NAPOLI – JUVENTUS (03.03.19) 1 A 2 ‘A VEDETTE ACCUSSÍ

NAPOLI – JUVENTUS (03.03.19) 1 A 2

‘A VEDETTE ACCUSSÍ

Mannaggia ê cane ‘e canciello! Guagliú tengo ‘o ttuosseco ca me sta ascenno da ll’uocchie i ancòra nun me riesce a dde pariarla ll’azzimma (sconfitta) d’ajeressera ô san Paolo addó ‘a vecchia zoccola  ce vattette, naturalmente arrubbanno i ô ssolito ajutata da ll’arbitro..., pe ddoje a uno e, m’âte ‘a credere!, si mo me truvasse p’’e mmane a Llorenzigno [4 ] ‘o facesse vrognele vrognele pe ccomme sciupaje [tiranno a ccapa ‘e saciccio ‘nu ricore, avuto dâ Varra, a ffavore a ll’85’] ‘a granna accasione avuta ‘e allimmeno russimà(pareggiare) e ssi fósse ô Jancone lle levasse ‘a fascia ‘e capitano, cundicennole:”Cierti ccose nun se fanno! ‘O ssaje ca, contro â vecchia zoccola, ggià  sbagliaste ‘nu ricore; chisto è ‘mpurtante assaje... lèvate ‘a miezo e llassa ‘a palla a n’ato o, si ‘o vuò tirà, fallo a mmestiere cu ‘na cagliosa centrale ch’à dda sfunnà ‘a rezza... tanto ‘o ssaje ch’’e purtiere o se menano a ddritta o a mmancina! Si po vuò tirà ‘e n’ata manera... ll’hê ‘a fà priciso i a uocchie apierte, no a ccapa ‘e saciccio senza rennerte cunto ‘e chello ca staje facenno!”

Fatto si è guagliú ca ajeressera nce attuccaje’e vedé ‘nu scuonceco  cu ‘nu  Napule  curaggiuso e armutauaro  (temerario) ca  ascette mazziato   dô san Paolo ma chiammannose ll’applavuso d’’e masciadde (spettatori).           

‘O sibbacco (match)s’era mettuto ‘nsagliuta ggià ô 25’ quanno chillu sacchetto ‘e ll’ummeto ‘e Rocchi [3 e ppo ve dico] senza ‘nfurmasse cu ‘a Varra ca lle cunzola â sora..., ‘mmece ‘e nutizzià (ammonire) pe ‘na tezzalla maccaja (palese simulazione) a cchillu cesso ‘e Ronaldo ca s’era menato ‘nterra cumme si êsse avua ‘na curtellata dint’ô scianco, addó nisciuno ll’êva tuccato..,  n’êva cacciato fora ô Lungagnone pe ‘nu carí (fallo) fora muntaca (area di rigore) ca nunn êva fatto.., ma po cu  ‘o cartellino russo [mmeretato!] a Ppjaniccio  ‘o  Napule accuminciaje a mmacenà juoco, pure senza sant’Arcadio asciuto ô 25’ pe ffà posto a Ppastacrisciuta e accurciaje ô 61’ cu Ppeppe ‘a ‘nguenta lesto a recogliere’na bbella palla ‘e Lorenzigno ca però, cumme v’aggiu ditto, a ll’85’ sciupaje ‘a granna accasione ‘e russimà (pareggiare)!Mannaggia ê cane ‘e canciello! E ddicere ca pure ‘o russimmo (pareggio) ce fósse juto stritto! ‘Nzomma... cumme jette e ccumme venette nun avastaje n’arrancua (ripresa) sustanziosa jucata dô Napule cu granna catafferra (intensità) rummanettemo cu ‘na vranca ‘e mosche ‘mmano e ‘na collera ‘ncuorpo ca nun ve dico cunzideranno ca purtroppo nun ce sta niente ‘a fà e ppe ‘na cosa o n’ata chilli mariuole ‘e via nova janche e nnire nunn’ ‘e riuscimmo a vvattere. Pacienza, rassignammoce e ppassammo ê ppaggelle:

MERET[‘O Lungagnone]: 6  Jellato assaje.Nun fove itimma (colpa) soja si ‘o Tignuto ‘o mettette ‘ndifficultà  cu cchillu pasiglio arreto (retropassaggio) sciaurato cu ttutt’’e cusequenzie d’’o caso.  Rocchi ‘o jettaje fora ma ‘o purtiere nuosto a Rronaldo nun ‘o tuccaje e ll’arbitro êsse avuto addimannà â Varra... e nnun ‘o ffacette, o – meglio ancòra! – se ne futtette!

 MALCUIT [‘O Tignuto]: 5 ‘Nu zifo (voto) mancante pecché êva accumminciato bbuono appressuranno (spingendo)a mmestiere, ma po sciupaje tutto cosa cu cchillu pasiglio arreto (retropassaggio) sciaurato ca pesaje e cquanto ‘ncopp’ô sibbacco (match); da chillu mumento nun fove cchiú isso e sbagliaje ati ccose nsi’ a cquanno ‘o Jancone nun s’’o chiammaje ‘mpanca. [Dô 45’ MERTENS [Ciruzzo]: 6. Truvje spazzie stritte ma dètte ‘o ssuojo muvimentanno ‘a munuvara (manovra) pure si nun fove crestiano ‘e ncarrà ‘nu bbuonu jabbro (cross) pe cquaccheduno!]

 MAKSIMOVIC [‘O ‘Ntontero]: 6 Atalossa (prestazione) tutto summato pusitiva pure si cu cquacche sfregazzo (sbavatura) senza ‘mpurtanza. Nun tenette itimme (colpe) ‘ncopp’a ll’addaffe (reti).

 KOULIBALY[‘O Ggialante]: 6,5. Ô ssolito ‘nu muro; Mandzukiccio e Rronaldo lle sbattettono ‘ncuollo; isso ‘effermaje e ppo currette ‘nnante; ‘nzomma ce ne vulesseno tante ate accussí capace ‘e difennere, d’appressurà (spingere) e ghí a ffà ‘o marcazzo   (punta centrale).

 HYSAJ[Meza Cucchiara]: 5,5 Miezu zifo (voto) mancante pe bbia ca spisso sbagliaje a ppusizziunarese; ‘e cchiú jellato ‘nnaccasione d’’o doje a zzero: fove isso a ddevià ‘mporta ‘na palla destinata a gghí fora; migliraje a ll’arrancua (nella ripresa) cercanno d’appressurà (spingere) Troppo tarde!

 CALLEJON[Peppe ‘a ‘nguenta]: 6,5 Finalmente ‘ncarraje ‘o muvimento justo futtenno a Cchiellini e mmettenno dinto ‘o pallone d’’a speranza.P’’o riesto cumme sempe  fove isso l’aco  d’’a valanza cuana (azzurra). Ascette pe ffà posto a Ounas(se) e cce rummanette male. [Dô 78' OUNAS: 6 Nun lle macajeno ajàvia (verve) e ccaterra (pericolosità), ma tuzzaje ‘nfacci’ô muro d’’a trasera (difesa) janca e nnera e nnun ne cacciaje niente! Peccato.

 ALLAN[‘O ‘Ncrifato]: 6,5. Tanti stibbacche (duelli) vinciute  e pressione (pressing) ‘mpurtante; bravo pure a ggestiunà (gestire) ‘o pussesso ‘e palla, distribbuenno juoco; êsse pututo sparagnarese chillu cartellino jalizzo (giallo)pigliato pe ‘na pulemica inutile.

RUIZ [Anem Longa]: 6,5. Bbattiejo (lento) e ‘mpacciato durante ô primmo ajone(primo tempo), ma po a ll’arrancua  (nel secondo tempo)criscette bbuono cumannanno ‘o juoco. Ll’êsse avut’’a farlo primma e avesse avuto ‘a tentà da luntano; ‘e bbuono ‘na palla taminna (preziosa) pe  Zzielinski ca però cugliette ‘o palo. Se prucuraje pure ‘o ricore p’’o vraccio largo ‘e Sandro, ma Lorenzigno ‘o sciupaje tiranno ‘ncopp’ô palo.

 ZIELINSKI: 6,5. Signale assaje pusitive: bbella atalossa (prestazione), ma troppa jella: ‘nu palo e n’afachia (traversa)! E ffacitelo bbenericere!

INSIGNE [Lorenzigno]: 4 Me dispiace, ma tanto se mmereta! Nun lle pozzo perdunà chillu ricore sbagliato a ll’85’! Nun ce facette russimà (pareggiare) e ccassaje chello ca ‘e bbuono êva fatto!   

MILIK[Sant’Arcadio]: 6 ‘E stima: appena vinticinche  minute ‘e granne sacrifiggio e ppo ‘o Jancone s’’o chiammaje ‘mpanca pe ffà trasí a Ppastacrisciuta. Si êsse levato a n’ato fósse stato meglio![Dô 26': OSPINA[Pastacrisciuta]: 5,5 Miezu zifo (voto) mancante pe bbia ca ‘ncopp’â timmurria (punizione) ‘e Pjanic(cio) partette tarde; è overo ca trasette a ffriddo e ca  Zielinski nun zumpaje facenno passà ‘a palla, ma isso fove bbattiejo (lento). Nun putette farece niente ‘ncopp’ô doje a zzero e pp’’o riesto sulo quacche marfudda (respinta) ‘ncopp’ a cquacche ttiro ‘a luntano.

ANCELOTTI[‘O Jancone]: 5,5. Miezu zifo (voto) mancante pe bbia ca sulo a ll’arrancua (ripresa) ‘o Ciuccio accumminciaje a gghuiucà; Nn’êsse avut’’a levà a ssant’Arcadio e nnun êsse avuto fà tirà ‘nu ricore tanto ‘mpurtante  a Llorenzigno.’Ncopp’ô campiunato da paricchio nce avevemo miso ‘nu crucione e ppacienza: ll’azzimma (sconfitta) d’ajere nun leva e nnun mette. Penzammo a ato e gghiammo annante strafuttennoce d’’a vecchia zoccala fujuta a cchiú sidice.

Arb. ROCCHI i ‘a chenca soja 3 Me ll’aspettavo ca ‘stu sacchetto ‘e ll’ummeto ce facesse quacche grossa fetenzia e ppurtroppo nun me sbagliaje:nun cunzultà ‘a Varra ca lle cunzola ‘a sora  fove ‘na ‘nfamità esaggerata e nne pavajemo ‘e ccunsequenzie!

E bbasta accussí! Nun ce penzammo cchiú, sputammo ‘o ttuosseco ca tenimmo ‘mmocca e ssi ‘o Cielo ‘o vvo’ ce sentimmo viernarí ca vène doppo d’’o sibbacco (match) casalinco ‘e cuppetta aiurupea ‘e ggioverí a ssera  cu ‘o Salisburgo e sperammo ca pozzo cuntareve bbelli ccose!

Staveti bbe’! R.Bracale Brak