sabato 30 dicembre 2017

CROTONE – NAPOLI (29/12/17) 0 A 1 ’A VEDETTE ACCUSSÍ



CROTONE – NAPOLI  (29/12/17) 0 A 1
’A VEDETTE ACCUSSÍ
Eccuce cca guagliú. Alleluja, alleluja! Ajere a nnotte   se turnaje da Crutone cu ttre punte d’oro dint’â sacca e cu ddoje nutizzie ‘mpurtante: ‘a primma fove chella d’’a nichemata cuana (vittoria azzurra), ca cunfermaje ‘o Ciuccio ‘ncimma â crassifica d’’o campiunato, ô ssicuro ‘e nun puté essere ancappato dâ vecchia zoccola, assignanole ‘o titulo ‘e primm’aletto ‘e vierno ca po’ essere ‘nu bbuono arcabbanno (viatico) pe cchello ca vulimmo e sperammo succere a mmaggio; ‘a siconna nutizzia fove ca Marekiaro ce cunfermaje ca s’era definitivamente repigliato e scetato tant’è overo ca fove proprio isso a cunzignarce ‘e tre ppunte ‘e ‘na nichemata  (vittoria) cchiú ca maje ‘mpurtante contro  a ‘na scuatra[pur’essa, cumme Atalanta e sSassuolo, assineja (satellite) d’’a vecchia zoccola ] ca, ‘ncopp’a ‘nu campo ‘e patane  ce mettette cegna  (grinta) e ccattiveria pe ffarce ‘o sgambetto, ma nun ce ‘a facette pure si Cordazzo doppo ll’addaffa (rete) pigliata, cacciaje ‘a scienza e sse mettette a ffà ‘e miracule  dicenno ‘e no cchiú ‘e ‘na vota a lLorenzigno i a pPeppe ‘a ‘nguenta.... cosicché se vincette sulo p’uno a zzero ‘mmece d’’e duje o tre stuche (gol) ch’âssem’avuto ‘a signà! Sinamparco (comunque) avastaje chillo d’’o capitano e ccumplessivamente ‘o Ciuccio dimustraje pure ajere cchiú ssicurtà (sicurezza) e ccumminziona a ppietto d’’o  ppassato...Simmo sempe cchiú fforte â faccia ‘e chi ce vo’ male i à dda murí cu ‘o fieto ‘e ggravone. Mo ce âmm’ ‘a sulo credere pe vvencere ‘o campiunato. E i’ dico ca è ppussibbile!
Passammo ê ppaggelle:
REINA 6,5  Durante ‘o primmo ajone tuccaje palla pecché nce ‘a passajeno ‘e cumpagne si no, sfastediato ‘e nun fà niente, se ne fósse  pure jito â casa; ‘mmece a ll’arranqua, quanno ‘o Crutone tentaje ‘e russimà(pareggiare)êtte faticà primma cuntrullanno ‘na palla periculosa ‘e Stoianno, po salvanno ‘ncopp’a ‘nu pallunetto ‘e  Trotta e ccumpletaje ‘a jurnata cu ‘na granna parata ‘nfuffo pe ffermà ‘na palla velenosa ‘e  Crociata.
 MAGGIO 6 Se dette da fà ‘ncopp’â curzuia soja soprattutto difennenno.
ALBIOL[‘O Masto] 6  Mantenette ‘a pusizziona sfruttanno ll’acerche (anticipi) d’’o gGialante. Fove nutizziato  (ammonito)  pe ‘nu carì  (fallo) ca s’êsse pututo sparagnà.
KOULIBALY[‘O GIALANTE] 7 ‘A solita trancara (diga)  sicura, attienta, affattiva (efficace).Vale tant’oro quanto pesa e fforze ‘e cchiú.
 HYSAJ[Meza Cucchiara] 6,5  Custretto a gghiucà a mmancina  nun sulo facette ‘na bbona fijura, ma se facette apprezzà pe cumme cupuliaje (dialogò) cu ‘e cumpagne ‘e curzia.
ALLAN[‘O ‘Ncrifato] 7,5  Granna atalossa (prestazione) d’’o bbrasiliano ca agghiuntaje qualità a cquantità e nnun solo facette vedé ‘a solita fatica fatta ‘e corza e ccegna (grinta) pe ricuperrà pallune e ppallune, ma fove prutacunista ‘e ll’jusaida (assist) giniale p’’o capitano ca mettette a ffrutto.
JORGINHO 6,5  Me parette ‘ncriscenza esustatanno (impostando) e ricuperanno palle; s’abbuscaje ‘nu cartellino jalizzo (giallo) inutile e pp’evità ‘mpicce Sarri s’’o chiammaje ‘mpanca. [Dô 77’ DIAWARA 6,5  Trasette ô niajo (finale), ‘mpignaje a  cCordazzo e ppurtaje  cunsistenza lla ‘mmiezo.]
CALLEJON[Peppe ‘a ‘nguenta] 6,5 – Me parette migliurato a ppietto ‘e ll’urdimi vvote: Martella ll’anticipaje pe ‘nu niente ‘nu paro ‘e vote levannole ‘a purpetta dô piatto e ‘o purtiere pe ddoje vote lle paraje ddoje bbelli ppalle destinate ô funno d’’a rezza.Peccato! 
INSIGNE [Lorenzigno] 6  Nunn’ è a ll’arriba(top) e sse vedette; Cordazzo durante ô primmo ajone (tempo) ll’annijaje ‘o stuco  (gol), po centraje ‘o travesagno   (traversa) cu ‘o solito tiro a ggiro e ppo cca e lla troppi ‘mpricisioni ca nurmalmennte  nun fa. [Dô 67’ ZIELINSKI 6  Trasette cu ‘o ggenio  justo e ffacette ‘o ssuĵo, prupunennose e ttenenno palla comme serveva.]

MERTENS 5,5 ‘Nu poco ‘e cumpagne nun lle detteno ‘na palla pricisa, justa e ssistimata, ‘nu poco isso sbagliaje tutt’’o ppussibbile; ‘nzomma nun me parette isso. S’Êsse’arrepusà, ma Sarri à ditto ca nun ‘o leva maje!Aspettammo ca se sceta. [Da ll’ 88’ ROG 6 ‘e stima, pecché putette fà sulo atto ‘e presenza.]

all.  SARRI 6  Sulo pecché se vincette e cce mettettemo ‘e tre ppunte dint’â sacca, ma ‘o Napule d’ajeressera nun fove chillo ca cunuscimmo e doppo d’’o primmo quarto d’ora se ne scennette ‘e pressiona e soprattutto a ll’arrancua affannaje e isso êsse avut’’a cagnà primma coccheduno e nnunn’ ‘o ffacette!
arbitro: MARIANI 5 ‘A fora ‘e nun avé cecato ‘o carí (fallo) ‘ncuoll’ô gGialante carriato ‘nterra dint’â muntaca (area di rigore) crutunesa, ati grossi fessarie nun facette, ma ‘stu pecuraro rumano è ‘na meza cazetta!
E fermammoce cca. P’’o mumento bbuono accussí, simmo primme e pprimme âmm’’a restà a mmaggio.
Ve saluto e ssi Ddi’ vo’ ve donco appuntamento a ll’anno nuovo doppo d’’o sibbacco (match) ‘e coppa itaglia contr’a ll’Atalanta ca sperammo ‘e vattere. Staveti bbe’; bbona fina d’anno e mmeglio abbío d’’o nuovo! R.Bracale

Nessun commento: