giovedì 13 febbraio 2020

INTER -NAPOLI (C.I.12.2.20) 0 A 1 ‘A VEDETTE ACCUSSÍ


INTER -NAPOLI (C.I.12.2.20) 0 A 1
‘A VEDETTE ACCUSSÍ    
Che bbella cosa guagliú e cche surpresa! Doppo ca ‘ncampiunato ‘o Lecce nce aveva fatto chiagnere, maje nce fóssemo aspettato ca ‘ncoppa itaglia ‘o Ciuccio fósse juto a Mmilano contr’â Bbisciona ‘e Conte e avesse affuzzato (vinto) ‘ncoppa itaglia. E ‘mmece ajeressera chesto succedette e ppure si sulo p’uno a zzero ô Meazza ‘o Ciuccio facette ‘o bbutto cunquistanno ll’arnassa (vittoria) ‘int’ô sibbacco (match) d’addabba (andata)’e sfarnaja  (semifinale) d’’a coppa itaglia i ‘o ffacette ô 57’ cu ‘nu sistimato tiro a ggiro ‘a fora d’Anemalonga ca ‘o mettette a ppitoffio a Ppadelli e ffacette abbruscià ‘o fetillo a Cconte, â Bbisciona i a cchilli duji cestarielle armujllacche (commentatori) RAI ca ce tirajeno ‘e piede pe nnuvantaquatto minute, ma s’êtteno ‘a fa dint’ê rrecchie lloro giacché ‘a scuatra  ‘e Gattuso assacchiaje  (espugnò) ‘o campo d’’a majurina  (capolista) d’’o campiunato mettenno ‘nu mierco (sigillo) ‘mpurtante verz’â  niaja (finale).’E cuane (azzurri), urganizzate, gidde a zabballà (bravi a palleggiare) e mmise a mmestiere ‘ncampo,  doppo d’avé sbarrata ògne linia ‘e pasiglio (passaggio) pe tutt’’o primmo ajone (tempo) ê lucale ca ‘mpratteca nun rumpetteno ‘o saciccio a Ppastacrisciuta, ‘ncapo appena ‘e durice minute ‘e ll’arrancua (ripresa) casticajeno ‘a Bbisciona cu ‘na timidda  (ripartenza) firmata Di Lorenzo-Anemalonga  e pp’’o riesto ‘e ll’arrancua azzettajeno (concessero) poco o niente â chietta   Lautaro-Lukaku.’Nzomma ‘a Bbisciona nn riuscette quase maje a essere periculosa, nun truvaje ll’addaffa (rete) e mmo, corna facenno à dda vedé si po’ ffà coccosa ô san Paolo ê cinche ‘e marzo.  L'Inter, sicuramente piú pericolosa. Quanto a nnuje cuane (azzurri) simmo capace sí ‘e zzabballà (paleggiare) e pputimmo fa male a ttutte quante   ma avimm’’a correre pure quanno nun tenimmo palla e avimm’’a cercà, tenenno ll’uocchie apierte  ‘e nun fa mettere ll’ avverzarie dint’â mmità campo nosta o putimmo a ‘nu mumento a ll’ato piglià n’addaffa (rete). Accussí stanno ‘e fatte. Passammo ê ppaggelle.  
 OSPINA[Pastacrisciuta] 6,5  Sulo dduje bbuoni tacculle (interventi) ‘nterra ô niajo (nel finale)’int’ô bburdello; p’’o riesto s’êtt’’a guardà ‘a mubbara (partita). Fove nutizziato (ammonito) pecché perdette tiempo.
DI LORENZO 6,5  Atalossa (prova) pusitiva mo guardanno ‘o bbidone arreto, mo scennenno ‘nnante cumme ‘nnaccosiona ‘e ll’addaffa (rete) cupulianno (duettando) cu Anemalonga.

MANOLAS[Chitelassa] 6,5  Cu ‘e bbone o cu ‘e triste mettette ‘a musarola a Llautaro e ddette n’uocchio ô cumpagno ‘e sezziona (reparto).

MAKSIMOVIC [‘o Ntonero ] 6,5  Facette ‘na bbona guardia , a   Lukaku vincenno, pure a spurtellate ‘o stibbacco (duello) lassannole sulo ‘na cabbesera (colpo di testa) can un fove periculosa.

MARIO RUI 6  Guardaje sulo ‘o bbidone arreto senza maje arresecà coccosa, ma nunn’accumpagnaje ll’azziona. Cuntentammoce.

 RUIZ[Anemalonga] 7 Atalossa (prova) cummincente d’’o spagnuolo ca turnato titulare jucaje nuvanta minute ‘e qualità aizannose spisso pe ddà ‘na mana a Cciruzzo.Ll’addaffa (rete) ô 57’ fove ‘na vera perna ca ce facette addecrià!
 DEMME 6,5   Mufiddo (utile) ‘nteliggente, puanto (pimpante) fove n’aculla (diga) difenziva ‘nfra ê llinie d’’a Bbisciona. Cumprimente.

 ELMAS[‘O Turco] 6,5  Nun se nutaje, ma se sentette paricchio primma largo po cchiú mmiezo.

CALLEJON[Peppe ‘a ‘nguenta] 6,5 Bbona atalossa (prova)! Facette ‘o ssuĵo a ddritta ‘nzertannose e ccurrenno e spisso secutanno a Bbiraghi.Ascette pe ppiglià sciato.  [Dô 78' POLITANO s.v.]
 MERTENS [Ciruzzo] 6  Lassato sulo lla ‘nnante facette chello ca puteva: durante ô primmo ajone mannaje ‘mporta a Zzielinski, ca però sciupaje; a ll’arrancua (nella ripresa) ggestiunaje a mmestiere ‘o pallone  pruvanno a dd’abbià ‘e ttimidde cuane  (ripartenze azzurre).
Dô 72'MILIK[Sant’Arcadio] 6 Trasette, ma tuccaje pochi pallune però se facette nutà quanno cuntrastaje cu ll’ammulla (stazza) soja cchiú ‘e ‘nu tiro ‘e timmuria (punizione) Meglio ‘e niente.

 ZIELINSKI 6
‘Ncundiziona jucaje bbuono ‘nzertandnose spisso, ma sciupaje ‘na granna accasione durante ô primmo ajone (primo tempo). Peccato! [Da ll’ 82' ALLAN[‘O ‘Ncrifato] s.v.)

all.:  GATTUSO 6,5  Presentaje ‘na scuatra appruntata p’’o zzero a zzero cu ‘nu Napule nchiuso, cumpatto, tusto e ssenza paura e sse purtaje ‘a casa n’arnassa (vittoria) stentata, ma mmeretata!
arb. CALVARESE 6 Facette ‘o duvere suojo cumprese dduje ricure, uno pe pparte nun date; però êsse avut’ ‘a jí a vvedé ‘a varra p’avé ‘a cunferma d’’o penziero suojo… e nnunn’’o ffacette!
E pp’’o mumento ce fermammo cca; datose ca ‘e cunte se fanno sott’ô lampione, p’’a coppa itaglia se ne parla a mmarzo e ppirciò, si ‘o Cielo ‘o vvo’ ce sentimmo llunnerí pe ccuntarve chello ca succere dummeneca a Ccagliari ‘ncampiunato all’ora d’’e ppastarelle.
Staveti bbe’. R.Bracale Brak 

Nessun commento: