lunedì 17 febbraio 2020

CAGLIARI-NAPOLI (16.2.20) 0 A 1 ‘A VEDETTE ACCUSSÍ


CAGLIARI-NAPOLI (16.2.20) 0 A 1
‘A VEDETTE ACCUSSÍ

 ‘Assa fà ô Cielo guagliú, ‘assa fà ô Cielo! Finalmente ajere a ll’ora d’’o rrusolio e dd’’e ppastarelle ‘o Ciuccio jette a Ccagliati e ccontr’ê lucale nun sulo se levaje ‘e pacchere dâ faccia pe cquanto succedette a ll’addabba (andata) quanno abbuscaje ô san Paolo e nnun s’’o ffósse mmeretato, ma se scutuliaje da cuollo pure ‘na bbrutta jastemma menata, chella ‘e nun fa natiggio (risultato) contr’ê  scuatre ariclimie(provinciali) e affuzzanno (vincendo) pure si sulo p’uno a zzero  se mettette dint’â sacca tre ppunte d’oro ca lle permettetteno ‘e lassà zamma(quota) trenta, saglienno a ttrentatré e angappanno ‘o Bbulogna a ll' uttavo posto. Mo sí ca s’abbía a rraggiunà guagliú! Tutto summato ‘ntribbuna-divano piacette ‘a scuatra presentata  da Gattuso ca cunfermaje ‘nnante ‘o Turco cu Ppeppe ‘a ‘nguenta e ccu Cciruzzo, mentre arreto scigliette Mezacucchiara e nno Mario Rui. Certo se sciupajeno ancòra tre o quatto bbone accasione pe ssignà[e cchesto nun ce piacette], ma â faccia ‘e tante e ttanti cestarielle  arreto nun s’abballaje e Ppastacrisciuta nunn’êtt’’a fà ‘e straurdinarie.’E fatte jetteno accussí: ‘a mubbara  (partita) d’’e primme minute fove assaje tattechiónna (tattica) e ssulo ô  18' ‘e sardagnuole facetteno ‘nu sternuto cu Ppereiro, ma ‘a palla ascette auta; doppo n’atu tentativo d’’o stesso pierepetterra ca facette spurcà ‘e guante a   Ppastacrisciuta  ‘o  Il Napule rispunnette cu ‘na cabbesera (colpo di testa) auta ‘e Chitelassa. Po êttemo aspettà ‘o 36’ pe vvedé ‘o Turco nuosto can un sfruttaje ‘na bbona palla cunzentenno a Cragno ‘na parata facile facile. Suoccio camascio ( medesimo canovaccio) a ll’arrancua (ripresa) cu ‘e ddoje scuatre ca se guardajeno ‘a castagna cuntinuanno a essere assaje tattechiónne(tattiche);però ‘o Napule se vedette ca vuleva ‘e tre ppunte e cce pruvaje  ô 55' cu ‘na  bbotta da luntano ‘e Zielinski,però Cragno fove attiento e ‘a fermaje; ‘a risposta d’’e sardagnuole arrivaje ‘ncapo ‘e tre mminute quanno Simeone facette ‘nu tentativo da fora cu ‘na palla senza pretese ca ascette a mmancina.’O Napule però nun rummanette a gguardà i ô 66’ ‘mpruvvisamente Ciruzzo ce purtaje ‘mmeizo (in vantaggio) cu ‘nu granne tiro a ggiro ca mannaje ‘o pallone a ttuccà ‘o palo cchiú lluntano i a ‘nfilarse ê spalle ‘e Cragno ca putette recogliere sulo ‘a palla ‘nfunn’ô sacco; ‘e sardagnuole cercajeno ‘e fa coccosa p’adderezzà ‘a varca, ma niente ‘a fa; ‘nu paro ‘e tentative da luntano ‘e ffermaje Pastacrisciuta e pp’’o riesto nun ce foveno prubbleme  i accussí cumme steva scritto ‘e cuane (azzurri) [ajere cu ‘na streuza muntazzimma (divisa) culore tonne ‘e spagna] se piglijeno ‘e tre ppunte surpassanno ‘e lucale ‘ncrassifica. Bbuono accussí.
Passammo ê ppaggelle:
OSPINA[Pastacrisciuta] 6,5  Nunn’êtte ‘a fa cape d’angelo, ma dette ammanna  (sicurezza) ê suoje facennose truvà pronto chelli ppochi vvote ca ‘e sardagnale tentajeno, da fora!, coccosa.

DI LORENZO 6,5  Tazzizzo (promosso)!Preciso e sistimato mettette ‘a musarola a  a Ppellegrini e sse cuncedette quacche vvota ‘e scennere a dritta.

MANOLAS[Chitelassa] 6,5 Atalossa (prova) ‘e sustanza d’’o centrale nuosto ca cummannaje ‘a trasera (difesa) senza arresecà niente e spisso jette a ccercà ‘a porta ‘e capa.

MAKSIMOVIC[‘O Ntontero] 6 Jucaje bbuono senza sfregazze (sbavature) e ssenza farece cacà sotto.

 HYSAJ[Mezacucchiara] 6,5  Miezu zifo (voto) ‘e cchiú p’’o missiddo   (assist) a Cciruzzo ô 66’; p’’o riesto arreto facette ‘o duvere suĵo senza prubbleme. Ascette pe nun saccio qua’ ‘mpiccio. [dô 79' MARIO RUI 6 ‘e stima]

FABIAN RUIZ[Anemalonga] 6 Finalmente sta cunquistanno ll’ammanna   (sicurezza) ca nsi’ a mmo ll’era mancata e ajere se vedette!

 DEMME 6,5 Sulo doppo n’ora ca se magnaje ‘o campo annante i arreto e ffove n’aculla (diga) ‘mmiez’ô campo facenno ‘o riggista, se ne scennette ‘e posa e Ggattuso s’’o chiammaje ‘mpanca p’’o fa risciatà. [dô 60' INSIGNE[Lorenzigno] 6  Nun tene né scartiello né bauglio, ma purtaje furtuna:trasette ‘ncampo e ‘ncapo ‘e seje minute ‘o Napule signaje.]

ZIELINSKI 6,5 ‘Ncriscenza. Pruvaje ddoje o tre vvote a ddà penziere a  Ccragno e affuzzaje (vinse) ‘a brica (il duello) cu Ionita.

CALLEJON[Peppe ‘a ‘nguenta] 5,5   Me dispiace, ma nun pozzo metterle ‘o seje: fove isso ‘a nota stunata d’’a scuatra: ‘mpriciso,faterro (svogliato) e mmaje stiappo (reattivo), ògne ppalla dâ parta soja, fove ‘na palla perza! Peccato! [dô 66' POLITANO 6  Dette ‘na bbona mana a ttené ‘a palla auta quanno ‘e sardagnuole attaccajeno cercanno ‘e russimà (pareggiare).]

MERTENS[Ciruzzp] 7  Pure ajere dimustraje ca nun se ne po’ ffà a mmeno; turnato a gghiucà, dint’a ttre mmubbare (partite) è sservuto a ddarece ddoje arnasse (vittorie) cu ddoje addaffe (reti) e ‘nu missiddo  (assist). Cu ll’addaffa (rete() d’ajere se purtaje a ‘nu passo da Marekiaro dint’â crassifica ‘e ll’arameje cuane (marcatori azzurri) ‘e tutt’’e tiempe.
 ELMAS[‘O Turco] 6,5  Duranteê primme 45 minute fove ‘o cchiú ppericuluso d’’e nuoste dimustrannose chino d’armuabbo (talento) Peccato ch’è troppo ‘nnammurato d’’a palla e nnunn’ ‘a passa.

all.:  GATTUSO 6,5 ‘A cura soja  accummencia a ffunziunà: ‘ncopp’a ddiece mubbare d’’o 2020 cunquistajemo ‘a sesta arnassa (vittoria) e ll’Aiuropa s’è avvicinata assaje. Nun me meravigliasse ‘e vedé ‘nfra poco ‘o Napule a cquaranta punte.
arb. DOVERI 6 Facette quase tutto ‘o duvere suĵo; ‘nu paro ‘e fessarie foveno itimma (colpa) d’’a chenca soja [4] ca lle signalaje cose sballate.
E ffermammoce cca cunfermanno ca ‘int’â siconna arnassa  (vittoria) cunzecutiva d’’a scuatra nosta fove dicisiva ‘a mana data da ll’armidanno  (centrocampo) cu ll’addà  (prestazioni) ‘ncriscenza ‘e Zielinski, d’Anemalonga e d’’o turco. Mo, si ‘o cielo ‘o vvo’ ce sentimmo sapato ca vene pe ccuntareve chello ca succede viarnarí a ssera a Bbrescia p’’a siconna nacchèlla (trasferta) cunzecutiva contro a n’ariclimia (provinciale).
E sperammo ca pozzo cuntareve bboni ccose.
Staveti bbe’! R.Bracale Brak

Nessun commento: