giovedì 16 febbraio 2017

REAL MADRID – NAPOLI (C.L. 15/02/17) 3 A 1 ‘A VEDETTE ACCUSSÍ

REAL MADRID – NAPOLI (C.L. 15/02/17) 3 A 1 ‘A VEDETTE ACCUSSÍ Che ddelusione e cche nnervatura ajeressera guagliù! E soprattutto che ttuosseco amaro ca nce pigliajemo ‘int’ a ll’affullata tribbuna-divano! Aje voglia ‘e mettere zuccaro ‘int’ô ccafé e llimunciello ‘int’ê bbicchirine... chi t’’o ddà?! ‘O ffèle scurrette a sciummo. E ggià pecché perdere ô santiago bernabeu contro ê ggiuvinotte ‘e zidane ce po’ ppure sta, ma no – comme ‘mmece succedette ajeressera ssera ...- ca ‘o ffacettemo rijalannole ddoje addaffe (rete) e fforze pure tre a ggente ca nun lle nicessitano rijale. E ddicere ca êvemo accumminciato cu ‘o pere justo e addirittura a ll’ 8’ èramo passate ‘nvantaggio cu lLorenzigno, ca êva miso a ffrutto, cu ‘nu granne tiro ‘a cchiú ‘e trenta metre, ‘nu bbassurero (suggerimento) spiciale d’’o capitano futtenno ô purtiere Navàs(se) e ffacennoce allargà ‘o core quanto a ‘nu cufenaturo; ma passajeno juste diece minute e nce scennette ‘int’ê ccazette quanno (18’) Albiòl(le) nun arrivaje ‘e capa ‘ncopp’a ‘nu jabbro (cross) destinato a bBenzemà, appustiato arreto a isso i ‘o francese cu ‘na cabbesera (colpo di testa) centrale ce ‘o mettette a ppitoffio a rReina ca nun ce putette mettere ‘na pezza. Da chillu mumento se po’ ddicere ca ‘o sibbacco (match) d’’o Napule cagnaje i ‘e nuoste abbijeno a smarrunà malamente arreto e soprattutto a ll’armidanno (centrocampo) addó ‘e pasiglie (passaggi) sbagliate foveno cchiú ‘e chilli poche ‘ncarrate e ffove accussí ca arrivate ô 4’ ‘e ll’arrancua Kroos(se) apprufittaje ‘e ‘nu miezu pasticcio d’’a trasera (difesa) nosta ca se ‘ntalliaje cu ‘a palla senza menarla luntano e isso dô lemmeto d’’a muntaca (area di rigore) libbero e ffranco avette tutto ‘o tiempo ‘e piglià ‘a mira e ddà ‘o siconno dispiacere a rReina justo ‘ncopp’ô palo suojo. A ‘stu punto n’atu mutarribbo (allenatore) fósse curruto cu ‘e cazune ‘mmano pe ‘nventarese coccosa, facenno trasí a ssant’Arcadio pe vvedé si fósse stato pussibbile truvà ‘o pareggio cagnanno ‘o tipo d’attacco, datose ca Ciruzzo nun steva facenno ‘o riesto niente... ‘mmece Sarri lassaje ‘e ccose comme steveno cu ttutte ‘e cconsequenzie d’’o caso ca nun tardajeno. Cumminfatte arrivate ô 10’ Casemiro apprufittaje ‘e ‘na respinta corta d’Albiol(le) e ffacette partí ‘na cagliosa ca ce casticaje p’’a terza vota.Mubbara (partita) nchiusa cu ‘o Napule ca oramaje facette atto ‘e presenza e avette (67’) ‘o tiempo proprio cu cCiruzzo, ca nun sfruttaje ‘na pennellata ‘e Peppe ‘a ‘nguenta, ‘e darece ‘o dispiacere ‘e sbaglià pure ‘o pussibbile tre a ddoje i avettem’aspettà ‘o 74’ quanno finalmente Sarri se decidette a ffà trasí a ssant’Arcadio, ma p’’o pulaccone se trattaje ‘e ‘na presa p’’o prozo; che mmaje êsse pututo fà ‘int’a ppoco minute quanno ‘e cumpagne nun avetteno manco ‘o tiempo d’accorgerse ch’era trasuto e nnun lle detteno manco ‘na palla ‘a jucà? Che pretenneva Sarri? Nisciuno ‘o ppo’ ssapé! Passammo ê ppaggelle: REINA 6 Quanno putette faccette ‘o ssuojo comme quanno, doppo appena vinte siconne, respingette ‘e punio ‘na cunchiusione periculosa d’’o solito Benzemà e ccomme sbrugliaje ‘a matassa cu ddoje bbelli asciute a mmestiere a ll’arrancua (ripresa). Nun tenette sfarme (colpe) ‘ncopp’a ll’addaffe (reti). HYSAJ 5 Fenuta ‘a mubbara (partita) nun ll’abbastajeno pinnule p’’o male ‘e capa:sufferette assaje nun sulo p’‘a presenza ‘e Ronaldo [ca sinamparco(comunque) nun me parette isso], ma soprattutto pe ll’avanzate uffenzive ‘e Marcelo. ALBIOL 5 Tenette ‘ncopp’â cuscienza ‘o fatto d’avé perzo ‘o cuntrollo Benzemà sotto porta e lle mancajeno bbuone diece centimetre d’aldezza proprio quanno ‘o Napule nun êsse avut’’a piglià stuche(gol), pe nnun parlà ‘e chella rispinta corta ca rijalaje a cCasimiro ‘a palla d’’o tre a uno. P’’o riesto fove respunzabbile ‘e cchiú ‘e ‘nu sfregazzo(sbavatura) sentenno troppo ‘a pressiona d’’a serata. KOULIBALY 5 ‘A chiena i ‘a vacante: durante ô primmo ajone (primo tempo) jette meglio d’Albiòl(le), ma arrivate a ll’arrancua (ripresa) ne facette cchiú ‘e Cartuccio smarrunanno paricchio. GHOULAM 6 Passanno ‘o tiempo riuscette a ppiglià ‘e mmesure ‘e James(se) e dô lato suojo ‘e dritta, ‘a fora ‘e ‘na grama vota, ‘o Napule nun ghiette quase maje ‘nsufferenzia e isso risultaje ô prazzo (alla fine) ‘o meglio d’’a linia ‘e trasera (difesa) cuana (azzurra) . ZIELINSKI 5 Me dispiace, ma ‘o guaglione ajeressera nun me piacette; ce mette sí tanta cataffa (intensità) ma pure troppa ‘mpricisione tant’ è overo ca me n’arricordo cchiú ‘e pasigli (passaggi) sbagliate ca chilli juste! Peccato. [Dô 75’ ALLAN – sv.] DIAWARA 6,5 Sbagliaje quacche ppallone, ma ‘ncumpenso ne ricuepraje paricchi e nemmeno sotto pressione jette ‘int’ê chiavette; ‘nzomma dètte ‘a ‘mpressione ‘e nun farese cundizziunà dâ ‘mpurtanza d’’o campo e d’’a serata, cosa ca ‘mmece succedette pe cquacche ato. HAMSIK 6 Me fósse aspettato ‘e cchiú dô capitano ca doppo ‘nu primmo ajone (tempo) suddisfacente quanno se chiammaje ll’applauso pe cchillu bbassurero (suggerimento)urtizzante (in verticale) pe lLorenzigno, passanno ‘o tiempo, se ne scennette assaje pigliato ‘mmiezo ‘nfra Modric(cio) e Kroos(se) ca lle rennetteno ‘a vita difficile. [Da ll’84’ MILIK sv. E nno pe sfarma (colpa) soja!] CALLEJON[Peppe ‘a ‘nguenta] 6 Cchiú sacrifiggio ca auto, ma chello servette ajeressera; ajutaje assaje a ll’epata (in fase) ‘e cupertura e sse facette truvà ô posto justo ô mumento justo comme a cquanno pennellaje chella palla ca Ciruzzo sprecaje ‘mmece ‘e farela addivintà ‘o tre a ddoje! MERTENS[Ciruzzo] 4,5 Me dispiace, ma ‘e fatte chiste so’ i ‘e cchiú nun se mmereta; êss’avut’ ‘a essere ‘a serata soja e ‘mmece isso nun ne ‘ncarraje una; ‘nzomma tutto summato ggiraje a vvacante e sprecaje ‘na palla d’oro chella d’’o pussibbile tre a ddoje ca ce avesse dato ‘nu poco ‘e speranza p’’a mubbara (partita) ‘e ricresso (ritorno) ô san Paolo. Mannaggia! INSIGNE 7 Nun me ll’aspettavo, ma aggi’’a ricunoscere ca fove isso ‘a nota cchiú ppusitiva d’’a scuatra cuana (azzurra) nun sulo p’’a granna addaffa (rete)ca ce dette ‘o vantaggio, ma pure p’’o nummero ‘e pallune recuperate. Penzo proprio ca pure p’’o ricresso (ritorno) putimmo cuntà ‘ncopp’ô scugnizzo ‘e Fratta. ALL. SARRI 5,5 Si perdettemo accussí mmalamente ‘a sforma (colpa) è ‘mprimmose ‘a soja ca nun fove capace ‘e tirà fora coccosa ‘e cchiú dê suoje, nè ‘nventarese chello ca fósse servuto ajeressera ô bBernabeu e soprattutto se tenette ‘mpanca a ssant’Arcadio mannannolo ‘ncampo pe pochi minute, quanno ‘o pulaccone nun putette fà niente! arbitro SKOMINA (Slovenia) 4,5 Nun vulette vedé paricchi carì (falli) d’’e padrune ‘e casa e nnun ne jettaje fora ‘nu paro! E ddicere ca quaccuno, ‘ntribbuna-divano smammaje ca chist’arbitro ce avesse purtato bbuono! E ffermammoce cca. È gghiuta comm’è gghiuta e ppacienza! Nun ce rummane ca sperà ca, tutto summato, cu ‘o 3-1 d’’a primma nun tutto è pperzo e ca ô ricresso (ritorno), mettenno ‘ncampo ‘na furmazziona adatta e ca ‘o vvo’ fà putimmo vencere pe ddoje a zzero e passà ‘o turno. P’’o mumento ve ringrazzio, ve ssaluto e vve donco appuntamento, si dDi’ vo’ a llunnerì ca vene doppo d’’a nacchèlla (trasferta) ‘e dummeca a Vverona pe gghiucà contr’ô Chievo e pprunostiche nun ne faccio! Staveti bbe’ R.Bracale Brak

Nessun commento: