Nessun commento: