domenica 5 febbraio 2017

BOLOGNA – NAPOLI (04.02.17) 1 A 7 ‘A VEDETTE ACCUSSÍ

BOLOGNA – NAPOLI (04.02.17) 1 A 7 ‘A VEDETTE ACCUSSÍ Che sfizzio e cche ppiererotta ajeressera ô Dall’Ara ‘e Bulogna addó ‘o Napule nun sbagliaje quase niente e ccunzignaje ê mmurtadelle ‘e chella faccia ‘e cestunia ‘e Donadoni ‘a bbellezza ‘e sette brasciole ‘mbuttunate cu ppasse e ppignuole, a ll’uso nuosto ca mo stanno bbuono nsi’ a ch’accummencia ‘a quaresema. E tutto chesto â faccia ‘e ‘e chelli ddoje lote: Bergami e gGentile,almullacche (commentatori) ‘e Sky ca so' dduje cestarielle 'e mmerda ca ce tirajeno ‘e piere pe tutt’’o sibbacco (match) e nnun se vuleveno proprio fa capace ca ggià ô prazzo (alla fine) d’’o primmo ajone (tempo) ‘e cuane (gli azzuri) [ajeressera cu ‘a divisa ca porta bbuono, chella d’’a Madonna ‘e ll’Arco] êvano risolto ‘a pratteca cu mMarekiaro ô 4',cu Insigne ô 6' e ccu cCiruzzo ô 33' i ô 43' e steveno vincenno pe quatto a uno e – nun cuntente - cu mMarekiaro ô 70’ i ô 74' i ancòra cu cCiruzzo a ll’89’ a ll’arrancua (nella ripresa) addirittura sbrasajeno facennone n’ati ttre, pe ‘nchiudere ‘a facenna ‘ncopp’ô sette a uno pe bbia ‘e ‘na scartellata addaffa (rete) signata ‘a Torosidisso, lassato libbero e ffranco a ‘nu metro dâ porta isso sulo p’’a collera mia, d’’a tribbuna divano e ppe cchella ‘e Reina ca nun s’’o mmeretava e steva facenno ‘e tutto pe mmantené ‘a porta soja acrata (inviolata) addirittura paranno ‘nu ricore ‘e Destro ‘ncopp’ô doje a zzero! Però,ajeressera ‘e duje cestarielle nun ce putetteno e ss'êtten’’a fà cchiù ddinto 'e dint'ô fetillo pecché ‘o Napule vincette, vincette largo, surpassanno, p’’o mumento, ‘a roma e piazzannose, p’’o mumento, cu cCiruzzo nuosto ‘ncimma â crassifica d’’e nassíe (cannonieri) cu ‘a bbellezza ‘e sidice addaffe (reti), una ‘e cchiú d’’a lota janca e nnera, d’Icardi e dde Dzeko; pe ccuje ‘e duje cestarielle s’êtten’ ‘a magnà 'nu fenucchio tuosto, s''o stanno ancòra rrusecanno e ll'è rrummaso 'mmiez'ê diente! Passammo ê ppaggelle, va’: REINA 8,5 C’êsse miso pure ‘e cchiú, ma purtroppo – pure paranno ‘nu ricore – nun lle riuscette ‘e mantené ‘a porta soja acrata (inviolata) pecché nun ce putette proprio fà niente ‘ncopp’â cabbesera (colpo dib testa ) d’‘o stuco(gol) ô 36’ ‘e Torosidisso ca steva sulo sulo a ‘nu metro dâ porta. P’’o riesto fove prutacunista ‘e ‘na granna serata nun sulo pecché paraje, comme v’aggiu ditto, cu ssicurtà (sicurezza) ‘o ricore ‘e Destro, ma facette pure ‘nu miraculo ‘ncopp’a Krejici, ascette cu pruntezza e pricisione e sustataje (impostò) cu ‘nu lazo d’’e suoje ll’aziona d’’o doje a zzero. Nun lle se po’ dimannà ‘e cchiú! HYSAJ 5,5 Miezu zifo (voto) mancante) pecché s’êsse avut’’a sparagnà quacche sfregazzo (sbavatura) comme a cchella ‘nnaccasione ‘e ll’addaffa (rete)’e Torosidisso. ALBIOL 6 Nunn’êtt’’a fà ll’istinaje (straordinari) cuntentannose ‘e cuvernà ‘a camma (zona) soja) sustatanno (impostando) ll’aziona dâ primma linia; p’’o riesto mettette ‘a musarola a mMattia Destro. MAKSIMOVIC 5,5 Miezu zifo (voto) mancante) pecché si avette ‘na serata tranquilla, visto ca Hysaj nun ‘o ffacette, êsse avuto dà n’uocchio isso a Torosidisso e nnun ‘o ffacette! GHOULAM 6,5 Puntuale quanno scennette ‘ncopp’â curzia ‘e mancina,pennellaje bbuoni, pricise iabbre (cross) centrati ‘mmiezo. ZIELINSKI 7,5 Bbella atalossa (prestazione) d’’o guaglione nun sulo patrone d’’a camma (zona) centrale, ma ca se facette apprezzà ògne vvota ca scennette e ppe ccomme pittaje ‘e mancina, chill’ajuda (assist) a ttaglià tutto ‘o campo pe mmannà ‘mporta a lLorenzigno [Dô 73' GIACCHERINI 6 Dicessette minute sciuoveto, ttranquillo e ssenza prubbleme]. DIAWARA 6 Nun lle metto ‘e cchiú pecché me parette ca se facette ‘nu poco cundizziunà dê sische d’’o pubblico e ppure facenno ‘na mubbara (partita) urdinata e ssustanziosa, quacche vvota sbagliaje urtizzanno (verticalizzando) e ‘na vota ‘o ffacette periculosamente. [Dô 62' ALLAN 6 Trasette e ss’accuntentaje ‘e tammaddà (congelare) ‘o pussesso palla.] HAMSIK[Marekiaro] 9,5 Che ggranna atalossa (prestazione) a ttuutto campo chella d’’o capitano ca ajere addirittura se superaje facennose vedé pure sotto porta e ccentranno pe ttre vvote ‘o bberzaglio: cu ‘na cabbesera (colpo di testa) d’irtitaddo (controbalzo) e ccu ‘na pareglia (doppietta) ‘e dritto sotto ‘o ‘ncrocio; p’’o riesto overamente terasco (mostruoso) pe ccomme azzanadaje (innescò) cu ‘e ghiucate soje ‘e cumpagne! CALLEJON[Peppe ‘a ‘nguenta] 4 Me dispiace,ma quanno ce vo’ è mmericina!Ajeressera ‘e bbuono facette sulo chill’ajuda (assist) p’uno d’’e stuche (gol) ‘e Marekiaro, po perdette ‘e senze e ffacette fessarie una appriesso a n’ata. Jettaje fora ‘na palla ‘a menà dinto e cchesto fósse niente a ppietto ‘e chella sciaurata mana a scamnazzà ‘nterra, dint’â muntaca (area di rigore) nosta, ‘na palla ca nun era periculosa; nun cuntento fove addirittura scunziderato pe cchillu carí (fallo) ‘e riazziona ca lle custaje ‘o cartellino russo, cu ‘e cunzequenzie d’’o caso! MERTENS [Ciruzzo] 9 ‘Nu zucchero ll’arillo berga; nisciuno ‘o putette ‘ncappà nè ccu ‘e bbone, nè ccu ‘e ttriste. Facette chello ca vulette cumpreso chill’ajuda (assist) a zzuco ‘e caramella pe mmannà ‘mporta ô capitano e addirittura tre addaffe (reti) una meglio ‘e n’ata ca comme v’aggiu ditto ‘o purtajeno ‘ncimma â crassifica d’’e nassíe (cannonieri) cu ‘a bbellezza ‘e sidice addaffe (reti). Nun se ne po’ ffà a mmeno e sto aspettanno ‘e vedé che se ‘mmenta Sarri, pe mantenerlo ‘ncampo, mo ca torna sant’Arcadio. Lorenzo INSIGNE 7 S’’o mmereta tutto pecché se po’ ddicere ca tiraje ‘a sentenza ‘ncopp’â munnara (partita) menanno dinto ‘a palla d’’o doje a zzero cu ‘nu tiro azzeccato justo ‘ncopp’ô primmo palo ‘nfra chisto i ‘o purtiere. [Da ll’80’ ROG 6 ‘e stima] All. SARRI 9 Quanno se vence accussí llargo comme se vincette ajeressera spetta ll’applavuso ‘mprimmose ô direttore ‘e ll’urchestra assurtita bbona e ‘ntunata a mmestiere. arbitro MASSA 6 Ajeressera ‘ncarraje tutto cosa cumpreso ‘e cartelline russe pe Ppeppe ‘a ‘nguenta e ppe mMasina e cchille jalizze (gialli) pe pPulgar(ro), Diawarà, Maietta e Hysaj. E mettimmo punto cca. Ce sentimmo, a dDio piacenno, ‘a prossima vota ca vène a essere sàpato unnece doppo d’’a prossima mubbara (partita) casalinca contr’ê crifune genuane ca certamente veneno cca a ffà ‘o sibbacco (macth) d’’a vita [comme càpita a ttutte ‘e scuatre ca scenneno ô san Paolo, ma [cu ttutto ca viernarí ca vene ce mancano certamente Hysaj e pPeppe ‘a ‘nguenta], spero ca trovano ‘o ppane adatto pe scugnarle ‘e ddentiere! Staveti bbe’! R. Bracale Brak

Nessun commento: