SCIORBA D’AGLIO
chello ca serve pe cquatto perzone,
4 spicule d’aglio ammunnate,
4 ova,
miezu bicchiere d’uoglio ‘auliva dunciglio,
sale fino e ppepe janco mmacenato a ffrisco q.n.s.,
dduje cucchiare ‘e farina,
otto felle ‘e pane
casareccio abbrustulute a ttiesto (220°),
‘nu tuppeto ‘e prutusino lavato, asciuttato e ntretato finu
fino,
‘nu litro e mmiezo d’acqua.
comme se fa
|
|
|
Mettere ‘e spicule
d'aglio a cocere a ffuoco allero dinto a ‘nu litro e mmiezo d’acqua e
quanno songo cuotte scamazzarle dinto a chella stessa acqua ‘e cuttura
ausanno ‘nu spremmeturo.
|
|
|
|
A parte sbattere ll’ova ‘nzieme â farina, ô ssale
fino e ô ppepe janco
mmacenato a ffrisco q.n.s.,
e rrevacà
tutto dint’a cchillu broro vullente ammiscanno cu ‘na cucchiarella pe
ffà appagliuccà ll’ova.
|
|
|
|
Mettere dinto a cquatto zupperelle ddoje felle pe parte ‘e
pane abbrustuluto e rricarve ‘ncoppa ‘a sciorba vullente e ‘na bbona pezzecata ‘e pretusino ntretato. Vino: asciutte e profumate janche nustrane ( Solopaca, Capri, Ischia, Falanghina,
Fiano, Greco ‘e Tufo) fridde ‘e jacciaja o ‘e ‘rotta.
Magna Napule, bbona salute e scialàteve!
Raffaele Bracale
|
Nessun commento:
Posta un commento