FEYENOORD-NAPOLI( ciampionsa 06.12.17) 2 A 1 ‘A VEDETTE ACCUSSÍ

FEYENOORD-NAPOLI( ciampionsa 06.12.17) 2 A 1

‘A VEDETTE ACCUSSÍ

Che ccollera e cche ddelusione ajeressera ‘nnUlanda addó ‘o Napule doppo d’’a scunfitta ‘ncasa cu ‘a vecchia zoccola ‘ncampiunato avette ‘ncassà chella ‘nciampionsa cu ‘o Feyanoord(e) ca ce cundannaje a gghí a gghiucà ‘a coppa aiurupea ‘e siconna mana. Mannaggia ê cane ‘e cancielle! E ddicere ca ‘o Napule nc’êva fatto fà ‘o core cumme a ‘nu cufenaturo datose ca partette a ccapa sotto e doppo appena dduje minute  ggià passaje ‘nvantaggio cu Zielinski ca mettette a ffrutto ‘nu rimpallo ‘nfra Ciruzzo e n’ulandiso ‘ncopp’a ‘na cabbesera (colpo di testa) d’’o Masto ch’era avanzato. Però po ‘mmece ‘e casà ‘a mana e vvattere ‘o fierro caudo, ‘o Napule rallentaje ‘a pressiona e addirittura, scunfidato, tiraje ‘e rimme ‘int’â varca quanno arrivaje ‘a nutizzia ca ‘nnUcraína ‘a scuatra ‘e Guardiola  ch’êsse avut’’a vencere steva abbuscanno; ‘nzomma ‘na granna pastetta poco seria!  E ‘sta cosa  pure si ‘o Napule êsse vinciuto, nun ce avesse cunsentito ‘e passà ‘o turno. I accussí jette a fferní giacché ô 33’ ‘o Feyanoord(e) apprimma russimmaje (pareggiò)  e ppo,visto ca ô Napule nun ll’era avasta n’ora pe tturnà a ffà soja ‘a mubbara (partita)  addirittura vincette ô 91’ ‘ncopp’a ddoje fessarie d’’o Masto [po ve dico].Però  nnun puteva jí diverzamente cu cchillu cestariello d’’o cainno (traditore) Ciro Ferrara presente ‘int’ô studio Mediasette e cchillu tirapiere ‘e n’armujllacco (telecronista) ca ce menaje ‘a seccia pe ttutt’’o sibbacco (match) e ttanno s’arrennette quanno ce vedette distrutte. Ma mo nun ce sceppammo ‘e capille; forze meglio accussí: ‘o Napule nunn’è attrezzato pe ttanti cumpetizzione e ppe mme à dda puntà sulo ô campiunato; ‘o riesto po’ sserví sulo ô cogliapiecuro d’’o presidente. E ssi vo’ chesto, à dd’accattà e nnun vennere jucature a ll’aldezza! Passammo ê ppaggelle:

REINA 5 Stranamente nun dètte ‘a sensazzione ‘e dà sicurtà(sicurezza)e rrummanette fremmo, senza tentà coccosa ‘ncopp’ê ddoje cabbesere (colpi di testa) ca ‘o futtetteno.

 MAGGIO[‘O Vicchiariello] 5,5  Ce pruvaje,ma facette poco e ascette doppo n’ora. [dô 64’ MARIO RUI 5,5 Trasette quanno ggià erano arrivate brutti nutizzie  da ll’Ucraína e scuraggiato nun riuscette a ddà ‘o cagno ‘e marcia ‘ncopp’â curzia soja.]

 ALBIOL[‘O Masto] 4  Me dispiace, ma ajeressera nun me piaccette proprio: ‘nu scenufreggio, ca sciupaje chello fatto ô siconno minuto; se facette surpassà dô jabbro (cross) ‘e Berghuis(se)’ncopp’ô  primmo stuco  (gol) ‘e ll’ulandise e Jorgensen(ne) ‘o ringrazziaje.Piezzo e ppejo ’ncopp’ô  siconno stuco  (gol)quanno,passero viecchio, jette  dint’â cajola: uno cu ‘a ‘sperienza soja, ‘ncopp’a ‘nu tiro ‘e squina (corner) nun se po’ piazzà, guardanno ‘a porta, ma s’à dda mettere guardanno ‘a do’ arrivano   ll’avverzarie pe nnun farese piglià ê spalle e isso nun ‘o ffacette facennose  cartià ‘a St. Juste ca  firmaje  ‘o doje a uno. E cche saciccio!

  KOULIBALY[‘O Gialante] 5,5 ‘E cchiú nun se mmereta; è overo ca fove  poco aiutato dô Masto, ‘nserata no,ma me parette pigliato ê turche ca jucaveno cu ‘o sanco a ll’uocchie i ‘o curtiello ‘mmiez’ê diente e  nnun fove crestiano d’avascià ‘a sarracinesca. Peccato.

HYSAJ 5 [Meza Cucchiara] Nun ce simmo! Ajeressera a mmancina cuncedette troppo e appressuraje (spinse) poco e nniente.

ALLAN 6 Ô ssolito ce mettette corza e ccegna (grinta), ma cupuliaje (dialogò) poco cu ‘e cumpagne; però fove uno ‘e ll’urdeme a mmullà. [dô 60’  ROG 6  Luttaje pe ttutto ‘o tiempo a ddispusizzione.]

DIAWARA 5,5  Battette a mmestiere ‘a timmuria   (punizione)ca, misa a ffrutto  gol, ce dette ‘o vantaggio, ma po se perdette  e nnun dètte ‘e ggiumetrie nicessarie

 HAMSIK[Marekiaro] 5 Facette assaje poco e  sse purtaje ‘ncopp’â cuscienza ll’addaffa (rete) mancata ch’ ô pprincipio cì’êsse pututo dà ‘o siconno vantaggio. Se vede proprio ca chillu stuco (gol) è addivintato ‘na maledizziona e nnun’arriva. Succedesse dummeneca cu ‘a Fiorentina? Ammènne!  

CALLEJON[Peppe ‘a ‘nguenta] 5  Stanco, sí e nno fove periculuso ‘na grama vota; se prucuraje ‘nu ricore ‘ncopp’a ll’uno a zzero, ma ll’arbitro ‘ngrese nun ‘o vulette vedé. Troppo poco! [dô 74’ OUNAS 6  Trasette troppo tarde, ma allimmeno ‘o ffacettecu ‘a cegna (grinta) justa dispenzanno quacche bbona palla.Chi sa’ si fósse trasuto primma!]

 MERTENS [Ciruzzo] 5  Sta attraversanno ‘nu mumento ca nun è isso; se vedette sulo ô pprincipio ‘ncopp’a ll’uno a zzero, po sparette e addirittura sulo ‘nnant’ô purtiere, se magnaje ll’addaffa (rete) d’’o pussibbile doje a zzero. Capisco però a sSarri ca nun tène a cchi mettere ô posto suĵo. Scetate, Cirú!

ZIELINSKI 6  Ce dètte ‘a speranza facennose truvà ô posto justo ô mumento justo e ppo se dètte da fà ô posto ‘e Lorenzigno, pure si jucanno ‘e n’ata manera,  a mmodo suojo.

All. SARRI 5,5  ‘A scuatra se facette scennere ‘o core ‘int’ê cazette ‘nfromme arrivaje ‘a nutizzia ‘e ll’uno a zzero d’’o Shakhtar(re) e llassaje perdere facenno ‘na grossa fessaria pecché ‘e cuane (azzurri) êssen’ avut’’a vencere pe nnunn’essere scamazzate cu ‘o surteggio d’’a coppa ‘e siconna mana. E isso nun ttiraje ‘e rrecchie a ògne gghiucatore pe mmetterlo a ssunna (dovere), nè facette trasí primma a Ounas(se).  

Arb. OLIVER (G.B) 3 ‘Stu ‘ngrese tenette ‘a neglia (nebbia) ‘int’ê ccerevelle;  siscaje sempe a bbienetenne e nnun ce dètte ‘nu ricore ca Peppe ‘a ‘nguenta s’era abbuscato, ma ca isso nun vulette vedé!

E ffermammoce cca. Nun ce penzammo cchiú. Jette cumme jette e ppacienza. Mo però ‘o Napule s’à dda scetà: nun po’ cuntinuà a sgarrupà chello ca à fatto, à dda turnà a vvencere accumincianno da dummeneca ê ttre quanno ô san Paolo scenne ‘a Fiorentina! Accussí sperammo e ssi dDi’ vo’ ve ne parlo llunnerí ca vène.

Staveti bbe’. R.Bracale Brak